Magpabulig
Kinahanglan mo ang bulig indi lamang samtang nagaeskwela ka kundi bisan sa ulihi man kon hamtong ka na.
SIN-O ang makabulig sa imo agod magmadinalag-on ka sa imo pag-eskwela?
Pamilya.
“Kon nabudlayan ako sa akon homework,” siling ni Bruna, isa ka 18-anyos nga babayi nga taga-Brazil, “ginapaathag ini sa akon ni Tatay. Wala niya ginahatag kon ano ang sabat, kundi paagi sa mga pamangkot ginabuligan niya ako nga mahibaluan ko ang sabat.” *
Tip: Pamangkuta ang imo ginikanan kon bala nabudlayan sia anay sa subject nga nabudlayan ka man. Kon wala, makabulig gid sia sa imo.
Mga manunudlo.
Nalipay ang kalabanan nga manunudlo kon ang ila estudyante luyag gid magmadinalag-on, kag nalipay gid sila sa pagbulig.
Tip: Silinga ang imo manunudlo, “Nabudlayan ako sa sini nga klase, pero gusto ko gid magmadinalag-on. Ano sa banta mo ang himuon ko?”
Mga manuglaygay.
Ayhan mabuligan ka sang isa ka ginasaligan nga abyan sang inyo pamilya. Duha ang benepisyo sini: Una, mabuligan ka; kag ikaduha, makatuon ka sa pagpangayo sing bulig kon kinahanglanon kag makabulig ini sa imo sa ulihi kon hamtong ka na. Ang matuod, ang kadalag-an masami nga matigayon paagi sa pagbuligay, indi sa kaugalingon lamang nga pagtinguha.—Hulubaton 15:22.
Tip: Pamangkuta ang imo mga ginikanan kon sin-o nga manuglaygay ang makabulig sa imo.
Tandai: Wala sing malain kon mangayo ka sing bulig!
Tilawi nga himuon ini dayon. Maglista sing duha ukon tatlo ka huwaran nga tawo nga imo ginarespeto. Makabulig bala sila sa imo mga problema sa eskwelahan?
^ par. 4 Mahimo makabulig man ang imo magulang.
