Suno sa isa ka pagtuon sa Switzerland, mas mataas sing 14 porsiento ang posibilidad nga mapatay ang isa nga sobra 60 anyos sa iya kaadlawan sangsa iban nga adlaw. Sa ila kaadlawan, mas mataas sing 18 porsiento ang posibilidad nga maatake sila sa tagipusuon, 21 porsiento ang posibilidad nga maistrok ang mga babayi, kag 35 porsiento naman ang posibilidad nga maghikog ang mga lalaki. Ginabulubanta sang mga sientipiko nga nagtaas ang kaso sang paghikog kag aksidente bangod sa stress kag alkohol. Pero, wala nagaugyon ang pila ka eksperto sa sini nga pagtuon. Nagapati sila nga ang kabangdanan sini amo ang sala nga pagrekord.

Kon ikumparar sa mga guapa, mas daku ang posibilidad nga mainterbyu sa obra ang mga guapo kon butangan nila sing piktyur ang ila résumé. Ngaa? Nagasiling ang mga researcher sa Israel nga mahimo bangod kalabanan sa departamento nga nagainterbyu sa mga aplikante mga babayi. ang The Economist nagsiling nga ang makapasubo, pero matuod nga rason, amo nga nagapangimon ang mga babayi sa mga guapa nga mga aplikante.

Tatlo ka pasipista ukon nagapamatok sa inaway—isa ka 82 anyos nga madre upod ang 63 kag 57 anyos nga mga lalaki—ang nakasulod sa ginataguan sang mga 100 ka tonelada nga materyales para sa nuklear nga nahamtang sa Oak Ridge, Tennessee. Ginpinturahan nila ang isa ka bilding sing mga slogan nga nagapamatok sa inaway. Ang kapalpakan sa seguridad sang isa ka ahensia nga “dapat may pinakasigurado nga mga pasilidad sa bilog nga kalibutan” ginlaragway nga “makatulublag gid” sang Energy Secretary nga si Steven Chu.

Ang pinakamataas nga korte sa pungsod nagpatuman sa mga kompanya sang sigarilyo nga kuhaon ang mga kolor kag logo sa mga pakete sang sigarilyo. Subong, ang tanan nga sigarilyo dapat madukot nga brown ang pakete nga may piktyur nga nagapakita sang halit sang sigarilyo.