IKAW GID MAN BALA ANG MAGADESISYON KON ANO ANG IMO MANGIN PALAABUTON? Ang pila ka tawo nagapati nga ang kapalaran, indi personal nga desisyon, amo ang nagakontrol sa ila kabuhi. Kon indi nila malab-ot ang ila handum, nagasiling sila nga wala na sila sing mahimo. “Indi gid ’na siguro para sa akon!” siling nila.

Ang iban nadulaan sing paglaum sang nakita nila nga wala na sing solusyon ang pagpamigos kag inhustisya sa kalibutan. Gintinguhaan nila nga mangin maayo ang ila kabuhi—pero sulitsulit ini nga ginaguba sang inaway, krimen, kalamidad, kag balatian. ‘Ngaa mabalaka pa?’ pamangkot nila.

Matuod, ang mga hitabo sa kabuhi mahimo makaapektar sa imo mga plano. (Manugwali 9:11) Pero ikaw ang magadesisyon kon ano ang gusto mo nga matabo sa imo palaabuton. Ang matuod, ginasugid sang Biblia nga ang imo palaabuton nagadepende sa imo desisyon. Binagbinaga ang ginasiling sini.

Si Moises, nga lider sang pungsod sang Israel sang una, nagsiling sa mga tawo antes sila magsulod sa Ginsaad nga Duta: “Ginabutang ko sa inyo atubangan ang kabuhi kag ang kamatayon, ang pagpakamaayo kag ang pagpakamalaut; pilia ninyo ang kabuhi agod magkabuhi kamo kag ang inyo mga kaliwat, paagi sa paghigugma kay Jehova nga inyo Dios, sa pagpamati sa iya, kag sa pag-unong sa iya.”—Deuteronomio 30:15, 19, 20.

“Ginabutang ko sa inyo atubangan ang kabuhi kag ang kamatayon, ang pagpakamaayo kag ang pagpakamalaut; pilia ninyo ang kabuhi.” —Deuteronomio 30:19

Huo! Ginhilway sang Dios ang mga Israelinhon sa pagkaulipon sa Egipto kag ginhatagan sila sing kahigayunan nga magkabuhi sing hilway kag malipayon sa Ginsaad nga Duta. Pero indi awtomatiko nga mabaton nila ina. Para mabaton ina nga pagpakamaayo, dapat nila ‘pilion ang kabuhi.’ Paano? ‘Paagi sa paghigugma sa Dios, pagpamati sa iya, kag pag-unong sa iya.’

Subong, dapat man kita magpili, kag magadepende sa aton desisyon kon ano ang aton palaabuton. Kon pilion naton nga palanggaon ang Dios, mamati sa iya tingog, kag magpabilin nga suod sa iya, ginapili naton ang kabuhi—kabuhi nga wala sing katapusan sa paraiso nga duta. Pero ano ang nalakip sa kada isa sini nga mga tikang?

Ang gugma amo ang panguna nga kinaiya sang Dios. “Ang Dios gugma,” sulat ni apostol Juan. (1 Juan 4:8) Amo nga sang ginpamangkot si Jesus kon ano ang pinakaimportante nga sugo, nagsiling sia: “Higugmaa si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna.” (Mateo 22:37) Ang matuod nga kaangtanan kay Jehova nga Dios dapat nabase sa gugma, indi sa kahadlok ukon sa basta lang nga pagtuman sa iya. Pero, ngaa dapat naton pilion nga palanggaon sia?

Ang pagpalangga ni Jehova sa mga tawo mapaanggid sa pagpalangga sang mga ginikanan sa ila kabataan. Bisan pa indi perpekto, ang mahigugmaon nga mga ginikanan nagatudlo, nagapalig-on, nagabulig, kag nagadisiplina sa ila kabataan bangod gusto nila nga magmalipayon sila kag magmadinalag-on. Ano ang handum sang mga ginikanan? Gusto nila nga palanggaon sila sang ila kabataan kag tumanon ang gintudlo nila sa ila para sa ila kaayuhan. Indi bala nagakaigo man nga magpaabot ang aton perpekto nga Amay sa langit nga palanggaon naton sia bangod sa ginhimo niya para sa aton?

