Ang mag-asawa nga may respeto sa isa kag isa nagapalanggaanay gihapon bisan pa may indi pag-intiendihanay. “Ini nga mga mag-asawa wala nagapakatig-a,” siling sang libro nga Ten Lessons to Transform Your Marriage. “Kundi, ginaistoryahan nila sing maayo ang ila mga problema. Matinahuron nila nga ginapamatian ang isa kag isa kag naga-adjust para masolusyunan ini.”

PRINSIPIO SA BIBLIA: ‘Ang gugma wala nagapangita sang kaugalingon nga kaayuhan.’—1 Corinto 13:4, 5.

“Ginarespeto ko ang akon asawa paagi sa pag-apresyar sa iya kag paglikaw sa mga butang nga makapalain sa iya ukon sa amon pag-asawahay.”—Micah.

Kon wala sing respeto ang mag-asawa sa isa kag isa, ang ila pag-istoryahanay mahimo maglakip sang pagpakanubo, insulto, kag pagpakalain—nga suno sa mga researcher amo ang mga rason sang pagbulagay.

“Ang imo negatibo nga ginahambal, ginapabatibati, ukon ginalahog parte sa imo asawa makaguba sang iya kompiansa, pagsalig, kag sa inyo pag-asawahay.”—Brian.

TILAWI INI

Talupangda ang imo ginahambal kag ginahimo sa sulod sang isa ka semana. Dayon pamangkuta ang imo kaugalingon:

• ‘Pirme ko bala ginapakalain ang akon bana ukon asawa, ukon pirme ko sia ginadayaw?’

• ‘Ano ang ginahimo ko nga nagapakita nga ginarespeto ko ang akon bana ukon asawa?’

ISTORYAHI NINYO NGA MAG-ASAWA

• Ano ang gusto ninyo nga himuon kag ihambal para magbatyag ang kada isa nga ginarespeto?

• Ano ang mga ginahimo kag ginahambal nga nagapabatyag sa kada isa sa inyo nga wala kamo ginarespeto?

MGA PANUGDA

• Isulat ang tatlo ka paagi nga gusto mo mapakitaan ka sing respeto. Ipahimo man ini sa imo bana ukon asawa. Bayluhanay kamo sang listahan, kag tinguhai ninyo nga ipakita ang respeto sa mga kahimtangan nga inyo ginsulat.

• Isulat ang nanamian mo gid nga mga batasan sang imo bana ukon asawa. Dayon isugid sa iya kon ngaa ginaapresyar mo gid ini nga mga batasan.

“Ginarespeto ko ang akon bana kon ang akon mga ginahimo nagapakita nga importante sia sa akon kag gusto ko sia mangin malipayon. Indi man kinahanglan nga espesyal gid ang akon himuon, kon kaisa bisan sa gagmay lang nga butang.”—Megan.

Gani, indi ini parte sa kon bala pamatyag mo matinahuron ka; kundi kon bala nagabatyag ang imo bana ukon asawa nga ginarespeto mo sia.

PRINSIPIO SA BIBLIA: “Isuksok ninyo ang mapinalanggaon nga kaawa, kaayo, pagkamapainubuson, kalulo, kag pagkamapinasensiahon.” —Colosas 3:12.