1. Paano ginpabakod sang Dios ang iya mga alagad sang una?

 SA MASAMI, ginalaragway sang Pulong sang Dios ang matutom nga mga alagad ni Jehova bilang mabakod nga mga tawo. Pero may mga tion nga pamatyag nila indi sila mabakod. Nabatyagan ini bisan sang mga pinakamaisog kag pinakamakusog nga alagad ni Jehova. Halimbawa, may mga tion nga pamatyag ni Hari David ‘mabakod sia kaangay sang bukid,’ pero may mga tion man nga “hinadlukan” sia. (Sal. 30:7) Sa bahin naman ni Samson, makusog gid sia kay ginhatagan sia sang espiritu sang Dios sing kusog. Pero kabalo sia nga kon wala ang kusog nga ginhatag sa iya sang Dios, “magaluya [sia] nga pareho lang sang iban nga tawo.” (Huk. 14:5, 6; 16:17) Gani nangin mabakod ining matutom nga mga alagad ni Jehova bangod ginpabakod niya sila.

2. Ngaa nagsiling si apostol Pablo nga mabaskog sia kon maluya sia? (2 Corinto 12:9, 10)

² Kabalo si apostol Pablo nga kinahanglan man niya ang bulig ni Jehova. (Basaha ang 2 Corinto 12:9, 10.) Pareho sa madamo sa aton, may balatian man si Pablo. (Gal. 4:13, 14) May mga tion man nga nabudlayan sia nga himuon ang husto. (Roma 7:18, 19) Kag kon kaisa, nabalaka sia kag nakulbaan. (2 Cor. 1:8, 9) Pero, sa mga tion nga maluya si Pablo, nagbaskog sia. Paano? Ginhatagan ni Jehova si Pablo sing kusog para mabatas niya ang mga kabudlayan.

3. Ano nga mga pamangkot ang sabton naton sa sini nga artikulo?

³ Nagapromisa si Jehova nga pabakuron man niya kita. (1 Ped. 5:10) Pero dapat may himuon kita para buligan kita ni Jehova. Binagbinaga ini nga ilustrasyon. Ang makina sang salakyan amo ang ginahalinan sang puersa nga nagapadalagan sa sini. Pero kon indi pagtapakan sang drayber ang gasolinador, indi gid ini makahalin. Sing kaanggid, handa si Jehova nga hatagan kita sing kusog nga kinahanglan naton, pero dapat may himuon  kita para mabaton naton ini. Ano ang mga ginaaman ni Jehova para pabakuron kita? Kag ano ang dapat naton himuon para mapabakod niya kita? Para mabal-an naton ang mga sabat sa sini nga mga pamangkot, binagbinagon naton kon paano ginpabakod ni Jehova ang tatlo ka karakter sa Biblia nga si manalagna Jonas, si Maria nga iloy ni Jesus, kag si apostol Pablo. Binagbinagon man naton kon paano ginapabakod ni Jehova ang iya mga alagad subong.

4. Paano kita mapabakod ni Jehova?

⁴ Ang isa ka paagi para mapabakod kita ni Jehova amo ang pagpangamuyo sa iya. Sabton ni Jehova ang aton mga pangamuyo paagi sa paghatag sa aton sing “gahom nga labaw sa kinaandan.” (2 Cor. 4:7) Mapabakod man kita kon basahon naton ang iya Pulong kag pamalandungan ini. (Sal. 86:11) “Gamhanan” ang mensahe sa aton ni Jehova nga mabasa sa Biblia. (Heb. 4:12) Kon mangamuyo ka kay Jehova kag basahon mo ang iya Pulong, mabaton mo ang kusog nga kinahanglan mo para mabatas mo ang imo mga problema, para indi madula ang imo kalipay, ukon para mahimo mo ang mabudlay nga asaynment. Binagbinaga kon paano ginpabakod ni Jehova si manalagna Jonas.

