Pirme na lang bala kamo nagabaisay nga mag-asawa? Pamatyag bala ninyo diutay lang nga sintak, nagalupok kamo dayon?
Kon amo, may makabulig sa inyo. Pero dapat ninyo anay hibaluon kon ngaa pirme kamo nagabais.
NGAA NAGAKATABO INI?
Indi paghangpanay.
Ang asawa nga si Jillian* nagsiling: “Kon kaisa may gusto ko ihambal sa akon bana pero lain ang akon nahambal. Ukon kon kaisa kumbinsido ako nga ginsugiran ko na sia sang isa ka butang, pero ang matuod sa pensar ko pa lang gali. Nagakatabo gid ini!”
Kinatuhayan.
Bisan pa nga daw sahuay gid kamo sang imo tiayon, mahimo nga lainlain gihapon ang inyo opinyon sa pila ka butang. Ngaa? Kay wala gid sing duha ka tawo nga pareho. Kag mahimo amo ini ang magapahalipay ukon magapagamo sang pag-asawahay. Pero sa masami, nagaresulta ini sa kagamo.
Indi maayo nga halimbawa.
“Pirme lang nagabaisay ang akon mga ginikanan kag wala nila ginarespeto ang kada isa,” siling sang asawa nga si Rachel, “gani sang namana ako, nailog ko ang pagpakig-angot ni Nanay kay Tatay sa akon pagpakig-angot sa akon bana. Wala ko gid matun-an ang pagpakita sing respeto.”
Mas madalom nga rason.
Sa masami ang matuod nga rason sang mainit nga pagbaisay indi ang butang nga gin-umpisahan sini. Halimbawa, ang pagbaisay nga nagsugod sa “Pirme ka lang leyt!” mahimo nga indi parte sa oras kundi sa pagbatyag sang isa nga ginabalewala na sia.
Ano man ang rason, ang pirme nga pagbais makaapekto sa inyo panglawas kag mahimo tunaan sang pagbulagay. Gani, paano ninyo malikawan ang pagbaisay?
ANO ANG MAHIMO MO?
Para malikawan ang pagbaisay, dapat mahibaluan ninyo ang matuod nga mga rason sini. Kon kalmado na kamo, tilawi ninyo ang masunod.
1. Magkuha ang kada isa sa inyo sang papel, dayon isulat ninyo kon ano ang inyo ginbaisan. Halimbawa, mahimo isulat sang bana, “Isa ka ka adlaw nga nag-upod sa imo mga abyan kag wala mo gid ko ginpabalo kon diin ka nagkadto.” Mahimo isulat sang asawa, “Nag-upod gid lang ko sa akon mga abyan, naakig ka gid.”
2. Istoryahi ninyo nga may bukas nga hunahuna ang masunod: Daku gid bala ini nga isyu? Puede bala nga palampason na lang ini? Kon kaisa, para wala na sing gamo, mas maayo nga batunon na lang nga indi pareho ang inyo opinyon kag tabunan ini sang gugma.—Prinsipio sa Biblia: Hulubaton 17:9.
Kon gamay man lang ang isyu, mangayo sing pasaylo ang kada isa kag indi na ini pagliwatliwaton.—Prinsipio sa Biblia: Colosas 3:13, 14.
Pero kon isa sa inyo ukon pareho kamo nga nagapati nga serioso ini, himua ang masunod.
3. Isulat ninyo kon ano ang inyo nabatyagan sang nagbaisay kamo. Halimbawa, ang bana mahimo magsulat, “Pamatyag ko mas gusto mo pa mag-upod sa imo mga abyan sangsa akon.” Ang asawa mahimo magsulat, “Pamatyag ko daw bata lang ako nga dapat pirme maglisensia sa iya tatay.”
4. Magbayluhanay kamo sing papel, kag basaha ninyo ang ginsulat sang inyo tiayon. Ano gid bala ang iya matuod nga rason sang pagbaisay ninyo? Istoryahi ninyo kon ano ang mas maayo nga himuon para masolbar ang problema nga wala nagabaisay.—Prinsipio sa Biblia: Hulubaton 29:11.
5. Istoryahi ninyo kon ano nga leksion ang inyo natun-an. Paano ninyo ini magamit para masolbar ukon malikawan ang pagbaisay sa ulihi?
