ANG GINASILING SANG MGA TAWO

Madamo ang nagasiling, pati na ang relihioso nga mga tawo, nga ang kasingki makatarunganon nga reaksion kon ginapaakig ka. Kag minilyon ang nagakabig nga ang kasingki sa mga programa sa telebisyon kag mga pelikula maayo nga kalingawan.

ANG GINASILING SANG BIBLIA

Malapit sa siudad sang Mosul, sa naaminhan sang Iraq, makita ang kagulub-an sang isa anay ka daku nga siudad—ang Ninive, ang kapital sang dumaan nga Emperyo sang Asiria. Sang mainuswagon pa ini nga siudad, gintagna sang Biblia nga ‘hapayon sang Dios ang Ninive.’ (Sofonias 2:13) “Tulukon ka sang iban kag yagutaon,” siling sang Dios. Ngaa? Bangod ang Ninive ‘isa ka siudad nga nagapaagay sang dugo.’ (Nahum 1:1; 3:1, 6) Kag “ginakangil-aran ni Jehova ang mga mapintas,” siling sang Salmo 5:6. Ang kagulub-an sang Ninive nagapamatuod nga gintuman sang Dios ang iya ginsiling.

Ang kasingki ginsugdan sang panguna nga kaaway sang Dios kag tawo—si Satanas nga Yawa, nga gintawag ni Jesucristo nga “manugpatay.” (Juan 8:44) Isa pa, bangod “ang bug-os nga kalibutan yara sa gahom sang isa nga malauton,” ang iya mga kinaiya makita sa pagtamod sang madamo sa kasingki, lakip na sa pagkahuyog sang kalibutan sa masingki nga mga programa sa telebisyon kag mga pelikula. (1 Juan 5:19) Agod mapahamut-an ang Dios, dapat naton dumtan ang kasingki kag higugmaon ang ginahigugma sang Dios. * Posible bala ina?

“Ginadumtan [ni Jehova] ang nagahigugma sa kasingki.”—Salmo 11:5.

ANG GINASILING SANG MGA TAWO

Ang kasingki duna na sa tawo, kag indi na ini mabag-o.

ANG GINASILING SANG BIBLIA

Isikway ang “kasingkal, kaakig, kalainan, masakit nga hambal, kag paghambal sing binastos.” Nagsiling man ini: “Ubaha ninyo ang daan nga personalidad upod ang mga buhat sini, kag isuksok ninyo ang bag-o nga personalidad.” (Colosas 3:8-10) Sobra bala ang ginapatuman sang Dios sa aton? Indi. Mahimo magbag-o ang mga tawo. * Paano?

Ang una nga tikang amo ang pagkuha sang sibu nga ihibalo tuhoy sa Dios. (Colosas 3:10) Kon ang isa ka tawo nga mabinatunon makatuon parte sa makagalanyat nga mga kinaiya  kag mga talaksan sang aton Manunuga, mabuyok sia nga higugmaon kag pahamut-an ang Dios.—1 Juan 5:3.

Ang ikaduha nga tikang may kaangtanan sa aton pagpili sing mga kaupdanan. “Indi ka makig-upod sa tawo nga madali maakig, kag indi ka makig-angot sa tawo nga maakigon, agod indi ka mangin pareho sa iya kag masiod mo ang imo kaugalingon.”—Hulubaton 22:24, 25.

Ang ikatlo nga tikang nagadalahig sa paghantop. Hantupa kon ano gid ang pagkahuyog sa kasingki—isa ka serioso nga kaluyahon nga nagapakita sing kakulang sa pagpugong sa kaugalingon. Samtang ang pagkamahidaiton naman nagapakita sing kabakod. “Ang tawo nga indi dali maakig mas maayo sangsa makusog nga tawo,” siling sang Hulubaton 16:32.

“Tinguhai ninyo ang pagpakighidait sa tanan nga tawo.”—Hebreo 12:14.

ANG GINASILING SANG MGA TAWO

Ang kasingki duna na nga yara sa aton kag indi na ini madula.

ANG GINASILING SANG BIBLIA

“Sa indi na lang madugay, madula na ang mga malauton . . . Apang ang mga mahagop magapanubli sang duta, kag mangin malipayon gid sila sa bugana nga paghidait.” (Salmo 37:10, 11) Agod maluwas ang mga mahagop kag mahidaiton, himuon sang Dios sa mga nagahigugma sa kasingki ang ginhimo niya sadto sa dumaan nga Ninive. Sa tapos sini, ang kasingki indi na gid magtublag sa duta!—Salmo 72:7.

Gani, karon na ang tion nga tinguhaan ang kahamuot sang Dios paagi sa pagpalambo sing mahidaiton nga panimuot. Ang 2 Pedro 3:9 nagasiling: “Mapailubon [si Jehova] sa inyo bangod indi niya luyag nga ang bisan sin-o malaglag kundi luyag niya nga ang tanan mahatagan sang kahigayunan nga maghinulsol.”

“Salsalon nila ang ila mga espada nga mangin mga punta sang arado kag ang ila mga bangkaw nga mangin mga garab nga inughagbas”—Isaias 2:4.