Ang pila ka utod nagagamit sang mga messaging app para magkomunikar sa mga miembro sang ila pamilya kag sa mga kauturan. Pero dapat dumdumon sang hamtong nga Cristiano ini nga paandam: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”—Hulu. 27:12.

Nahangpan naton nga gusto kita amligan ni Jehova. Gani wala kita nagapakig-upod sa mga tawo nga gusto mabahinbahin ang kongregasyon, sa mga na-disfellowship, ukon sa mga nagatudlo sang sala nga mga pagpati. (Roma 16:17; 1 Cor. 5:11; 2 Juan 10, 11) May pila ka utod ukon indibiduwal sa kongregasyon nga posible wala nagatuman sa mga kasuguan sang Biblia. (2 Tim. 2:20, 21) Dapat naton ini dumdumon kon nagapili kita sang aton mga abyan. Pero indi mahapos ang pagpili sang maayo nga mga kaupdanan kon nagagamit kita sang mga app.

May mga app nga puede ka makapadala kag makabaton sang message sa mga grupo nga madamo sang miembro. Importante gid nga maghalong kita kon nagagamit kita sini. Ang iban nga utod nag-entra sa mga grupo nga madamo sang miembro, kag indi gid maayo ang resulta. Makahalong ka gid man bala kon may ginatos ukon linibo ka miembro ang isa ka grupo? Imposible nga makilala kon sin-o gid ang kada isa nga ara sa grupo kag mabal-an ang ila espirituwalidad. Ang Salmo 26:4 nagasiling: “Wala ako nagapakig-upod sa madaya nga mga tawo, kag ginalikawan ko ang mga nagapakunokuno.” Ginapahangop sini nga mas maayo nga magkomunikar lang kita sa mga kilala naton.

Bisan pa diutay lang ang miembro sang isa ka grupo, dapat man kita gihapon maghalong. Dapat naton usisaon ang topiko nga ginaistoryahan sang grupo, kag kon daw ano kadamo nga tion ang ginagamit naton sa pagpadala kag pagbasa sang mga message. Indi kinahanglan nga mag-reply gid kita ukon mag-react sa tanan nga message kay basi maubos na ang aton tion. Ginpaandaman ni Pablo si Timoteo parte sa ‘mga kutsokutsera kag mga hilabtera sa kabuhi sang iban.’ (1 Tim. 5:13) Subong, may amo gihapon sini nga mga tawo kag ginagamit nila ang mga messaging app.

Indi gid pagpakalainon sang isa ka hamtong nga utod ang iya mga kauturan, kag indi man niya pagsapakon ang negatibo nga mga komento parte sa ila. Indi man niya pag-ipanugidsugid ang kompidensial nga mga impormasyon, kag indi niya pagsapakon kon sia naman ang ginsugiran sang kompidensial nga mga butang. (Sal. 15:3; Hulu. 20:19) Kag indi niya pagsapakon ukon ipasa ang daw tumalagsahon nga mga istorya ukon mga report nga indi sia sigurado kon bala matuod ini. (Efe. 4:25) Pero masaligan gid naton ang nabase sa Biblia nga mga impormasyon kag mga report nga ara sa aton website nga jw.org kag ara sa mga programa sa JW Broadcasting^®.

May pila ka utod nga nagagamit sang mga messaging app para magbaligya, magbakal, kag magpasayod sang mga produkto ukon magtanyag sang obra. Pero dapat naton siguraduhon nga wala naton ginaentrahan sang negosyo ang aton pag-alagad kay Jehova. Kon gusto sang isa ka Cristiano nga mangin “hilway [sia] sa gugma sa kuarta,” indi gid niya paghingalitan ang kahigayunan nga makakuarta sia paagi sa mga kauturan.—Heb. 13:5.

Puede bala gamiton ang mga messaging app para mangayo sang kuarta nga ihatag sa mga kauturan nga nagakinahanglan sang bulig ukon nahalitan sang kalamidad? Palangga naton ang aton mga kauturan kag gusto naton sila buligan kag palig-unon. (Sant. 2:15, 16) Pero kon himuon naton ini paagi sa pagpadala sang message sa mga grupo nga madamo sang miembro, posible nga makasablag kita sa maayo nga kahimusan nga ginahimo sang branch office ukon sang kongregasyon. (1 Tim. 5:3, 4, 9, 10, 16) Kag indi naton gusto nga pamensaron sang iban nga daw ginhatagan kita sang pinasahi nga responsibilidad para buligan ang mga kauturan.

Gusto naton nga mahimaya ang Dios sa tanan naton nga ginahimo. (1 Cor. 10:31) Gani kon nagagamit ka sang mga messaging app, binagbinaga ang mga katalagman, kag dapat ka maghalong.