Nalipay Ako nga Mangin Manugbantay

Panugiron ni Alymbek Bekmanov

Tatlo pa lang ako ka tuig, nanamian na ako magbantay sing karnero. Pag-edad ko 17, nangin eksperto ako sa sini. Pero sang ulihi, natun-an ko nga may isa pa ka sahi sang manugbantay, indi sang mga karnero kundi sang mga tawo. Isugid ko sa inyo kon ngaa mas nakahatag ini sa akon sing kalipay.

NATAWO ako sang 1972. Mga Kirghiz kami kag daku ang amon pamilya. Nagaistar kami sa Chyrpykty, malapit sa Lake Issyk Kul. Ining matahom nga linaw ginakadtuan pirme sang mga turista nga nagabisita sa Kyrgyzstan, ang Republika anay sang Union Sobyet. Subong, nagaistar kami sang akon asawa nga si Gulmira sa Bishkek, ang kapital nga siudad sang Kyrgyzstan. Mga 200 kilometros ini halin sa akon gindak-an.

Ang Karnero kag ang Manugbantay

Sang bata pa ako, ginapahalab namon ang mga karnero sa kabukiran kon tigpamulak. Nagataklad kami sing sobra tatlo ka kilometro nga nagalawig sing pila ka adlaw. Ang iban nga manugbantay, nagapanglaktod para makaabot dayon. Pero nagaagi sila sa kilid sang mga pil-as nga kon makadalin-as ang mga karnero, nagakasamaran ukon nagakapatay pa gani.

Sa sini nga mga alagyan, ginapahog ukon ginasalakay sang mga lobo ang mga karnero. Ginapapalayo nila ini sa panong kag ginakaon. Gani nagaagi ang akon tiyo sa mahapos kag indi delikado nga alagyan bisan pa mas malawig ini sing isa ka adlaw ukon sobra pa. Kon kaisa gusto ko magdalidali, pero ginahambalan ako sang akon tiyo, “Alymbek, pamensara ang mga karnero, indi lang ang imo kaugalingon.”

Sa sining matahom nga kabukiran, nagahimo kami sing temporaryo nga kudal, para maproteksionan ang mga karnero kon gab-i. Ang iban nga manugbantay nagapaburaw amo nga mainit na kon pahalbon nila ang ila mga karnero.

Kon mainit na, ang mga karnero nagatinumpok, nagaduko, kag daw ginabudlayan sa pagginhawa. Indi sila makapanginaon sing maayo, amo nga naganiwang sila kag nagaluya. Pero ang akon tiyo, alas kuatro pa lang sang aga nagabugtaw na. Ginapahalab niya ang mga karnero antes pa magbutlak ang adlaw. Gani makakaon sila sing maayo kay mabugnaw pa. Amo gani nga ginasiling pirme sang iban, “Makilal-an mo ang manugbantay sa iya mga karnero.”

 Ang maayo nga tion sa pagbulong sa mga karnero amo nga kon nagapahuway na sila pagkatapos makahalab. Ang isa gid namon ka problema amo ang pagbanog sang ila pusod kon maitlogan sang mga langaw. Kon indi dayon matalupangdan, mahimo nga magtalangtalang ang karnero sa tuman nga kasakit kag mapatay. Gani halos adlaw-adlaw namon nga ginatan-aw ang pusod sang mga karnero. Bisan pa trabahuso ini, nalipay kami kay ang amon mga karnero maayo kag matambok.

Kada gab-i pagbalik nila sa ila toril, ginaisip namon sila. Ginapasulod namon sila sa makitid nga alagyan nga mga tatlo ukon apat ang makaagi. Ginatos ang amon karnero, pero nagsagad na kami sa pag-isip amo nga sa sulod lang sang 15 ukon 20 minutos, makaisip kami sing asta 800. Indi ini mahapos, pero nahimo namon!

Kon may madula gani nga karnero, bisan isa lang, nagadala sing pusil kag baston ang akon tiyo para pangitaon ini bisan madulom kag nagainulan. Nagasinggit sia sing matunog para mabatian ini sang nadula nga karnero kag magpalagyo ang ilahas nga mga sapat.

Ginangalanan namon ang tanan nga karnero, base sa ila hitsura kag mga kinaiya. Sa panong, may ara gid pirme salawayon. Kon kaisa ginasunod man sia sang iban nga karnero. Gani ginatudluan ini ukon ginadisiplina sang manugbantay. Halimbawa, mahimo nga ibilin sia sa toril. Sa ulihi, ang iban nagapamati man kag nagasunod sa ila manugbantay. Pero ang indi gid magsunod ginasud-an namon.

