MAY tion bala nga nabalaka ka kay wala ka kabalo kon kay sin-o ka mangayo sing bulig? Bangod ari na kita sa “makahalanguyos nga mga tion nga mabudlay atubangon,” posible maluyahan kita sing buot kag masubuan. (2 Tim. 3:1) Pero kon may problema kita, may makabulig gid sa aton. Ang Biblia nagasiling nga “sa tion sang kalisdanan,” importante ang matuod nga mga abyan.​—Hulu. 17:17.

Sang nagalakbay si apostol Pablo bilang isa ka misyonero, nakabulig gid sa iya ang iya mga abyan. (Col. 4:​7-11) Sang napriso si Pablo sa Roma, ang iya mga abyan amo ang naghimo sang mga butang nga indi niya mahimo. Halimbawa, si Epafrodito ang nagdala kay Pablo sang iya mga kinahanglanon nga ginhatag sang mga kauturan sa Filipos. (Fil. 4:18) Si Tiquico naman ang nagdul-ong sang mga sulat ni Pablo sa mga kongregasyon. Gani bisan pa napriso si Pablo sa isa ka balay kag sang ara sia sa prisuhan, nakapadayon sia sa iya ministeryo sa bulig sang iya mga abyan. Sa aton bahin, paano naton mapakita nga matuod kita nga abyan?

Sa aton tion subong, madamo nga kauturan ang nangin matuod gid nga abyan. Binagbinaga kon paano ginpakita sang isa ka sister nga matuod sia nga abyan ni Elisabet, nga isa ka regular payunir sa Spain. Sang nabal-an nga may malala nga cancer ang nanay ni Elisabet, gina-text sia pirme sang sister sang makapalig-on nga mga teksto sa Biblia. Nagsiling si Elisabet, “Napalig-on gid ako sa iya mga text, kag kanami sa pamatyag nga may nagadumdom sa imo.”​—Hulu. 18:24.

Mangin suod pa gid kita sa aton mga kauturan kon buligan naton sila nga makabantala ukon makatambong sa mga miting. Halimbawa, puede naton sugaton kag idul-ong ang tigulang nga mga utod para makatambong sila sa mga miting ukon makabantala. Kon himuon naton ini, mapalig-on naton sila kag mapalig-on man nila kita. (Roma 1:12) Pero, may mga kauturan kita nga indi na makahalin sa ila balay. Paano kita mangin matuod nga abyan sa ila?

Indi makatambong sa miting sa Kingdom Hall ang pila sa aton mga kauturan bangod nagabalatian sila ukon bangod sa ila kahimtangan. Amo ina ang kahimtangan sang isa ka brother nga si David nga may cancer. Gin-chemotherapy sia sa sulod sang sobra anom ka bulan. Sa sini nga mga tion, nagatambong sa mga miting si David kag ang iya asawa nga si Lidia paagi sa videoconference.

Paano sila ginbuligan sang ila mga abyan sa kongregasyon? Kada tapos sang miting, may pila ka utod nga ara sa Kingdom Hall nga nagaistorya  kay David kag kay Lidia paagi sa videoconference. Kag kon magkomento si David kag si Lidia, gina-text sila sang mga kauturan para pasalamatan sila. Ano ang resulta? Nabatyagan gid ni David kag ni Lidia ang pagpalangga sang mga kauturan.

Puede man naton buligan ang mga utod nga indi na makahalin sa ila balay sa ila pagbantala. Puede naton ma-adjust ang aton iskedyul para maupdan naton sila. Paagi sini, mapakita naton nga ginadumdom naton sila. (Hulu. 3:27) Puede naton sila updan sa pagpanaksi paagi sa paghimo sang mga sulat ukon paagi sa telepono. Kon indi na makahalin sa balay ang isa ka utod, puede sia makatambong sa mga miting para sa pag-alagad sa latagon paagi sa videoconference. Nagapasalamat gid si David kag si Lidia kay may amo sini nga kahimusan sa ila kongregasyon. Si David nagpaathag, “Makapalig-on gid ini sa amon kay makaupod namon ang mga kauturan sa malip-ot nga pagbinagbinag kag sa pagpangamuyo.” Kag kon posible, puede mo dal-on sa utod nga indi na makahalin sa iya balay ang imo Bible study para makaupod sia sa inyo pagtuon.

Kon ginaupdan naton ang mga utod nga indi na makahalin sa ila balay, makita naton ang ila maayo nga mga kinaiya kag mangin suod pa gid kita sa ila. Halimbawa, kon makita mo kon paano nila ginagamit ang Biblia para buligan ang iban nga mangin suod pa gid kay Jehova, manamian ka pa gid sa ila. Kon ginabuligan naton ang aton mga utod sa pagbantala kag sa pagtambong sa mga miting, magadamo pa gid ang aton mga abyan.​—2 Cor. 6:13.

Napalig-on gid si Pablo sang ginkadtuan sia sang iya abyan nga si Tito. (2 Cor. 7:​5-7) Maayo gid kon palig-unon naton ang aton mga utod paagi sa aton mga ginahambal. Pero matun-an naton sa ginhimo ni Tito nga puede man naton sila palig-unon paagi sa pag-upod sa ila kag pagbulig sa ila.​—1 Juan 3:18.

Parte sa pagbuligay, maayo gid nga halimbawa ang aton mga kauturan sa Russia. Binagbinaga ang eksperiensia ni Sergey kag sang iya asawa nga si Tatyana. Sang gin-raid sang mga pulis ang ila balay, gindala sila sa presinto para interogahon. Una nga ginpapauli si Tatyana. Nagsiling si Sergey: “Pag-abot gid [ni Tatyana] sa balay, may nag-abot dayon nga isa ka maisog nga sister. Madamo pa nga mga kauturan ang nag-abot kag nagpanghimos sa amon apartment pagkatapos sang raid.”

Nagsiling pa si Sergey: “Nanamian gid ako sang Hulubaton 17:​17, nga nagasiling: ‘Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.’ Naintiendihan ko gid ang buot silingon sini sang ginhingabot ako kag wala ako sing mahimo kon ako lang. Ginhatagan ako ni Jehova sang maisog nga mga abyan nga handa pirme nga magbulig.” a

Samtang nagabudlay pa gid ang aton sitwasyon, kinahanglan naton ang bulig sang aton mga abyan. Kag mas kinahanglan naton sila sa tion sang dakung kapipit-an. Gani subong pa lang, panikasugan gid naton nga mangin matuod nga abyan.​—1 Ped. 4:​7, 8.