Mahimo magbatyag ka nga gusto mo dayon bag-uhon ang tanan. Masiling ka, ‘Sa sini nga semana, untatan ko na ang pagpanigarilyo, pagpamuyayaw, kag pagpulaw; maehersisyo na ako, makaon sing masustansia nga pagkaon, kag tawgan ko na si Lolo kag si Lola.’ Pero kon dunganon mo ini tanan, wala ka gid sing may mahimo!

Ang maugdang nga tawo nakahibalo kon ano lang ang iya masarangan. Ginabaton niya nga may limitasyon ang iya tion, kusog, kag mga pagkabutang. Gani imbes nga bag-uhon niya ang tanan sing dulungan, ginaamat-amat niya ini.

Amat-amat nga pauswaga ang imo mga batasan suno sa imo masarangan. Ang masunod makabulig sa imo:

1. Maghimo sing isa ka listahan sang maayo nga mga batasan nga gusto mo pauswagon kag isa pa ka listahan sang malain nga mga batasan nga gusto mo untatan. Isulat ang tanan mo nga madumduman.

2. Butangi sing numero ang imo mga ginlista suno sa kon ano ang pinakaimportante sa imo.

3. Magpili lang sang pila, bisan isa lang ukon duha, sa imo listahan. Amo anay ini ang imo panikasugan. Dayon isunod mo naman ang isa ukon duha ka batasan sa imo listahan.

Mas madali mo matapos ang yara sa imo listahan kon ang malain nga batasan islan mo sang maayo. Halimbawa, kon ginlista mo sa malain nga batasan ang imo pagkapalatan-aw sing TV kag sa maayo nga batasan ang pag-istorya sa imo mga pinalangga, mahimo ka magdesisyon: ‘Imbes nga paandaron ko dayon ang TV pag-abot ko sa balay kada adlaw, tawgan ko ang akon abyan ukon pamilya.’