Halin sa Amon mga Bumalasa

Ginbayaan Ko ang Kabantugan (Hunyo 2010) Nagapasalamat gid ako sa inyo sa sini nga artikulo! Treintay nuebe anyos ako subong, kag ako lang ang nagapadaku sa akon tatlo ka kabataan. Sa amon lugar sa Rusya, mabudlay gid mangita sing obra. Pero nabuligan gid ako sang halimbawa ni Martha Teresa Márquez. Ang artikulo nagsiling nga para masuportahan niya ang iya bug-os tion nga pag-alagad, nagahimo si Martha sing tamales sa ila balay kag ginabaligya sa dalan. Gin-ilog ko sia, naghimo man ako sing gamay nga tinapay nga ginatawag sa Rusya nga piroshki. Madahog ini! Amo na ini subong ang negosyo sang amon pamilya. Bangod sini, natun-an sang akon kabataan ang praktikal nga mga obra kag nangin mas responsable sila.

G. M., Rusya

Ano ang Makabulig Kon Nagaang-ang Ka? (Mayo 2010) Salamat gid sa husto nga impormasyon parte sa pag-ang-ang. Ginatinguhaan gid namon nga ipahibalo sa mga nagaang-ang nga madamo sing epektibo nga paagi nga makabulig sa ila.

J. F., presidente sang The Stuttering Foundation, Estados Unidos

Pamangkot sang mga Pamatan-on . . . Paano Ko Ipaathag ang Ginasiling sang Biblia Parte sa mga Agi kag Tomboy? (Disiembre 2010) Pulo ka tuig na ako nga may asawa, kag may isa kami ka bata. Adlaw-adlaw ko nga ginapakigbatuan ang akon “tunok sa unod.” Naluyag ako sa mga lalaki. Bisan may asawa na ako, amo gihapon ang akon balatyagon. Nagalalain gid ako kay daw indi ko ini makontrol. Pero sang nabasa ko ini nga artikulo, narealisar ko nga puede pa ako magbag-o. Makontrol ko na karon ang akon balatyagon kag wala na nagapadala sa sini.—2 Corinto 12:7.

Ginhinago ang ngalan, Estados Unidos

Lima pa lang ako ka tuig, nagainagi na ako. Subong, 61 anyos na ako, kag amo gihapon ang akon balatyagon. Gusto ko ang ginsiling didto nga bisan ang indi agi kag tomboy dapat man maglikaw sa pagpakighilawas kag may madamo nga ‘single nga wala na sing tsansa nga makapamana ukon makapangasawa kag madamo man ang may asawa ukon bana nga dis-ebol nga indi na makahatag sang ila seksuwal nga kinahanglanon,’ pero malipayon gihapon. Gani, masarangan sundon sang mga agi kag tomboy ang mga talaksan sa moral kon gusto gid nila pahalipayon ang Dios. Nagapasalamat ako sa inyo pagpalig-on sa amon nga nagapakigbato sa sini nga balatyagon.

Ginhinago ang ngalan, Estados Unidos