PAGKATAPOS sang pila ka adlaw nga ulan, nagsanag kag nag-init sang Lunes, Septiembre 1, 1919. Pagkahapon, halos 1,000 ka delegado ang nagtipon sa awditoryum nga may 2,500 ka pulungkuan para sa nagabukas nga sesyon sang kombension sa Cedar Point, Ohio, U.S.A. Pagkagab-i, 2,000 pa ang nag-abot paagi sa mga barko, salakyan, kag tren. Pagka-Martes, nagdamo pa gid ang tumalambong amo nga kinahanglan padayunon ang nabilin nga programa sang kombension sa gua sang awditoryum sa tunga sang dalagku nga mga kahoy.

Bangod sa silak sang adlaw, ang landong sang mga dahon daw desinyo sa bayo sang mga lalaki. Ginapalidpalid sang mabugnaw nga hangin halin sa Lake Erie ang mga balahibo sa kalo sang mga babayi. “Daw sa paraiso lang kami, bangod katahom gid sang palibot kag malayo sa magamo nga kalibutan,” siling sang isa ka utod nga lalaki.

Matahom matuod ang palibot, pero mas matahom tan-awon ang malipayon nga mga tumalambong. “Mga debotado sila tanan,” siling sang isa ka pamantalaan, “pero malipayon gid sila.” Para sa mga Estudyante sang Biblia, malipayon gid ini nga tion nga makaupdanay sila pagkatapos sang mabudlay nga mga pagtilaw. Ginpamatukan sila sa tion sang inaway, nabahinbahin ang mga kongregasyon, ginpasira ang Bethel sa Brooklyn, kag madamo ang ginpriso bangod sa Ginharian, lakip ang walo ka nagapanguna nga utod nga ginsentensiahan sing asta 20 ka tuig sa prisuhan. *

Sa sining mabudlay nga mga tinuig, naluyahan sing buot kag naligban ang pila ka Estudyante sang Biblia amo nga nag-untat sila sa pagbantala. Pero, ang kalabanan nagbatas wala sapayan sang pagpamatok sang awtoridad. Ang isa ka imbestigador nagreport nga bisan pa ginpaandaman ang mga Estudyante sang Biblia, ang iya mga gin-interogar nagsiling nga “padayon sila nga magabantala sang pulong sang Dios tubtob sa katapusan.”

Sang tion sang pagtilaw, ang matutom nga mga Estudyante sang Biblia padayon nga “naghulat sa direksion sang Ginuo, . . . kag pirme nagapangamuyo sang panuytoy sang Amay.” Subong, nahiusa sila liwat sa malipayon nga asembleya diri sa Cedar Point. Nagpalibog ang isa ka utod nga babayi kon paano mangin organisado liwat ang pagbantala kag mapauswag ang  ila hilikuton. Amo man sini ang ginabatyag sang madamo didto. Gusto na gid nila magbantala!

Sa sulod sang isa ka semana, ginapaligban sang mga delegado ang mga letra nga “GA” nga makita sa programa sang kombension, sa kard para sa delegado, kag sa mga karatula sa palibot sang ginahiwatan sang kombension. Sang Biernes, nga gintawag nga “Co-Laborers’ Day,” ginpahibalo ni Joseph F. Rutherford ang buot silingon sini sa 6,000 nga tumalambong. Ang “GA” nagapatuhoy sa The Golden Age, nga isa ka bag-o nga magasin para sa ministeryo. *

Amo ini ang ginsiling ni Utod Rutherford parte sa iya pareho nga hinaplas nga mga Cristiano: “Bangod sang ila pagtuo, makita nila ang Golden Age [tion sang kasulhayan] sang mahimayaon nga paggahom sang Mesias pagkatapos sang mabudlay nga tion. . . . Ginakabig nila nga panguna nga obligasyon kag pribilehiyo ang pagpahibalo sa kalibutan sang pag-abot sang tion sang kasulhayan. Bahin ini sang hilikuton nga ginsugo sa ila sang Dios.”

Ang The Golden Age, “a Journal of Fact, Hope, and Conviction,” gamiton sa bag-o nga paagi sang pagbantala—ang pamalaybalay nga kampanya para sa suskripsion. Sang ginpamangkot kon sin-o ang luyag magbuylog sa sini nga hilikuton, ang tanan nagtilindog. Makita sa ila ang “kainit kag kakugi bilang mga sumulunod ni Jesus,” kag nag-amba sila: “Ipalapnag ang imo kapawa kag kamatuoran, Ginuo.” “Daw ginauyog sadto ang mga kahoy, kag indi ko gid ini malipatan,” siling ni J. M. Norris.

Pagkatapos sang sesyon, inoras nga naglinya ang mga delegado para sa suskripsion. Ginpabutyag ni Mabel Philbrick ang balatyagon sang kalabanan: “Nalipay gid kami nga makapanghikot liwat!”

Mga 7,000 ka Estudyante sang Biblia ang handa sa pagbantala. Amo ini ang direksion sang flyer nga Organization Method kag sang bukleta nga To Whom the Work Is Entrusted (Ang Gintugyanan sang Hilikuton): Isa ka bag-o nga Service Department sa ulong talatapan ang magadumala sang hilikuton. Ang kada kongregasyon dapat magporma sing Komite sang Pag-alagad kag magtangdo sing direktor nga magapahibalo sang mga instruksion. Tungaon ang mga teritoryo sa tig-150 asta 200 ka balay. Hiwaton ang Miting sa Serbisyo kada Huebes sang gab-i para masaysay sang mga utod ang ila mga eksperiensia kag mahatag ang ila mga report sa pag-alagad.

“Pagpauli namon, nangin masako kami sa kampanya para sa suskripsion,” siling ni Herman Philbrick. Madamo ang interesado bisan diin. “Pagkatapos sang inaway kag mga kabudlayan, ginahandum sang tanan ang tion sang kasulhayan,” siling ni Beulah Covey. Si Arthur Claus nagsiling: “Daw indi makapati ang bilog nga kongregasyon sa kadamuon sang nagkuha sing suskripsion.” Pagligad sang duha ka bulan pagkatapos sang una nga isyu sang The Golden Age, halos tunga sa milyon ka kopya ang napanagtag, kag 50,000 ang nagkuha sing suskripsion.

Parte sa artikulo nga “Maayong Balita sang Ginharian,” sa Hulyo 1, 1920, nga isyu sang The Watch Tower, nagsiling si A. H. Macmillan nga amo ini ang una nga tion nga ang organisasyon nagpalig-on sa tanan nga kauturan sa bilog nga kalibutan nga ibantala ang Ginharian sang Dios. Ginpalig-on sini nga artikulo ang tanan nga hinaplas nga Cristiano nga “ipahibalo sa kalibutan nga malapit na ang ginharian sang langit.” Subong, ang mga utod sang Cristo, nga amo “ang gintugyanan sang hilikuton,” ginbuylugan sang minilyon ka makugi nga manugbantala nga nagahulat sang tion sang kasulhayan kon maggahom na ang Mesias.