Halin sa Amon mga Bumalasa

Pamangkot sang mga Pamatan-on . . . Ano ang Himuon Ko Para Manamian Ako sa Pagbasa sing Biblia? (Abril 2009) Beinte kuatro anyos ako kag isa ka asawa kag iloy, gani nabudlayan gid ako sa pagbasa sing Biblia. Ginsunod ko ang mga panugda sa sini nga artikulo, kag nagamit ko gid ang gingunting nga bahin. Subong, excited na ako magbasa sing Biblia. Makita ko na kon paano nagaalalangot ang mga libro sa Biblia pareho sang isa ka matahom nga tela nga may mga burda. Subong ko pa lang nabatyagan ang kalipay sa pagbasa sing Biblia. Madamo gid nga salamat!

K. T., Estados Unidos

Ang Libro nga Imo Masaligan—Bahin 6 (Abril 2011) Ang artikulo nga “Ang Roma sa Kasaysayan sang Biblia” nagsiling: “Ano ang natabo sa Jerusalem? Nagbalik ang mga Romano nga may 60,000 ka soldado nga ginapangunahan ni Vespasian kag sang iya anak nga si Tito.” Ginapakita sini nga daw si Vespasian kag si Tito ang nanguna sa mga hangaway nga nagsalakay sa Jerusalem. Pero suno sa mga rekord sa kasaysayan, ara si Vespasian sa Roma sini nga mga tion.

J. O., Australia

Sabat sang “Magmata!”: Suno sa “Josephus—The Essential Writings,” ni Paul L. Maier, “Si Tito nag-abot dayon sa Alexandria dala ang Ikakinse nga tropa, kag nagbuylog sa iya amay sa Ptolemais, diin nagahulat si Vespasian upod ang Ikalima kag Ikapulo nga mga tropa.” Dugang pa, ang “Encyclopedia of the Roman Empire,” ni Matthew Bunson, nagsiling parte kay Vespasian: “Upod sa iya anak nga si Tito, gindugmok nila ang Rebelyon sang mga Judiyo kag nagahanda nga salakayon ang Jerusalem sang 68 sang may balita nga napierde si Nero kag ginbuslan ni Galba. . . . Sang tigragas sang 70, nag-abot sia sa Roma.” Gani masiling naton nga sang primero updanay si Vespasian kag si Tito sa pagsalakay sang Jerusalem. Pero, sang ulihi nagpauli si Vespasian sa Roma kag si Tito ang nabilin para manguna.

Ano ang Imo mga Lalab-uton? (Pebrero 2011) Ginsambit sa sini nga artikulo ang mga halimbawa sang indi realistiko nga mga tulumuron, kag nalakip sa sini ang “mangin popular, manggaranon, perpekto nga panglawas, kag makakita sing perpekto nga bana ukon asawa.” Ngaa nalakip sa sini ang “perpekto nga bana ukon asawa”? Ngaa “indi realistiko” ang tulumuron nga makakita sing tiayon?

S. K., Estados Unidos

Sabat sang “Magmata!”: Ini nga artikulo wala nagasiling nga ang pagpangita sing tiayon indi realistiko nga tulumuron. Sa baylo, ginapatuhuyan sini ang pagpangita sing “perpekto nga bana ukon asawa.” Ginapaathag man sini nga ang “perpekto” nga tiayon nagapatuhoy sa tiayon nga wala sing diperensia, kag wala sing negatibo nga kinaiya. Mapaslawan lang ang nagapangita sini bangod sa duha ka rason: Una, wala sing amo sini nga tawo. (Roma 3:23) Ikaduha, kon amo sini ang ginapangita sang isa, maathag nga ang importante lang sa iya amo ang iya makuha sa pag-asawahay sa baylo sang iya mahatag sa sini. Bangod sini, may pila ka bana ukon asawa nga nagapaabot nga mapabag-o nila ang ila tiayon kag mangin “perpekto” ini. Sa pihak nga bahin, ang isa ka mabakod nga pag-asawahay ginahuman sang duha ka tawo nga nakahibalo nga indi sila perpekto nga duha, pero ‘padayon nila nga ginabatas ang isa kag isa kag ginapatawad sing kinabubut-on ang isa kag isa.’—Colosas 3:13.