Ang halad-gawad nga ginbayaran ni Jesus sang iya dugo amo lang ang paagi para mapatawad ang aton mga sala. (Efe. 1:7) Pero, ang Biblia nagasiling: “Nagpaumod ang Dios kag ginpatawad niya ang mga sala nga nahimo sang mga tawo sang una,” ukon nagapatawad na sia antes pa gin-aman ni Jesus ang gawad. (Roma 3:25) Paano makapatawad si Jehova kon wala pa maaman ang gawad? Kag paano niya ini mahimo nga wala ginalapas ang iya perpekto nga hustisya?

Para kay Jehova, sang nagpromisa sia nga magaaman sia sang “kaliwat” nga magaluwas sa katawhan nga magatuo sa Iya, daw pareho lang nga naaman na niya ang gawad. (Gen. 3:15; 22:18) Sigurado gid ang Dios nga sa iya gintalana nga tion, kinabubut-on nga ihatag sang Iya bugtong nga Anak ang iya kabuhi. (Gal. 4:4; Heb. 10:​7-10) Sang ari si Jesus sa duta, ginhatagan sia ni Jehova sing awtoridad nga magpatawad sang mga sala antes pa maaman ang gawad. Mapatawad ni Jesus ang mga sala sang mga nagatuo sa iya bangod kabalo sia nga matabunan ini sang halad-gawad nga himuon niya sa ulihi.​—Mat. 9:​2-6.