Halin sa Amon mga Bumalasa

Mga Pagpakamaayo nga Labaw pa Sangsa Manggad (Marso 2009) Ginsambit sini nga artikulo si Kostas nga nagsiling: “Indi luyag sang Dios nga himud-usan gid naton ang manggad.” Abi ko basta unahon mo si Jehova, indi Sia magpasilabot kon daw ano kadamo ang imo pagkabutang. Malain bala nga mangin manggaranon samtang matutom ka nga nagaalagad kay Jehova?

J. D., Estados Unidos

Sabat sang “Magmata!”: Wala nagasiling ang Biblia nga malain ang manggad. Madamo sa mga alagad sang Dios sang una ang manggaranon. (Genesis 25:5; 26:12-16; Job 1:1-3) Pero, dapat tandaan sang mga manggaranon nga ‘ang pagpadayawdayaw sang palangabuhian sang isa—indi gikan sa Amay, kundi gikan sa kalibutan.’ (1 Juan 2:16) Si apostol Pablo nagsiling man: “Ang gugma sa kuarta amo ang gamot sang tanan nga sahi sang makahalalit nga mga butang.” Nagsiling man sia nga bangod gin-una sang iban ang manggad sangsa Dios, “nagtalang [sila] gikan sa pagtuo kag nagbuno sang ila kaugalingon sang madamo nga kasakit.” (1 Timoteo 6:10) Wala nagasiling ang Biblia nga ang mga manggaranon dapat makonsiensia kay mas madamo sila sing manggad sangsa iban. Ginapalig-on ang mga Cristiano, manggaranon man ukon imol, nga “mangin maalwan.”—1 Timoteo 6:18.

Wala sing Tingog Apang Mabatian (Oktubre 2008) Napalig-on gid ako sa sining artikulo parte kay Hillary nga may Rett syndrome. Ang akon apo nga lima ka tuig indi makakita, makabati, makalakat, makahambal, ukon makapungko. Subong, nagalaum na ako nga kon kantahan ko sia, basahan, istoryahon, kag hapulason ukon masaheon, mabatyagan niya ini. Naghibi ako sang mabasa ko ang ginsiling sang iloy ni Hillary: “Bisan indi ko mabatian ang iya ginahambal, mabatian sia ni Jehova.” Narealisar ko nga bisan indi makahambal ang akon apo, nahibaluan ni Jehova kon ano ang ara sa iya tagipusuon.

M. A., Japan

Ang akon bata nga babayi, 43 anyos na. Pero subong ko lang naintiendihan ang iya kahimtangan sang nabasa ko ini nga artikulo. Nabatyagan ko gid ang ginabatyag sang iloy kag utod nga babayi ni Hillary. Bisan pa malayo kami sa ila, naintiendihan ko gid sila. Ginaapresyar ko ang ila mabakod nga pagtuo, gugma, kag pagbatas.

T. Y., Ghana

Aborsion—Indi Mahapos nga Solusyon (Hunyo 2009) Madamo gid nga salamat sa inyo mga artikulo parte sa aborsion. Sang mga 25 anyos ako nagpahulog ako. Ginhinulsulan ko gid ini. Siguro kon wala ko matun-an ang kamatuoran, malalain gid ako. Maayo lang kay nahibaluan ko nga si Jehova mapinatawaron kag ginhatagan niya ako sing paglaum.

Ginhinago ang ngalan, Estados Unidos

Pamangkot sang mga Pamatan-on . . . Paano Ko Atubangon ang Kamatayon sang Akon Ginikanan? (Agosto 2009) Beinte dos anyos lang ako sang mapatay si tatay. Wala ko ini ginapaabot amo nga naglalain gid ako. Subong sang ginsiling sini nga artikulo, hidlawon gid ako sa iya ilabi na sa importante nga mga tion sang akon kabuhi. Bisan tatlo na ka tuig ang nagligad, nabudlayan gihapon ako nga wala sia. Pero nakapaumpaw gid sa akon ini nga artikulo. Bisan pa mabudlay himuon, ang mga panugda diri nakabulig gid sa akon. Salamat gid sa inyo maayo nga mga balasahon.

N. P., France