Husto kag Sala: Ang Biblia—Isa ka Masaligan nga Giya
Indi kita makasigurado kon mangin maayo ang resulta sang aton mga desisyon sa moral kon ibase lang naton ini sa aton ginabatyag ukon sa ginabatyag sang iban. Ginasugid sang Biblia ang rason kon ngaa, kag may ginasugid pa gid ini. Ginabuligan kita sini nga mahibaluan kon ano ang husto kag sala, para mangin malipayon ang aton kabuhi.
KINAHANGLAN NATON ANG GIYA HALIN SA DIOS
Sa Biblia, si Jehova a nga Dios nagsiling nga kinahanglan sang mga tawo ang iya bulig, kag indi nila mahimo ang tanan sa ila lang kaugalingon. (Jeremias 10:23) Gani naghatag sia sang mga kasuguan sa moral nga mabasa sa Biblia. Palangga niya ang mga tawo kag indi niya gusto nga makahimo kita sang malain nga mga desisyon nga makasakit sa aton kag magpabudlay sa aton kabuhi. (Deuteronomio 5:29; 1 Juan 4:8) Dugang pa, bilang aton Manunuga, may kaalam sia kag ihibalo para maghatag sa aton sang pinakamaayo nga laygay. (Salmo 100:3; 104:24) Pero, wala ginapilit sang Dios ang mga tawo nga sundon ang iya mga kasuguan.
Ginhatagan ni Jehova ang una nga lalaki kag babayi, nga si Adan kag Eva, sang tanan nila nga kinahanglanon para mangin malipayon sila. (Genesis 1:28, 29; 2:8, 15) Ginhatagan man niya sila sang simple nga mga instruksion kag ginpaabot niya nga tumanon nila ini. Pero, sila ang ginpadesisyon niya kon tumanon nila ini nga mga instruksion ukon indi. (Genesis 2:9, 16, 17) Kasubo gid kay ginpili ni Adan kag Eva nga sundon ang ila gusto imbes ang mga kasuguan sang Dios. (Genesis 3:6) Ano ang resulta? Nangin malipayon bala ang mga tawo kay ginhimo nila ang sa pensar nila nga husto? Wala. Ginapamatud-an sang kasaysayan nga kon balewalaon naton ang mga kasuguan sang Dios, indi ini magresulta sa permanente nga paghidait kag kalipay.—Manugwali 8:9.
Ang Biblia nagahatag sa aton sang giya para makahimo kita sang maayo nga mga desisyon nga makabulig sa aton bisan ano man ang aton ginhalinan. (2 Timoteo 3:16, 17; tan-awa ang kahon nga “ Isa ka Libro Para sa Tanan nga Tawo.”) Hibalua kon paano ini ginahimo sang Biblia.
Tun-i pa gid kon ngaa ang Biblia dapat tawgon nga “pulong sang Dios.”—1 Tesalonica 2:13. Tan-awa ang video nga Sin-o ang Awtor sang Biblia? sa jw.org.
GINASUGID SANG BIBLIA KON ANO ANG GUSTO SANG DIOS NGA HIMUON NATON
Ginasugid sang Biblia sa aton ang mga ginhimo kag ginhambal ni Jehova sa mga tawo halin pa sadto. Ginabuligan kita sini nga maintiendihan kon ano ang husto kag sala ukon ang mapuslanon kag makahalit sa pagtan-aw sang Dios. (Salmo 19:7, 11) Ang mga leksion nga aton matun-an wala gid nagadaan kag makabulig gid sa aton nga makahimo sang maayo nga mga desisyon sa aton kabuhi kada adlaw.
Halimbawa, binagbinaga ang laygay sa Hulubaton 13:20: “Ang tawo nga nagaupod sa maalamon mangin maalamon man, apang ang tawo nga nagaupod sa mga buangbuang mapahamak.” Ini nga prinsipio nakabulig sa mga tawo sang una kag makabulig man ini sa aton subong. Ang Biblia puno gid sang makabulig kag importante nga mga prinsipio pareho sini.—Tan-awa ang kahon nga “ Ang Wala Nagadaan nga Kaalam sang Biblia.”
Pero basi mamangkot ka, ‘Ngaa makasigurado ako nga makabulig gid sa akon subong ang laygay sang Biblia?’ Binagbinagon sa masunod nga artikulo ang pila ka matuod gid nga mga halimbawa.
a Si Jehova ang personal nga ngalan sang Dios.—Salmo 83:18.
