ANG GINASILING SANG MGA TAWO

Madamo nga tawo ang nagatamod sa pagsugal subong indi makahalalit nga kalingawan, basta legal lang ini. Ang iban nga porma sang legal nga sugal, subong sang mga loterya nga iya sang gobierno, nagahatag sing daku nga pundo sa mga programa nga nagahatag sing kaayuhan sa publiko.

ANG GINASILING SANG BIBLIA

Wala ginasambit sa Biblia ang sugal. Pero, nagahatag ini sing pila ka prinsipio nga nagapakita kon ano ang pagtamod sang Dios sa pagsugal.

Ang katuyuan sang pagsugal nga amo ang pagkabi sa kuarta sang iban wala nagahisanto sa paandam sang Biblia nga ‘mag-andam sa tanan nga sahi sang kakagod.’ (Lucas 12:15) Ang kakagod amo ang nagapabaskog sang handum sa pagsugal. Ginapasayod sang mga institusyon sang sugal ang dalagku nga mga jackpot, pero indi sila bunayag sa tsansa sang mga tawo sa pagdaug. Ginahimo nila ini bangod nahibaluan nila nga ang handum nga makamanggad nagatiklod sa mga tawo sa pagpusta sing daku nga kantidad sa mga casino. Sa baylo nga buligan ang tawo nga batuan ang kakagod, ginapabaskog sang pagsugal ang handum nga makakuarta dayon.

Maiyaiyahon ang motibo sang pagsugal: ang pagdaug sa kuarta nga napierde sang iban. Pero ginalaygayan sang Biblia ang mga tawo nga “indi dapat maghunahuna sang iya kaugalingon nga kaayuhan, kundi sang kaayuhan sang iban.” (1 Corinto 10:24) Kag ang isa sa Napulo ka Sugo nagasiling: “Indi kamo magkaibog sa . . . bisan ano nga ginapanag-iyahan sang inyo isigkatawo.” (Exodo 20:17) Kon ginahandum sang isa ka tawo nga magdaug, daw pareho lang nga nagalaum sia nga mapierde ang iban agod makuha niya ang ila kuarta.

Nagapaandam man ang Biblia batok sa pagtamod sa suerte subong isa ka makatalanhaga nga puersa nga makahatag sing mga pagpakamaayo. Sa dumaan nga Israel anay, may mga tawo nga wala sing pagtuo sa Dios kag ‘naghanda sila sing lamesa para sa dios sang Suerte.’ Ginkahamut-an bala sang Dios ini nga debosyon sa “dios sang Suerte”? Wala, kay nagsiling sia sa ila: “Padayon ninyo nga ginahimo ang malain sa akon panulok, kag ginpili ninyo ang mga butang nga wala ko ginkahamut-an.”—Isaias 65:11, 12.

Matuod, sa pila ka bahin sang kalibutan, ang mga pundo nga halin sa legal nga sugal ginagamit sa edukasyon, pag-uswag sang ekonomiya, kag iban nga pangpubliko nga mga programa. Pero ang paggamit sini nga mga pundo wala nagabag-o sang kamatuoran kon paano ini natigayon—paagi sa mga buhat nga labi pa nga nagapadugang sang kakagod kag nagasuportar sang ideya nga kuhaon ang isa ka butang sing pahapos lang.

“Indi kamo magkaibog . . . sa bisan ano nga ginapanag-iyahan sang inyo isigkatawo.”—Exodo 20:17.

ANG GINASILING SANG BIBLIA

Ang Biblia nagapaandam sa aton nga “ang mga determinado nga mangin manggaranon nagakahulog sa pagsulay kag sa siod kag sa madamo nga binuang kag makahalalit nga handum nga nagatugdang sang mga tawo sa kalaglagan kag kapahamakan.” (1 Timoteo 6:9) Ang kakagod amo gid ang rason nga nagasugal ang isa ka tawo kag nagapalain ini sa iya, amo kon ngaa ginlista sang Biblia ang “kakagod” subong isa sa mga batasan nga dapat gid likawan.—Efeso 5:3.

Bangod ginahingamo sini ang manggad sing pahapos, ginapadaku sang pagsugal ang gugma sa kuarta, nga suno sa Biblia amo “ang gamot sang tanan nga sahi sang makahalalit nga butang.” Ang handum nga makakuarta mahimo mangin mabaskog nga puersa sa kabuhi sang isa ka tawo, nga ginabangdan sang tuman nga kabalaka kag makahalit sang iya pagtuo sa Dios. Ginlaragway sang Biblia nga ang mga tawo nga nasiod sang gugma sa kuarta “nagbuno sang ila kaugalingon sang madamo nga kasakit.”—1 Timoteo 6:10.

Ang mga tawo nga makagod indi kontento, gani indi sila malipayon. “Ang nagahigugma sa pilak indi maayawan sa pilak, kag ang nagahigugma sa manggad indi makontento sa kinitaan.”—Manugwali 5:10.

Minilyon ka tawo nga naganyat sa pagsugal ang nangin adik sa sini. Lapnag ini nga problema, kay sa Estados Unidos lamang, ginabulubanta nga minilyon ang naadik sa sugal.

Ang isa ka hulubaton nagasiling: “Ang palanublion nga sa umpisa nakuha sa makagod nga paagi indi mangin pagpakamaayo sa ulihi.” (Hulubaton 20:21) Ang mga adik sa sugal nalubong sa utang ukon naputo kag madamo sa ila ang nadulaan sang obra kag mga abyan, kag naguba ang ila pag-asawahay. Kon iaplikar sang isa ka tawo ang mga prinsipio sang Biblia, mabuligan sia nga malikawan ang malain nga epekto sang pagsugal kag mangin malipayon.

“Ang mga determinado nga mangin manggaranon nagakahulog sa pagsulay kag sa siod kag sa madamo nga binuang kag makahalalit nga handum nga nagatugdang sang mga tawo sa kalaglagan kag kapahamakan.” —1 Timoteo 6:9.