Ginpadungan sa siudad sang Los Angeles, California, ang halos 4,500 ka traffic light nga nahamtang sa sulod sang 1,215 ka kilometro kuadrado. Suno sa The New York Times, ang Los Angeles amo “ang una nga kapital sa bilog nga kalibutan nga nakahimo sini.”

Nakita sang nagausisa sa ikaayong lawas sa bilog nga kalibutan nga nagtaas sing 82 porsiento ang mga sobra katambok sang 1990 tubtob 2010. Sobra tatlo ka pilo ang kadamuon sang nagakapatay tungod sini kon ikumparar sa mga may malnutrisyon, bisan pa problema gihapon ang kakulang sing kalan-on sa madamo nga lugar. Pero ang matuod, “halin sa kalibutan nga kulang sing pagkaon mga 20 ka tuig ang nagligad, yari na kita sa kalibutan nga may tuman kadamo kag indi makapapagros nga pagkaon, bisan pa sa pigado nga mga pungsod, kag tungod sini nagabalatian kita,” siling ni Majid Ezzati, isa sang nagapanguna nga researcher.

Nakapabuto naman ang Laysan albatross, nga amo kuno “ang pinakatigulang nga ilahas nga pispis.” Pila ang iya edad? Ginbutangan sing band ini nga pispis sang 1956 sang mga lima sia ka tuig, amo nga sobra na sia 60 anyos subong. Sa bilog niya nga kabuhi, nakalakbay na sia sing mga tatlo asta apat ka milyon ka kilometro, nga mga apat tubtob anom ka pakadto pakari sa duta kag bulan.

Ginapakita sang isa ka pagtuon nga 33 porsiento sang mga babayi sa South Africa ang nagagamit sang habon kag mga cream para magputi. Delikado ini amo nga gindumilian na ini sa iban nga pungsod. Ang pila ka peligro nga mahimo sini amo ang kanser, pagkaguba sang kidney, depresyon, kasubo, arikis, kag pinalian.