SANG siete anyos si Susan, namangkot sia parte sa Dios sang naospital ang iya nuebe anyos nga amigo nga si Al bangod sang polio kag ginbutang sa aparato nga iron lung. Ginsulat niya ang iya eksperiensia sa Enero 6, 2013, nga isyu sang The New York Times.

Sa tapos mabisitahan si Al sa ospital, ginpamangkot ni Susan ang iya iloy: “Ngaa ginhimo ini sang Dios sa isa ka bata?”

“Siling sang pari may mga rason ang Dios sa paghimo sini,” sabat sang iya iloy, “pero wala ako kabalo kon ano ini.”

Pagligad sang duha ka tuig, sang 1954, natigayon na ang bakuna sa polio nga naimbento ni Jonas Salk, kag nagsiling ang iloy ni Susan nga ayhan gingiyahan sang Dios ang iya research.

“Kuntani gingiyahan na sang Dios ang mga doktor sang una pa agod wala na mabutang sa iron lung si Al,” sabat ni Susan.

Ginsumaryo ni Susan ang iya eksperiensia sang bata pa sia paagi sa pagsulat: “Napatay [si Al] pagligad sang walo ka tuig, kag sadto nga tion isa na ako ka atiesta kag indi na mabag-o ang akon pensar.”

Pareho ni Susan, madamo nga tawo ang nagaantos bangod sa trahedya ukon nakasaksi sa sini ang wala nakasapo sing mga sabat sa ila mga pamangkot parte sa Dios. Ang pila nangin atiesta. Ang iban mahimo nga wala man nagapanghiwala nga may Dios, pero nagaduhaduha sila.

Indi buot silingon nga ang mga atiesta kag ang mga nagaduhaduha indi gid pamilyar sa relihion. Kundi sa masami bangod sang ila eksperiensia sa relihion, wala na sila magtuo sa Dios. Nagapati sila nga ang organisado nga relihion napaslawan sa pagsabat sang importante nga mga pamangkot sa kabuhi. Ano nga mga pamangkot? Makahalam-ot nga pareho man ini sa mga pamangkot sang mga tawo nga nagapangangkon nga nagatuo sa Dios. Binagbinaga ang tatlo ka pamangkot nga gusto ipamangkot sang mga tawo sa Dios, kag ang mga sabat sang Biblia.

Ngaa ginapamangkot ini?

‘Ang mahigugmaon nga Dios makapugong sang mga trahedya,’ siling sang madamo.

BINAGBINAGA INI: Mahimo nga mamag-uhan ka sa mga kinabatasan kag kustombre sang mga tawo nga lain ang kultura—ayhan makibot ka pa gani. Posible nga lain ang aton pag-intiende sa ila mga ginahimo. Halimbawa, sa isa ka kultura, ang mga tawo nagapati nga ang pagtulok sa mata sang kaistorya tanda sang pagkasinsero; sa iban naman indi ini pagrespeto. Apang diin man sa sini, indi kita makasiling nga sala ini. Kundi, kinahanglan lang naton makilala sila sing maayo.

Pareho man bala ini kon parte sa paghangop sa Dios? Madamo ang nagapati nga ang pag-antos pamatuod nga wala sing Dios. Apang ang iban nga nakahangop kon ngaa ginatugutan sang Dios ang pag-antos, nagapati gid nga nagaluntad sia.

ANG GINASILING SANG BIBLIA: Ang panghunahuna kag dalanon sang Dios lain gid sangsa aton. (Isaias 55:8, 9) Bangod sina, ang iya mga ginahimo, subong man ang iya mga rason sa paghulat antes sia maghulag, mahimo nga daw indi naton mahangpan sa primero.

Pero wala nagasiling ang Biblia nga batunon naton ang mga hambalanon subong sang “misteryoso gid ang Dios.” Sa baylo, nagapalig-on ini sa aton nga magtuon pa gid parte sa Dios, kag nagabulig ini sa aton nga mahangpan kon ngaa kag kon san-o sia nagahulag. * Mahimo pa gani kita mangin suod sa iya.—Santiago 4:8.

Ngaa ginapamangkot ini?

‘Kon ginapabaloran sang Dios ang pagkasinsero, wala kuntani nagapakunokuno ang mga nagasimba sa iya,’ rason sang pila.

