“PIRME kami nagabaisay parte sa kuarta,” siling ni Sarah * nga taga-Ghana, nga 17 ka tuig na nga kasal kay Jacob. Nagpaathag sia: “Naakig ako kay halos ako ang nagaatipan sang pamilya kag wala gid ako ginaistorya ni Jacob parte sa kuarta. Sinemana kami nga wala nagaistoryahanay.”

“Huo,” siling sang iya bana nga si Jacob, “may mga tion nga nagabaisay kami. Sa masami, bangod ini sa amon indi paghangpanay kag indi maayo nga komunikasyon. Kag kon kaisa sobra ang amon reaksion sa mga kahimtangan.”

Ang bag-ong kasal nga si Nathan nga taga-India nagsugid sang natabo sang isa ka bes ginsinggitan sang iya ugangan nga lalaki ang iya ugangan nga babayi. “Naglain ang iya buot,” siling niya, “kag nagua sa balay. Sang ginpamangkot ko sia kon ngaa nagsinggit sia, pamatyag niya ginainsulto ko sia kay umagad lang niya ako. Wala madugay, ginasinggitan na niya kami tanan.”

Ayhan naobserbahan mo man nga ang paghambal sing indi maayo nga mga tinaga sa indi nagakaigo nga tion makatuga sing kagamo sa pamilya. Ang kalmado nga pagbayluhanay sing mga panghunahuna sa primero, mahimo nga gulpi lang magdangat sa pagbaisay. Wala sing isa sa aton ang makahambal pirme sing husto, gani madali naton masal-an ang ginahambal sang iban ukon duhaduhaan ang ila mga motibo. Pero posible gihapon nga matigayon ang kalinong kag paghangpanay.

Ano ang himuon mo kon matabo ang grabe nga pagbaisay? Ano ang imo himuon agod mapasag-uli ang maayo nga pagtamdanay kag kalinong sa pamilya? Paano mahuptan sang mga pamilya ang maayo nga pagtamdanay sa puluy-an? Palihug padayuna ang pagbasa.