ANG pag-eskwela nga wala sing tulumuron daw pareho sang pagdalagan sa palumba nga wala sing inangan ukon finish line. Ang Biblia nagasiling: “Kinahanglan nahibal-an mo ang imo ginahimo.”(Hulubaton 4:26, HPV) Kon may tulumuron ka, makakonsentrar ka kag mahapos ka makakita sing obra. Paano ka makadesisyon kon ano ang imo tulumuron?

Pamangkuta ang imo kaugalingon, ‘Ano nga obra ang gusto ko?’ Indi pagpabuyanbuyani ang pagsabat sa sini nga pamangkot, kundi magplano ka na nga daan. Ngaa? Halimbawa: Kon gusto mo magbiyahe, dapat magdesisyon ka anay kon diin ka makadto. Dayon tan-awa sa mapa kon ano ang pinakamaayo nga ruta pakadto didto. Amo man sini ang himua sa imo pag-eskwela. Hunahunaa anay kon ano nga obra ang gusto mo, dayon magpili ka sing kurso nga makabulig sa imo nga matuman ini.

Paandam: Madamo nga pamatan-on ang gusto lang mag-obra sang nanamian gid nila. Halimbawa, kon gusto nila mangin propesyonal nga musikero, ginaindi-an nila ang iban nga obra. Ano ang mas maayo nga himuon?

1. Hibalua ang imo mga abilidad. Halimbawa, nanamian ka bala sang mga obra nga nagaserbisyo kag nagabulig sa iban? Maayo ka bala sa makina? sa numero? sa negosyo? sa pagpangay-o?
2. Hibalua ang imo mga pililian. Ano nga obra ang bagay sa imo abilidad? Magpabulig ka sa iban kag binagbinaga ninyo ang mga obra nga imo mapilian sa baylo nga magkonsentrar lang sa nagustuhan mo gid nga obra. Kag mangin praktikal. Halimbawa, sa kurso nga pilion mo, makaobra ka man bala sa iban nga lugar engkaso magsaylo ka? Dapat ka bala mangutang para mahanas ka sa sini nga obra?
3. Hibalua ang imo mga oportunidad. Kon nakadesisyon ka na sang obra nga gusto mo, hibalua kon may maobrahan ka sa inyo lugar. May kilala ka bala nga mga manedyer? Puede ka bala makaobra sa ila bilang apprentice? May ginatanyag bala nga programa para sa paghanas sa sini nga sahi sang obra?

Tip: Pamangkuta ang imo mga ginikanan, mga manunudlo, kag hamtong nga mga abyan. Tan-awa ang newspaper kag ang Internet.

Tandai: Kon may tulumuron ka, may direksion kag katuyuan ang imo pag-eskwela.

Tilawi nga himuon ini dayon. Samtang nagaeskwela ka pa, pamensara na nga daan ang nasambit nga tatlo ka butang. Isulat ang imo mga tulumuron kag hambali ini upod sa imo mga ginikanan.