5. Ngaa kinahanglan ni manalagna Jonas ang kabakod?

⁵ Kinahanglan ni manalagna Jonas ang kabakod. Ginpalagyuhan niya ang mabudlay nga asaynment nga ginpahimo sa iya ni Jehova. Bangod sini, diutayan lang sia mapatay pati na ang mga kaupod niya sa sakayan bangod sang mabaskog nga unos. Sang gintagbong sia sang mga marinero sa dagat, gintulon sia sang isa ka daku nga isda. Sigurado nga makahaladlok gid sa sulod sang tiyan sang sini nga isda. Ano ayhan ang ginahunahuna sadto ni Jonas? Nahunahuna bala niya nga sa tiyan sang isda na sia mapatay? Nahunahuna bala niya nga ginsikway na sia ni Jehova? Sigurado nga hinadlukan gid si Jonas.

6. Suno sa Jonas 2:1, 2, 7, ano ang nagpabakod kay Jonas sang ara sia sa sulod sang tiyan sang isda?

⁶ Samtang nagaisahanon si Jonas sa tiyan sang daku nga isda, ano ang ginhimo niya para mapabakod sia ni Jehova? Nangamuyo sia. (Basaha ang Jonas 2:1, 2, 7.) Wala gintuman ni Jonas si Jehova, pero naghinulsol sia. Gani kumbinsido sia nga pamatian ni Jehova ang iya pangamuyo. Ginpamalandungan man ni Jonas ang Kasulatan. Ngaa masiling naton ini? Base sa iya pangamuyo nga mabasa sa Jonas kapitulo 2, madamo sa mga tinaga kag mga ekspresyon nga iya gingamit ang mabasa man sa mga Salmo. (Halimbawa, ipaanggid ang Jonas 2:2, 5 sa Salmo 69:1; 86:7.) Maathag nga pamilyar gid si Jonas sa Kasulatan. Bangod ginpamalandungan niya ini samtang ara sia sa mabudlay gid nga sitwasyon, nagbakod ang iya pagsalig nga buligan sia ni Jehova. Sang ulihi, ginluwas ni Jehova si Jonas kag ginhatagan sia sang asaynment. Sa sini nga tion, handa na si Jonas nga himuon ini.​—Jon. 2:10–3:4.

7-8. Paano napabakod ang isa ka brother sa Taiwan sang may problema sia?

⁷ Mabuligan kita sang halimbawa ni Jonas kon may mabudlay kita nga mga problema. Binagbinaga si Zhiming b nga isa ka brother sa Taiwan. Magluwas nga may malala sia nga balatian, grabe man ang pagpamatok sa iya sang iya pamilya bangod nagaalagad sia kay Jehova. Para mapabakod sia ni Jehova, nagapangamuyo sia kag nagatuon. Nagsiling sia: “May mga tion nga kon may problema ako, grabe gid ang akon kabalaka. Nabudlayan ako nga magkalma, gani indi na ako maka-personal study.” Pero padayon sia nga nagapangayo sing bulig kay Jehova. Nagsiling sia: “Una, nagapangamuyo ako kay Jehova. Dayon, nagagamit ako sang  earphone para pamatian ang aton mga Kingdom song. Kon kaisa, ginakanta ko ini sing mahinay asta nga magkalma ako. Kon magkalma na ako, nagatuon ako dayon.”

⁸ Paagi sa personal nga pagtuon, napabakod si Zhiming nga batason ang mabudlay nga mga sitwasyon. Halimbawa, samtang nagapaayo sia pagkatapos sia maoperahan, ginsilingan sia sang nurse nga kinahanglan tughungan sia sang dugo bangod manubo ang iya red blood cell. Pero sang gab-i antes sia sadto gin-operahan, ginbasa ni Zhiming ang eksperiensia sang isa ka sister nga nakaagi sang operasyon nga himuon man sa iya. Mas manubo ang red blood cell sang sister sangsa kay Zhiming, pero wala nagpatughong sang dugo ang sister kag nag-ayo sia. Ini nga eksperiensia nagpalig-on gid kay Zhiming nga magpabilin nga matutom.