Isa Pa ka Sahi sang Manugbantay

Sang 1989, nagtuon ako sing martial arts kag nagsagad gid sa sini. Pagkasunod nga tuig, nag-entra ako sa army sang Soviet. Sang nagaserbisyo ako sa Rusya, ang akon mga upod sa martial arts nangin sindikato. Pagpauli ko sa Kyrgyzstan, ginsilingan nila ako nga kon mag-entra ako sa ila, makapagusto ako. Pero sa sina man nga tion, nakilala ko ang mga Saksi ni Jehova.

Nasabat sang mga Saksi ang mga pamangkot nga ginapaligban ko halin sang una pareho sang, Ngaa nagakapatay ang mga tawo? Natun-an ko sa amon pag-istoryahanay nga nagakapatay kita bangod sa sala sang una nga tawo, si Adan. (Roma 5:12) Natun-an ko man sa Biblia nga ginpadala sang matuod nga Dios nga si Jehova ang iya Anak nga si Jesus para magluwas sa aton. Kon magtuo kita sa Dios kag sa iya Anak, mapatawad ang aton napanubli nga sala kag mahimo kita mabuhi sing walay katapusan sa Paraiso sa duta. Amo gid sini ang orihinal nga katuyuan sang Dios para sa mga tawo.—Salmo 37:11, 29; 83:18; Juan 3:16, 36; 17:1-5; Bugna 21:3, 4.

Ang mga sabat sa akon mga pamangkot nga ginpakita sang mga Saksi halin sa Biblia maathag gid amo nga nakasiling ako: “Amo na ’ya ang insakto!” Kapila ako ginhagad sang akon mga kaupdanan sang una nga magbalik sa ila grupo pero indi na ako gusto nga makig-upod sa ila. Ang pagtuon kag pagsunod sa mga kamatuoran sang Biblia nakabulig gid sa akon nga pangindian ang ila mga ginatanyag. Gani sang ulihi, nangin espirituwal ako nga manugbantay.

Sa sina man nga tion, nagabisita kay nanay ang isa ka kilala nga faith healer sa amon lugar. Isa ka adlaw, naabtan ko sa balay ini nga babayi nga nagapakig-istorya sa mga espiritu. Nagsiling sia nga may pinasahi ako nga gahom kag kinahanglan magkadto ako sa moske para kuhaon ang isa ka anting-anting kay makabulig kuno ini sa akon. Daw mapati na gid ako sa iya kay kon himuon ko ini puede na kuno ako makapang-ayo.

Pagkadason nga adlaw, nagkadto ako sa mga Saksi nga nagatuon sa akon sa Biblia kag ginsugid sa ila ang natabo. Ginpakita nila sa akon sa Biblia nga ginakangil-aran ni Jehova ang tanan nga sahi sang espiritismo kay naghalin ini sa malaut nga mga espiritu. (Deuteronomio 18:9-13) Pila ka gab-i nga indi ako makatulog kay ginatublag ako sang mga demonyo. Pero sang gintudluan ako sang mga Saksi nga mangamuyo suno sa gusto ni Jehova,  nakatulog na ako sing maayo. Nakumbinsi gid ako nga si Jehova ang matuod nga Manugbantay.

Natun-an ko nga ang isa sa mga manunulat sang salmo sa Biblia nga si David, manugbantay man sing karnero sang pamatan-on sia. Gintawag niya si Jehova nga “akon manugbantay,” kag amo man sini ang akon nabatyagan. (Salmo 23:1-6, APD) Gusto ko sundon ang Anak ni Jehova nga si Jesus nga ginatawag “manugbantay sang mga karnero.” (Hebreo 13:20) Gani sang 1993, sa asembleya sa Bishkek, ginsimbuluhan ko ang akon dedikasyon kay Jehova paagi sa pagpabawtismo sa tubig.

Isa ka Importante nga Pagtinipon

Madamo sa amon paryente kag kaingod ang nagtuon man sa Biblia. Mga 70 sa amon baryo ang nagatipon malapit sa Lake Issyk Kul. Interesado gid ang isa ko ka paryente nga pangulo sa amon lugar. Nagsiling sia nga tipunon niya ang mga tawo para mapaathag namon ang amon bag-o nga natun-an. Pero ginsutsot sang mga lider sang relihion sa amon lugar ang mga tawo nga kontrahon kami. Nagplano sila nga himuon ini sa tion sang pagtinipon.

Sa adlaw sang pagtinipon, mga isa ka libo ang nag-abot, ang iban naghalin pa sa tatlo ka kaingod nga baryo. May upod ako nga pila ka Saksi kag ang isa amo ang nagpaathag sang amon ginapatihan sa Biblia. Wala pa lima ka minutos, may nagtindog kag nagpaarak sing masakit nga mga pamangkot. May mga pamahog kag akusasyon sila batok sa amon, amo nga naakig ang mga tawo kag gusto nila kami sakiton.