Sa orihinal nga lenguahe sang Biblia, ang tinaga nga “pamatii” nagakahulugan man sing “pagtuman.” Indi bala amo ina ang rason kon ngaa nagasiling kita sa mga bata nga, “Pamatii ang inyo ginikanan”? Gani, ang pagpamati sa tingog sang Dios nagapahangop nga tun-an naton kag tumanon ang iya ginasiling. Bangod indi naton literal nga mabatian ang tingog sang Dios, ginapamatian naton sia paagi sa pagbasa kag pag-aplikar sang iya Pulong, ang Biblia.—1 Juan 5:3.

Para ipakita nga importante gid ang pagpamati sa tingog sang Dios, isa ka bes nagsiling si Jesus: “Ang tawo indi sa tinapay lamang mabuhi kundi sa tagsa ka pulong nga nagagua sa baba ni Jehova.” (Mateo 4:4) Importante sa aton ang pagkaon, pero mas importante ang pagkuha sang ihibalo parte sa Dios. Ngaa? Ang maalam nga si Hari Solomon nagpaathag: “Ang kaalam pangamlig kaangay sang kuarta apang ang bentaha sang kaalam amo nga makatipig ini nga buhi sa tawo nga may yara sini.” (Manugwali 7:12) Ang ihibalo kag kaalam halin sa Dios makaamlig sa aton subong kag makabulig sa aton nga makahimo sang husto nga desisyon nga nagaresulta sa kabuhi nga wala sing katapusan sa palaabuton.

Dumduma ang ilustrasyon ni Jesus nga ginsambit sa artikulo antes sini, sia nagsiling: “Makitid ang gawang kag mabudlay ang dalan nga nagapadulong sa kabuhi, kag pila lamang ang nakatultol sini.” (Mateo 7:13, 14) Sa paglakat sa sina nga dalan, makabenepisyo gid kita kon may eksperto kita nga upod nga magagiya sa aton pakadto sa aton kaladtuan—ang kabuhi nga wala sing katapusan. Gani, may maayo gid kita nga rason nga magpabilin nga suod sa Dios. (Salmo 16:8) Pero paano naton ina mahimo?

Kada adlaw, madamo kita sang dapat himuon kag gusto pa himuon. Bangod sina, mahimo nga diutay na lang ukon wala na gid kita sing tion para pamensaron ang gusto sang Dios nga himuon naton. Amo nga ginapahanumdom kita sang Biblia: “Padayon nga bantayi sing maayo nga ang inyo paglakat indi kaangay sang indi maalam kundi sang maalam nga mga tawo, nga nagagamit sing maayo sang inyo tion, bangod ang mga adlaw malaut.” (Efeso 5:15, 16) Makapabilin kita nga suod sa Dios kon mangin pinakaimportante sa aton kabuhi ang aton kaangtanan sa iya.—Mateo 6:33.

Indi mo na mabag-o ang imo nagligad, pero may mahimo ka para mangin maayo ang imo palaabuton kag sang imo mga pinalangga. Ginasugid sang Biblia nga palangga gid kita sang aton Amay sa langit, si Jehova nga Dios, kag ginasugid niya kon ano ang gusto niya nga himuon naton. Talupangda ang ginsiling ni propeta Miqueas:

“O tawo, ginsiling niya sa imo kon ano ang maayo. Kag ano ang ginapatuman sa imo ni Jehova? Amo ang pagpakita sing hustisya, ang paghigugma sa pagkamainunungon, kag ang paglakat sing maugdang upod sa imo Dios!”—Miqueas 6:8.

Batunon mo bala ang pangagda ni Jehova nga maglakat upod sa iya para matigayon ang wala sing katapusan nga pagpakamaayo para sa mga nagahimo sini? Ikaw ang magadesisyon!