9. Kon naluyahan ka bangod sang imo problema, ano ang puede mo himuon? (Tan-awa man ang mga piktyur.)

⁹ Kon may problema ka, daw indi ka na bala makapangamuyo kay Jehova bangod grabe gid ang imo kabalaka? Ukon daw indi ka na bala makatuon bangod grabe gid ang imo kakapoy? Dumduma nga nahangpan gid ni Jehova ang imo sitwasyon. Gani bisan pa simple lang ang imo pangamuyo, makasalig ka nga ihatag ni Jehova kon ano gid ang imo kinahanglan. (Efe. 3:20) Kon daw nabudlayan ka magbasa kag magtuon bangod nagamasakit ka, nakapoy, ukon nasubuan, puede mo pamatian ang mga audio recording sang Biblia ukon sang aton mga publikasyon nga nabase sa Biblia. Puede mo man pamatian ang aton mga kanta ukon tan-awon ang aton mga video sa jw.org. Gusto gid ni Jehova nga pabakuron ka. Gani mangamuyo kay Jehova. Dayon pangitaa ang iya sabat paagi sa Biblia kag sa iban pa nga ginaaman niya.

10. Paano kita ginapabakod sang aton mga kauturan?

¹⁰ Puede gamiton ni Jehova ang aton mga kauturan para pabakuron kita. Kon may problema kita ukon nabudlayan kita nga himuon ang mabudlay nga asaynment, ‘makahatag sila sing daku nga lugpay sa aton.’ (Col. 4:10, 11) Kinahanglan gid naton ang mga abyan “sa tion sang kalisdanan.” (Hulu. 17:17) Kon naluyahan kita, mahatagan kita sang aton mga kauturan sang aton mga kinahanglanon, mapaumpawan nila  kita, kag mapalig-on nila kita nga padayon nga mag-alagad sing matutom. Naeksperiensiahan ini ni Maria nga iloy ni Jesus. Binagbinagon naton kon paano sia ginpabakod sang iban.

11. Ngaa kinahanglan ni Maria ang kabakod?

¹¹ Kinahanglan ni Maria ang kabakod para mahimo niya ang kabubut-on ni Jehova. Hunahunaa kon ano ang iya nabatyagan sang nakabaton sia sang mabudlay nga asaynment halin sa isa ka anghel nga si Gabriel. Magabusong sia bisan pa wala sia sing bana. Wala man sia sing eksperiensia kon paano magpadaku sang bata, pero sia ang magapadaku sang bata nga mangin Mesias sa ulihi. Kag kinahanglan niya ipaathag sa iya nobyo nga si Jose nga nagabusong sia bisan pa wala sia nakahulid sa lalaki.​—Luc. 1:26-33.

12. Suno sa Lucas 1:39-45, paano napabakod si Maria?

¹² Paano napabakod si Maria para mahimo niya ining pinasahi kag mabudlay nga asaynment? Nagpabulig sia sa iban. Halimbawa, ginpangabay niya si Gabriel nga hatagan sia sang dugang nga impormasyon parte sa iya asaynment. (Luc. 1:34) Wala madugay pagkatapos sini, ginkadtuan niya ang iya paryente nga si Elisabet nga nagaistar sa “mabukid nga rehiyon” sang Juda. Nakabulig gid ini kay Maria. Kay man, gindayaw ni Elisabet si Maria. Gintuytuyan man ni Jehova si Elisabet nga isugid ang isa ka makapalig-on nga tagna parte sa mangin anak ni Maria. (Basaha ang Lucas 1:39-45.) Nagsiling si Maria nga “naghimo [si Jehova] sing gamhanan nga mga buhat paagi sa iya butkon.” (Luc. 1:46-51) Paagi kay Gabriel kag kay Elisabet, ginpabakod ni Jehova si Maria.

