Bilang ginikanan, may personal ka nga mga talaksan nga ginasunod. Halimbawa, ginatinguhaan mo bala nga mangin tampad sa tanan nga butang? Kon amo, mahimo nga gusto mo ini itudlo sa imo kabataan.

Gusto mo man sila tudluan nga dapat mangin mapisan, wala sing pinilian, kag mainulikdon sa iban—mga pamatasan nga mas maayo nga pauswagon samtang bata pa ang isa.

PRINSIPIO SA BIBLIA: “Hanasa ang bata sa husto nga dalanon; bisan magtigulang na sia indi sia magtalikod sa sini.”—Hulubaton 22:6.

Sa sining moderno nga panahon, importante gid ang maayo nga pamatasan. “Ang malain nga impluwensia mahimo maghalin sa mga gadyet sa bisan ano nga oras,” siling sang iloy nga si Karyn. “Puede nga ara sa amon tupad ang amon bata pero nagatan-aw sia sang binastos!”

PRINSIPIO SA BIBLIA: ‘Ang hamtong nga mga tawo may ikasarang sa paghangop nga nahanas sa pagkilala sang maayo kag malain.’ —Hebreo 5:14.

Importante nga pamensaron man ang iban. Nagalakip ini sang simple lang nga pagsiling sang “palihug” kag “salamat” kag pag-ulikid sa iban—nga talagsa na lang makita subong bangod ang kalabanan mas interesado sa ila mga gadyet sangsa mga tawo.

PRINSIPIO SA BIBLIA: “Himua ninyo sa inyo isigkatawo ang luyag ninyo nga himuon nila sa inyo.” —Lucas 6:31.

Ipahibalo ang imo moral nga mga talaksan. Halimbawa, ginapakita sang pagtuon nga mas nagalikaw ang mga tin-edyer sa pag-sex antes sang kasal kon maathag nga gintudlo sa ila nga sala ini.

PANUGDA: Gamita ang bag-o nga mga balita para makaistorya parte sa maayo nga pamatasan. Halimbawa, kon parte ini sa krimen, mahimo ka magsiling: “Grabe na gid subong ang ginahimo sang mga tawo bangod sa kaakig nila sa iban. Ngaa ayhan nahimo nila ina?”

“Mabudlay para sa kabataan ang pagpili sang maayo kag malain kon wala sila makahibalo kon ano ang maayo ukon malain.”—Brandon.

Tudlui ang kabataan nga pamensaron ang iban. Bisan ang gamay nga bata makatuon sa pagsiling sing “palihug” kag “salamat” kag pagpakita sing pagtahod sa iban. “Kon marealisar sang kabataan nga bahin sila sang mas daku pa nga grupo—sang isa ka pamilya, eskwelahan, kag komunidad—mas nagahimo sila sing maayo para makabenepisyo ang tanan, indi lang ang ila kaugalingon,” siling sang libro nga Parenting Without Borders.

PANUGDA: Hatagi sing ulubrahon sa balay ang imo kabataan para matun-an nila nga importante ang pagbulig sa iban.

“Kon maanad na ang amon kabataan sa mga ulubrahon sa balay subong, indi na sila mabudlayan kon mangabuhi na sila. Mangin bahin na sang ila kabuhi ang paghimo sang ila responsibilidad.”—Tara.