Halin sa Amon mga Bumalasa

Ang Krisis sa Tubig—Ano Na ang Ginhimo nga Solusyon? (Enero 2009) Indi ako ugyon sa konklusion sini nga artikulo. Sa baylo nga hambalan ang mga bumalasa nga magbulig sa paghimo sang mga bubon, suportahan ang mga programa sa pagkinot sang tubig, ukon magpangita sang iban pa nga solusyon, ang artikulo nagasiling: “Ang matuodtuod nga makasolbar sa sini nga problema amo ang Dios, indi ang tawo” kag Iya “‘himuon nga bag-o ang tanan nga butang.’ (Bugna 21:5)” Bisan pa maayo ini nga balita, indi bala mas maayo kon magbuligay kita anay subong? Kadamo sing problema sa sini nga kalibutan. Bisan pa naplano na sang Dios ang solusyon, indi kita dapat magpahimunong na lang samtang nagapanghalit ang Yawa.

S. S., Estados Unidos

Sabat sang “Magmata!”: Indi katuyuan sini nga artikulo nga ipakita nga wala na sing responsibilidad ang mga tawo nga magtinguha para solusyonan ini nga problema. Subong sang ginsiling sang artikulo, “ginhatag sang Dios sa mga tawo ang responsibilidad sa pag-atipan sang duta.” Madamo na kami sing ginbalhag nga mga artikulo sa amon mga dyurnal nga nagapalig-on sa mga bumalasa nga maghimo sing mga tikang para amligan ang duta kag ang palibot. Pero makapasubo nga ang mga panikasog sang tawo para amligan ang duta masami nabalabagan sang mga kasuguan nga nagapabor sa pag-uswag sang ekonomiya sangsa pag-amlig sa palibot, kag subong man sang pagkasakon kag pagkamaiyaiyahon sang indi perpekto nga mga tawo. Amo ina ang rason kon ngaa nagsiling kami nga “ang matuodtuod nga makasolbar sa sini nga problema amo ang Dios.”

Duta—Gindesinyo Para sa Kabuhi (Pebrero 2009) Sa karon nga ang mabasa naton nga mga balita parte sa pag-init sang globo nagapakulba lang sa aton, ini nga mga artikulo naghatag sa akon sing kalinong. Napalig-on man ako nga sa ulihi ang duta mangin paraiso, diin ang mga tawo magaistar nga may paghidait kag may maayo nga kaangtanan sa Dios. Madamo gid nga salamat.

M. H., Japan

Ang Dyslexia Wala Makapugong sa Akon (Pebrero 2009) May dyslexia man ako, pero nahangpan ko lang sing maayo ang akon balatian sang nagmisyonero kami nga mag-asawa kag kinahanglan ko magtuon sing bag-o nga lenguahe. Napabakod gid ako sini nga artikulo, labi na sang kahon sa pahina 22, kay nahangpan ko kon ano gid ini nga balatian. Napabakod ako sang nabasa ko kon paano natun-an ni Michael Henborg ang madamo nga lenguahe. Madamo gid nga salamat.

M. M., Tanzania

Pamangkot sang mga Pamatan-on . . . Ano ang Himuon Ko Para Manamian Ako sa Pagbasa sing Biblia? (Abril 2009) May problema ang akon panan-aw, kag Braille ang ginagamit ko sa eskwelahan. Nanamian gid ako sa inyo mga publikasyon, kay nakabulig ini sa akon nga maatubang ang akon mga problema. Pirme ako nagapamati sa inyo mga cassette kag audio CD para tawhay ang akon pensar antes magtulog. Lima ka beses ko na nga ginpamatian ini nga artikulo kag madamo ako sing natun-an para mag-uswag ang akon personal nga pagtuon.

S. H., Pransia