13. Bangod nagpabulig ang isa ka sister sa Bolivia sa iya mga kauturan, ano ang maayo nga resulta sini sa iya?

¹³ Pareho kay Maria, mapabakod ka man sang imo mga kauturan. Binagbinaga si Dasuri nga isa ka sister sa Bolivia. May malala nga balatian ang iya amay kag wala ini sing bulong. Sang naospital ang iya amay, ginpanikasugan gid niya nga atipanon sia. (1 Tim. 5:4) Pero indi ini mahapos. Nagsiling sia, “Madamo nga beses nga pamatyag ko indi ko na ini masarangan.” Nagpangayo bala sang bulig si Dasuri? Sa umpisa, wala niya ini ginhimo. “Indi ko gusto nga pabug-atan ang mga kauturan,” siling niya. “Nahunahuna ko, ‘Si Jehova ang magabulig sa akon.’ Pero narealisar ko nga bangod wala ako nagapangayo sang bulig sa iban, ginasolo ko lang ang akon problema.” (Hulu. 18:1) Nagdesisyon si Dasuri nga sulatan ang pila niya ka abyan kag ginpaathag niya sa ila ang iya sitwasyon. Nagsiling sia: “Daw indi ako kabalo kon paano pasalamatan ang akon pinalangga nga mga kauturan. Napabakod gid nila ako.” Nagsiling pa sia: “Nagadala sila sang pagkaon sa ospital kag naga-share sila sang makapalig-on nga mga teksto. Makalilipay gid mabal-an nga wala kita nagaisahanon kay bahin kita sang isa ka daku nga pamilya ni Jehova. Kag handa gid ang aton mga kauturan sa pagbulig sa aton, sa pag-upod sa aton kon nasubuan kita, kag sa pagpalig-on sa aton nga padayon nga mag-alagad kay Jehova.”

14. Ngaa dapat naton batunon ang bulig sang mga gulang?

¹⁴ Ginagamit ni Jehova ang mga gulang para pabakuron kita kag paumpawan. Regalo sila ni Jehova. (Isa. 32:1, 2) Gani kon nabalaka ka, isugid sa mga gulang ang imo ginabatyag, kag indi mag-alang-alang nga batunon ang ila bulig. Paagi sa ila, mapabakod ka ni Jehova.

15. Ano nga paglaum ang ginapabaloran sang tanan nga Cristiano?

¹⁵ Nagahatag sa aton sang paglaum ang mga promisa ni Jehova nga mabasa sa Biblia. Nagapabakod man ini sa aton nga padayon nga mag-alagad sa iya. (Roma 4:3, 18-20) Bilang mga  Cristiano, may paglaum kita nga magkabuhi sing wala sing katapusan. Ang iban may paglaum nga mabuhi sa langit, kag ang iban naman may paglaum nga mabuhi sa paraiso sa duta. Ang aton paglaum nagapabakod sa aton para mabatas naton ang mga problema, para mabantala naton ang maayong balita, kag para mahimo naton ang aton mga asaynment sa kongregasyon. (1 Tes. 1:3) Ini nga paglaum amo man ang nagpabakod kay apostol Pablo.

16. Ngaa kinahanglan ni apostol Pablo ang kabakod?

¹⁶ Kinahanglan ni Pablo ang kabakod. Sa iya sulat para sa mga taga-Corinto, ginkumparar niya ang iya kaugalingon sa isa ka suludlan nga daga nga madali mabuka. “Ginaipit” sia, “ginaligban,” “ginahingabot,” kag “ginapukan.” May mga tion pa gani nga ara sa peligro ang iya kabuhi. (2 Cor. 4:8-10) Ginsulat niya ini samtang nagalakbay sia sa ikatlo nga tion bilang misyonero. Sadto nga tion, posible wala sia kabalo nga madamo pa sia sang maeksperiensiahan nga kabudlayan. Sang ulihi, ginsakit sia sang mga tawo, gindakop, diutayan lang sia malunod sa dagat, kag ginpriso man sia.

