PAREHO kanday Marie kag Theresa, minilyon sa bilog nga kalibutan ang nagapangamuyo sa mga “santos” para pakamaayuhon. Suno sa New Catholic Encyclopedia, “ang mga santos amo ang nagapatunga para sa mga tawo,” kag ‘nagabulig sila nga mabaton ang mga pagpakamaayo halin sa Dios.’

Pero, paano ini ginatamod sang Dios? Batunon bala niya ang aton pangamuyo kon ipaagi naton ini sa mga “santos”? Binagbinaga ang ginasiling sang Biblia.

Sa pila ka bersion sang Biblia, ang Griegong tinaga para sa “saint” ukon santos nagakahulugan, “isa nga balaan.” Pero, wala ka sing mabasa sa Biblia nga may matutom nga alagad sang Dios nga nangamuyo sa “santos.” Ngaa? Ang New Catholic Encyclopedia nagsiling nga sang “ikatlo nga siglo [lang] nagsugod ang pagpati nga ang mga santos makapatunga” para sa mga tawo. Mga 200 ka tuig ini pagkatapos mapatay si Cristo. Kon amo, ini nga panudlo wala naghalin kay Jesus kag sa inspirado nga mga manunulat sang Biblia nga nagsulat parte sa iya ministeryo. Ngaa?

Sulitsulit nga ginatudlo sang Biblia nga dapat mangamuyo lamang kita sa Dios paagi sa ngalan ni Jesucristo. “Ako ang alagyan, ang kamatuoran kag ang kabuhi,” siling ni Jesus. “Wala sing makakadto sa Amay kon indi paagi sa akon.” (Juan 14:6, Biblia sang Katilingban sang mga Kristiano, BKK) Ining maathag nga mga pinamulong nahisanto gid sa gintudlo ni Jesus nga narekord sa Mateo 6:9-13. Sang gintudluan niya ang iya mga sumulunod kon paano mangamuyo, sia nagsiling: “Gani, mangamuyo kamo sa sining paagi: Amay namon nga yara sa langit,  pakabalaanon ang imo ngalan. . . . ” (Mateo 6:9) Maathag nga ang aton Amay sa langit amo lamang ang aton pangamuyuan. Ini nga kamatuoran nabase sa importante nga prinsipio sang Biblia.

“Ang pangamuyo,” siling sang The World Book Encyclopedia, “amo ang matinahuron nga mga pulong kag panghunahuna nga ginapatuhoy sa Dios, mga dios, mga diosa, kag iban pa nga butang sang pagsimba. . . . Ang pangamuyo isa ka importante nga porma sang pagsimba sang halos tanan nga relihion sa bilog nga kalibutan.” (Italiko amon.) Pamangkuta ang imo kaugalingon, ‘Magluwas sa aton Manunuga kag Manughatag sing Kabuhi, husto bala nga mangamuyo kita ukon magsimba sa iban?’ (Salmo 36:9) “Ang matuod nga mga sumilimba,” siling ni Jesus, “magasimba sa Amay sa espiritu kag kamatuoran, kay sa pagkamatuod amo sini ang ginapangita sang Amay nga magsimba sa iya.” (Juan 4:23) Ang Biblia nagasiling man nga ‘indi gid gusto sang aton Manunuga nga may ginasimba kita nga iban nga dios.’—Deuteronomio 4:24; 6:15, APD.

Binagbinaga ang halimbawa sang Cristiano nga si apostol Juan. Sang makakita sia sing makatilingala nga palanan-awon halin sa anghel, nga narekord sa tulun-an sang Bugna, nakibot gid sia amo nga ‘nagluhod sia sa tiilan sang anghel agod simbahon ini.’ Ano ang reaksion sang anghel? Nagsiling ini: “Maghalong ka! Indi ina paghimua! Masigkaulipon mo ako kag sang imo mga kauturan . . . Simbaha ang Dios.” (Bugna 22:8, 9) Ginapakita sini nga si Jehova nga Dios gid lang ang dapat naton simbahon.

Ang Dios gid lang ang “nagapamati sang mga pangamuyo.” (Salmo 65:2) Dugang pa, bangod sia ang Labing Gamhanan, sia lamang ang may awtoridad, ihibalo, kag gahom sa pagsabat sa bisan ano nga pangamuyo. (Job 33:4) Gin-aku ni Jesucristo nga may mga limitasyon sia. (Mateo 20:23; 24:36) Pero, ginhatagan sia sing daku nga awtoridad, pati na ang pagpatunga para sa mga tawo.

Ang Biblia nagsiling parte kay Jesus: “Maluwas man niya sing bug-os ang mga nagapalapit sa Dios paagi sa iya, bangod padayon sia nga nagakabuhi agod mangabay para sa ila.” (Hebreo 7:25) Ginapakita sini nga mahimo si Jesus mangin Manugpatunga sang mga tawo nga “nagapalapit sa Dios paagi sa iya.” Wala ini nagakahulugan nga mangamuyo kita kay Jesus, dayon ipasa niya ini sa Dios. Kundi, dapat mangamuyo kita sa Dios paagi sa ngalan ni Jesus. Nagapakita ini nga ginakilala naton ang iya papel. Ngaa si Jesus ang pinakamaayo nga Manugpatunga?

Una, si Jesus nangin tawo amo nga maintiendihan gid niya ang pag-antos sang katawhan. (Juan 11:32-35) Isa pa, ginhigugma niya ang mga tawo kay gintudluan niya sila parte sa Dios, gin-ayo ang mga nagabalatian, kag ginbanhaw ang mga patay. (Mateo 15:29, 30; Lucas 9:11-17) Nagpatawad pa gani sia sang mga sala. (Lucas 5:24) Nagapasalig ini sa aton nga kon makasala kita, “may manugbulig kita nga kaupod sang Amay, si Jesucristo, isa nga matarong.”—1 Juan 2:1.

Dapat sundon naton ang gugma kag pagkamaluluy-on ni Jesus. Bisan indi kita mga manugpatunga, puede naton ipangamuyo ang iban bangod ginahigugma naton sila. “Ipangamuyo ninyo ang isa kag isa,” siling ni Santiago. “Ang pag-ampo sang matarong nga tawo, kon nagapanghikot, . . . may daku nga puersa.”—Santiago 5:16.

Natun-an nanday Marie kag Theresa ining mga kamatuoran kay gin-usisa nila ang Biblia. Ginaagda ka sang mga Saksi ni Jehova nga usisaon man ini. Subong ginsiling ni Jesus, “ang mga nagasimba sa [Dios] dapat magsimba sa espiritu kag kamatuoran.”—Juan 4:24.