BINAGBINAGA INI: Hunahunaa ang isa ka bata nga nagsikway sa maayo nga pagpadaku sang iya amay kag nagbiya sa ila balay kag nagtinonto. Bisan pa indi kuntani gusto sang amay, gintugutan niya nga magdesisyon ang iya bata. Ang mga makakita bala sa bata sa ulihi husto gid sa pagsiling nga malain ang iya amay ukon basi wala sia sing amay? Siempre indi! Sing kaanggid, ang pagpakunokuno sa relihion nagapamatuod lang nga ginatugutan sang Dios ang mga tawo nga magdesisyon sa ila kabuhi.

ANG GINASILING SANG BIBLIA: Ginadumtan sang Dios ang pagpakunokuno sa relihion. (Jeremias 7:29-31; 32:35) Ginatugutan man niya ang mga tawo nga magdesisyon sa ila kaugalingon. Madamo sang nagasiling nga nagatuo sa Dios ang nagasunod sa ginhimo sang tawo nga mga panudlo sa relihion kag sa ila kaugalingon nga mga talaksan sa moralidad.—Mateo 15:7-9.

Sa kabaliskaran, ang relihion nga ginakahamut-an sang Dios wala nagapakunokuno. * Nagsiling si Jesus: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:35) Ini nga gugma “dapat indi salimpapaw” ukon nagapakunokuno. (Roma 12:9) Napaslawan ang kalabanan nga relihion sa pagsunod sini nga talaksan. Halimbawa, sang 1994 nga pagpamatay sing rasa sa Rwanda, linibo ka relihioso nga mga tawo ang nagpatay sa pareho nila sing pagtuo bangod lamang lain ang tribo sina nga mga tawo. Sa kabaliskaran, ang mga Saksi ni Jehova wala nakigbahin sa pagpamatay, kag madamo sa ila ang nag-amlig sa ila mga masigkatumuluo kag sa iban, nga ginarisgo pa gani nila ang ila kabuhi sa paghimo sini. Ini nga mga pagsakripisyo nagapamatuod nga posible ang relihion nga wala sing pagpakunokuno.

Ngaa ginapamangkot ini?

Mahimo mamangkot ang pila: ‘Ngaa ang mga tawo nagakabuhi lang sing 80 ukon 90 anyos kag dayon mapatay? Ano ang katuyuan sinang malip-ot nga kabuhi?’

BINAGBINAGA INI: Ang madamo nga wala nagapati sa Dios nagabaton gihapon nga dapat may rason sa sining komplikado, masibod, kag mahim-ong nga kinaugali. Nahangpan nila nga ang aton planeta, ang iban nga planeta kag ang bulan naplastar sing maayo agod masuportahan ang kabuhi sa duta. Ginalaragway nila ang kinaugali nga mga kasuguan nga nagakontrol sa uniberso subong sibu gid, kag nabagay sing eksakto amo nga kon may pagbag-o sa sini bisan gamay lang, indi na maistaran ang duta.

ANG GINASILING SANG BIBLIA: Madamo nga tawo ang nagapati nga ang aton malip-ot nga kabuhi pamatuod nga wala sang Dios, apang ang kinaugali nga mga butang sa kalibutan nagahatag sing madamo nga pamatuod nga may Manunuga. (Roma 1:20) May katuyuan sia sa paghimo sini nga mga butang, kag ang rason sang aton pagkabuhi may kahilabtanan sa iya katuyuan. Gintuga sang Dios ang mga tawo agod magkabuhi sa wala sing katubtuban sa duta, kag tumanon gid niya ang iya katuyuan.—Salmo 37:11, 29; Isaias 55:11.

Mahangpan naton ang pagluntad sang Dios kag bisan ang pila niya ka kinaiya paagi sa kinaugali nga mga butang sa kalibutan, apang wala niya gintuyo nga mahangpan naton ang iya katuyuan sa sina nga paagi. Agod mahibaluan naton ang katuyuan sang Dios kag ang katuyuan sang aton pagkabuhi, kinahanglan makigkomunikar ang Dios sa aton. Nagapakigkomunikar sia sa aton paagi sa Biblia, nga nagagamit sing simple kag direkta nga mga pinamulong. * Ginaagda ka sang mga Saksi ni Jehova nga usisaon ang mga sabat nga mabasa sa Biblia.