Kon Ano ang Mabulig sang mga Ginikanan
“Nagaginutok lang ang mga estudyante sa kuarto! Wala sing electric fan kag daw indi ka makaginhawa tungod sang init.”—Luis, Bolivia.
“Kulang sing manunudlo ang amon eskwelahan, gani indi matatapan ang kada estudyante. Wala kami sing mga mapa, mga gamit sa laboratoryo, kag librarya.”—Dorcus, Myanmar.
“Ang kalabanan sang amon mga manunudlo nabudlayan sa pagkontrol sa klase. Kon kaisa, puerte kasalawayon sang mga estudyante, gani labi pa gid nga indi kami makatuon sing maayo.”—Nina, South Africa.
GINAPAKITA sini nga sa iban nga mga eskwelahan mabudlay ang pagtuon. Paano mabuligan sang mga ginikanan ang ila kabataan nga magmadinalag-on sa ila pag-eskwela wala sapayan sini nga mga problema? Ari ang pila ka panugda.
Mangita sing Paagi.
Magkonsentrar ka sa butang nga mahimo mo, sa baylo sang mga problema nga wala ka man sing mahimo. Kon nabudlayan gid ang imo bata sa isa ka subject ukon indi sia makaarapal sa iya mga homework, hambali ninyo kon ano ang mahimo ninyo. Halimbawa, kinahanglan bala nga mangita ka sing lugar sa inyo balay nga mas kombeniente ang pagtuon? Kinahanglan mo bala buligan ang imo bata sa paghimo sing iskedyul agod matapos niya ang mas importante nga mga hilimuon sa eskwelahan? Kinahanglan bala niya ang bulig sang isa ka tutor? Mahimo ka man makapangayo sing mga panugda sa manunudlo kag sa guidance counselor sang imo bata. Kabiga sila nga mga kabulig, indi mga kaaway.
Buligi ang imo bata nga magkonsentrar sa tulumuron sang edukasyon.
Ang edukasyon makabulig sa imo bata nga mangin maayo kag responsable sa ulihi. Ang iya tulumuron indi lang agod makatigayon sing manggad. Pero, suno sa mga pag-usisa, ang pagmanggaranon amo ang panguna nga rason kon ngaa nagaeskwela ang madamo nga pamatan-on. Ginarekomendar sang Biblia ang balanse nga pagtamod sa manggad. Nagasiling ini nga “ang cuarta pangapin,” pero nagapaandam man ini nga “ang mga determinado nga mangin manggaranon” indi makatigayon sing matuod nga kalipay.—Manugwali 7:12; 1 Timoteo 6:9.
Ang edukasyon makabulig sa imo bata nga mangin maayo kag responsable sa ulihi
Pabay-i ang imo bata nga manuto bangod sa kabudlayan.
Madamo nga manunudlo ang nagasiling nga kon mabudlay pakigbagayan ang mga estudyante, mas sobra pa ang mga ginikanan. Ang pila ka ginikanan nagapasilabot dayon kag nagareklamo kon ang ila bata madalahig sa problema ukon manubo ang iya eksam. Halimbawa, ang magasin nga Time nagreport parte sa isa ka propesor sa kolehiyo nga may mga estudyante nga “nagatawag sa ila mga ginikanan paagi sa cell phone samtang yara sila sa klase agod ireklamo ang ila manubo nga grado kag dayon ginahatag nila ini sa iya, kay luyag magpasilabot sang ila ginikanan. May mga ginikanan nga naghambal sa iya nga nagagasto sila sing daku para mapaeskwela ang ila bata kag indi nila mabaton kon manubo ang grado sang ila bata.”
Kabiga ang manunudlo sang imo bata nga imo kabulig, indi kaaway
Ini nga mga ginikanan indi makabulig sa ila mga bata. Sa baylo nga “makabulig,” ginapunggan nila ang ila mga bata nga “maeksperiensiahan ang paghimo sing desisyon, ang kapaslawan, kag kon paano atubangon ang resulta sang ila indi maayo nga mga desisyon,” siling ni Polly Young-Eisendrath sa iya libro nga The Self-Esteem Trap. Nagsiling pa sia: “Kon pirme lang magpasilabot ang mga ginikanan sa pagsolbar sang problema sang ila mga bata samtang ang ila mga bata wala sing ginahimo, ang mga ginikanan amo ang makatuon sa pag-atubang sa mga kabudlayan, pero ang mga bata indi makatuon sini kon sila na lang.”
Mangin rasonable kon daw ano kalawig ang pag-eskwela.
Subong sang nasambit na, ang edukasyon makabulig sa imo bata nga mangin responsable sa ulihi. (Genesis 2:24) Pero daw ano kalawig sia dapat mag-eskwela agod matuman ini?
Indi paghunahunaa nga agod mag-ayuhan ang kabuhi sang imo bata dapat sia makatapos eskwela sa unibersidad. May mapilian pa nga iban nga indi magasto. Ang matuod, kon kaisa, pareho lang nga maayo ang pagkabuhi sang isa nga nakatapos sa unibersidad kag sang isa nga nakatapos sang bokasyonal nga kurso.
Tandai: Ang mga eskwelahan indi perpekto, kag madamo sing mga problema ang mga kabataan subong nga wala sang una. Pero paagi sa imo bulig, mahimo magmadinalag-on ang imo bata. Ngaa indi ninyo paghambalan nga pamilya ang mga panugda sa pahina 3 tubtob 7 sini nga magasin?