Sa sina nga tion, gindepensahan kami sang isa ko ka magulang nga lalaki nga bag-o lang nagatuon sa Biblia. Ginakahadlukan sia sang tanan kay maayo sia sing pangamot. Maisog sia nga nagpatunga amo nga nakahalin kami nga wala maano. Pagkadason nga mga tinuig, madamo sang nagtambong sadto nga pagtinipon ang nangin Saksi. Subong, sobra 50 halin sa amon baryo, nga may pumuluyo nga mga 1,000 ang nangin Saksi ni Jehova.

Ang Bata sang Manugbantay

Pila ka bulan antes sang kombension sang mga Saksi ni Jehova sa Moscow, Rusya, sang Agosto 1993, nakilala ko si Gulmira nga isa  ka Saksi nga taga-Kirghiz. Ang iya pamilya mga manugbantay man sing karnero. Sang 1988, sang ginadumilian ang hilikuton sang mga Saksi sa Union Sobyet, nagtuon sa Biblia ang nanay ni Gulmira upod sa Saksi nga si Aksamy. Sang katuigan 1970, si Aksamy amo ang una nga Kirghiz nga Saksi ni Jehova sa sini nga lugar.

Sang ulihi, nagtuon man si Gulmira sa Biblia upod sa iya iloy. Sang 1990, ginbawtismuhan sila. Bangod sa gugma ni Gulmira kay Jehova, nangin bug-os tion sia nga ministro ukon payunir.

Sa sulod sang duha ka tuig, talagsa lang kami nagakit-anay ni Gulmira kay ang akon ginaistaran mga 160 kilometros ang kalayuon. Sang Marso 1995, nagdesisyon ako nga pangaluyagan sia. Gani isa ka adlaw, ginkadtuan ko sia sa ila balay. Nakibot ako nga manuglakat na sia pagkaaga sa branch office sa Rusya, nga sobra 5,633 kilometros ang kalayuon!

Sadto nga tion, isa na ako ka bug-os tion nga ministro. Nagatuon ako sing Russian kay wala pa sing literatura sang mga Saksi sa Kirghiz nga lenguahe. Sa sulod sang tatlo ka tuig, nagasulatay kami ni Gulmira kag nagabasa sing pareho nga mga teksto sa Biblia para makapalig-unanay. Sa sini nga tion, nagaalagad ako sa una nga kongregasyon nga nagahambal sing Kirghiz sa banwa sang Balikchi.

Pag-alagad Upod kay Gulmira

Sang 1998, nagbakasyon si Gulmira sa Kyrgyzstan kag nagpakasal kami. Dayon, nag-alagad kami sa branch office sang Rusya. Maayo lang kay sang una, nakatuon na ako sing Russian nga lenguahe! Sang ulihi, gin-asayn ako nga mag-translate sing mga literatura sa Biblia sa Kirghiz. Nangamuyo ako nga hatagan ako ni Jehova sing kaalam kag pagbatas. Siempre, daku man nga bulig nga kaupod ko si Gulmira sa trabaho.

Sang 2004, ang amon translation team ginsaylo sa Bishkek. Gintangdo ako subong isa sa mga komite nga nagadumala sa hilikuton sang mga Saksi ni Jehova sa Kyrgyzstan. Sadto nga tion, may ara na pito ka Kirghiz nga kongregasyon kag sobra 30 ka Russian nga kongregasyon sa sini nga pungsod. Subong, sobra na 20 ang Kirghiz nga kongregasyon kag madamo pa sing mga grupo, nga mga 40 porsiento sang 4,800 ka Saksi sa Kyrgyzstan.

Nagtuon kami ni Gulmira sing Ingles kay kabalo kami nga makabulig ini sa amon pagwali. Bangod sini, sang 2008, gin-imbitahan kami sa world headquarters sang mga Saksi ni Jehova sa Estados Unidos. Didto, nagtambong ako sa eskwelahan para sa mga nagadumala sang pagwali sa isa ka pungsod.

Sa karon, mas makabulig na gid kami ni Gulmira para atipanon ang espirituwal nga kinahanglanon sang mga tawo sa Kyrgyzstan. Bangod sa amon mga eksperiensia, napamatud-an namon nga si Jehova isa gid ka mahigugmaon nga manugbantay. Nabatyagan ko nga matuod gid ang ginasiling sang Biblia: “Si Jehova ang akon Manugbantay. Indi ako pagkulangon. Ginapaluko niya ako sa madabong nga halalban; Ginadala niya ako sa mga palahuwayan sa higad sang linaw. Ginapapagsik niya ako. Ginatuytuyan niya ako sa mga banas sang pagkamatarong tungod sa iya ngalan.”—Salmo 23:1-3, NW.

[Retrato sa pahina 23]

Ang amon mga karnero sa halalban

[Retrato sa pahina 23]

Ginaisip namon ang mga karnero kada gab-i para masiguro nga wala sing nadula

[Retrato sa pahina 24]

Upod kay Gulmira karon