Ginapasanyog sang Biblia ang husto nga pagtamod sa kadalag-an. Wala sini ginatudlo nga pila lang ang magamadinalag-on. Wala man sini ginasakdag ang pagtamod nga mabasa sa pila ka libro nga kon ‘sundon mo lang ang imo mga handum,’ ang tanan nga luyag mo matuman. Ini nga pagtamod​—nga masami nga ginatudlo sa kabataan—mahimo magaresulta lang sa kapaslawan.

Ang matuod nga kadalag-an mahimo matigayon sang tanan​—pero nagakinahanglan ini sing panikasog. Binagbinaga ang masunod nga mga prinsipio.

• ANG GINASILING SANG BIBLIA:

  “Ang nagahigugma sang pilak indi mabusug sang pilak; bisan ang nagahigugma sang kabuganaan, sing patubas.”​—Manugwali 5:10.

  ANO ANG BUOT SILINGON SINI? Ang materyalistiko nga pagkabuhi indi makahatag sing matuod nga kalipay. Sa baylo, kabaliskaran ang resulta sini. “Ang mga tawo nga ang panguna nga ginatinguhaan amo ang kuarta mas nabalaka kag indi malipayon sangsa mga tawo nga ang ginapabaloran amo ang maayo nga kaangtanan sa iban,” siling ni Dr. Jean M. Twenge sa iya libro nga Generation Me. Nagsiling pa sia: “Masami nga ginapakita sang mga research nga indi mabakal sang kuarta ang kalipay—kon bastante ka na, ang kuarta indi na makahatag sing kalipay.”

  ANO ANG MAHIMO MO? Himua nga tulumuron ang mas labaw pa sangsa manggad kag pagkabutang. “Mag-andam batok sa tanan nga sahi sang pagkamahamkunon,” siling ni Jesus, “bangod bisan pa may kabuganaan ang isa ka tawo ang iya kabuhi indi nagagikan sa mga butang nga ginapanag-iyahan niya.”​—Lucas 12:15.

•  ANG GINASILING SANG BIBLIA:

  “Ang bugal nagauna sa kalaglagan, kag ang palabilabihon nga espiritu nagauna sa pagkapukan.”​—Hulubaton 16:18.

  ANO ANG BUOT SILINGON SINI? Ang ambisyon kag bugal indi makabulig sa imo nga matigayon ang matuod nga kadalag-an. Ang matuod, ang libro nga Good to Great nagsiling nga ang mga lider sang kompanya nga nangin madinalag-on “mapainubuson, indi bugalon, kag wala nagapakaimportante. Pero, mga 66 porsiento sang mga kompanya ang may mga lider nga grabe ang bugal amo nga naputo ukon wala nagtin-ad ang kompanya.” Ang leksion? Ang sobra nga bugal masami nga nagaresulta sa kapaslawan sangsa kadalag-an.

  ANO ANG MAHIMO MO? Imbes nga magtinguha sang kabantugan, palambua ang pagkamapainubuson. Ang Biblia nagasiling: “Kon ang bisan sin-o nagahunahuna nga importante sia samtang wala sia sing kabilinggan, ginadaya niya ang iya kaugalingon”​—nga indi gid palatandaan sang kadalag-an!​—Galacia 6:3.

•  ANG GINASILING SANG BIBLIA:

  “Wala na sing maayo pa sa tawo sang sa . . . magkalipay ang iya kalag sing kaayohan sa iya kinabudlayan.”​—Manugwali 2:24.

  ANO ANG BUOT SILINGON SINI? Kon palambuon mo ang maayo nga batasan sa obra, mas manamian ka pa gid sa sini. Sa libro ni Dr. Madeline Levine nga Teach Your Children Well, nagsiling sia: “Mabatyagan mo nga madinalag-on ka kon maayo ka sa isa ka butang kag para mangin maayo ka dapat nga manikasog ka sa sini.” Dapat makahibalo ka man mag-atubang sang pila ka kapaslawan.

  ANO ANG MAHIMO MO? Tinguhai nga mangin hanas, kag indi mangampo kon may mga problema. Kon may kabataan ka, buligi sila (depende sa ila edad kag ikasarang) nga solbaron ang ila kaugalingon nga problema. Likawi nga buligan sila dayon nga solbaron ang tanan nila nga problema. Mangin malipayon gid ang mga pamatan-on kag mahanas sing maayo kon makahibalo sila mag-atubang sing mga problema.

• ANG GINASILING SANG BIBLIA:

  “Maayo pa ang ido nga buhi sang sa leon nga patay.”​—Manugwali 9:4.

  ANO ANG BUOT SILINGON SINI? Kon nagatrabaho ka, dapat mangin bahin ini sang imo kabuhi​—pero indi mismo ang imo kabuhi. Makabatyag ka bala nga madinalag-on ka kon mataas ang imo posisyon sa trabaho pero nagabalatian ka kag wala na ginatahod sang imo pamilya? Ang mga matuod gid nga madinalag-on nagatinguha nga mangin balanse sa ila trabaho, kapagros, kag pamilya.

  ANO ANG MAHIMO MO? Atipana ang imo kaugalingon. Magpahuway sing maayo. Diutay lang ang benepisyo kon magbakabaka ka sing obra nga mapabay-an mo na ang iban nga butang​—kapagros, pamilya, kag pag-abyanay—para lang sa indi matuod nga kadalag-an.

• ANG GINASILING SANG BIBLIA:

  “Malipayon ang mga mahunahunaon sang ila espirituwal nga kinahanglanon.”​—Mateo 5:3.

  ANO ANG BUOT SILINGON SINI? Ang pagtuon sa Biblia kag pag-aplikar sang mga prinsipio sini importante para sa matuod nga kadalag-an. Nasapwan sang mga Saksi ni Jehova nga ang pag-una sang espirituwal nga mga butang sa ila kabuhi nakabulig sa ila nga mabuhinan ang ila mga kabalaka sa materyal nga mga butang.​—Mateo 6:31-33.

  ANO ANG MAHIMO MO? Hibalua kon paano ka mabuligan sang Biblia nga matigayon ang matuod nga kadalag-an. Para sa dugang nga impormasyon, kontaka ang mga Saksi ni Jehova sa inyo lugar ukon kadtui ang amon Web site nga www.isa4310.com/hil.