17. Suno sa 2 Corinto 4:16-18, ano ang nagpabakod kay Pablo para mabatas niya ang mga kabudlayan?

¹⁷ Bangod nagpokus si Pablo sa iya paglaum, nangin mabakod sia kag nabatas niya ang mga kabudlayan. (Basaha ang 2 Corinto 4:16-18.) Ginsilingan niya ang mga taga-Corinto nga bisan pa “nagaluya” ang iya lawas, indi gid sia maluyahan sang buot. Nagpokus si Pablo sa iya palaabuton. “Labaw gid sa tanan” ang iya paglaum nga magkabuhi sing wala sing katapusan sa langit, gani handa sia nga batason ang bisan ano nga kabudlayan. Ginpamalandungan ni Pablo ini nga paglaum, gani nagabakod sia “adlaw-adlaw.”

18. Paano nakabulig ang aton paglaum sa palaabuton para mangin mabakod si Tihomir kag ang iya pamilya?

¹⁸ Ang aton paglaum sa palaabuton amo ang nagpabakod kay Tihomir nga isa ka brother sa Bulgaria. Mga pila pa lang ka tuig ang nagligad, napatay ang iya manghod nga lalaki nga si Zdravko sa isa ka aksidente. Grabe gid ang kasubo ni Tihomir. Para maghaganhagan ang iya kasubo kag sang iya pamilya, ginaimadyin nila ang matabo sa tion sang pagkabanhaw. Nagsiling  sia: “Halimbawa, ginaistoryahan namon kon diin namon abiabihon si Zdravko, kon ano nga pagkaon ang ihanda namon para sa iya, kon sin-o ang amon mga agdahon para sa una nga tipontipon para sa iya, kag kon ano ang isugid namon sa iya parte sa katapusan nga mga adlaw.” Nagsiling si Tihomir nga bangod nagpokus sila sa ila paglaum, napabakod ang iya pamilya nga padayon nga magbatas kag hulaton ang tion nga banhawon na ni Jehova ang iya utod.

19. Paano mo mapabakod ang imo paglaum? (Tan-awa man ang piktyur.)

¹⁹ Paano mo mapabakod ang imo paglaum? Kon may paglaum ka nga magkabuhi sing wala sing katapusan sa duta, basaha sa Biblia kon paano ginalaragway ang Paraiso kag pamalandungi ini. (Isa. 25:8; 32:16-18) Imadyina nga ara ka na sa bag-ong kalibutan kag kon ano ang kabuhi didto. Imadyina ang imo makita, ang imo mabatian, kag ang imo mabatyagan. Para mabuligan ka sa pag-imadyin sang Paraiso, tan-awa ang mga piktyur sa aton mga publikasyon ukon ang mga music video, pareho sang Sa Bag-o nga Duta, Dali Na Lang Katama, ukon Akon Handurawon. Kon pirme naton imadyinon ang paglaum nga bag-ong kalibutan, mangin ‘umalagi lang kag mamag-an’ ang aton mga problema. (2 Cor. 4:17) Paagi sa paglaum nga ginhatag sa imo ni Jehova, mapabakod ka niya.

20. Kon naluyahan kita, paano kita mapabakod ni Jehova?

²⁰ Kon naluyahan kita, “hatagan [kita] sang Dios sing kusog.” (Sal. 108:13) Ginhatag na ni Jehova ang kinahanglan mo para mapabakod ka niya. Gani kon kinahanglan mo ang bulig para mahimo mo ang imo asaynment, para mabatas mo ang imo problema, ukon para indi madula ang imo kalipay, hanuot nga mangamuyo kay Jehova kag magpagiya sa iya paagi sa personal nga pagtuon. Kon ginapalig-on ka kag ginabuligan sang imo mga kauturan, batuna ini. Imadyina pirme ang imo paglaum sa palaabuton. Kon himuon mo ini tanan, ‘mapabakod ka sang kusog halin sa iya mahimayaon nga gahom agod makabatas ka sing bug-os nga may pagpailob kag kalipay.’​—Col. 1:11.