Pinasahi nga Aman Para sa Katawhan

INDI lamang hangin, pagkaon, kag tubig ang kinahanglan sang mga tawo. Agod mangin malipayon gid kita, dapat naton pun-an ang aton espirituwal nga kinahanglanon. Dapat naton mahibaluan kon ano ang katuyuan sang aton kabuhi kag kon ngaa yari kita diri. Amo gani nga si Jesucristo nagsiling: “Malipayon ang mga mahunahunaon sang ila espirituwal nga kinahanglanon.”​—Mateo 5:3.

Agod mapun-an ang aton espirituwal nga kinahanglanon, gin-aman sang Dios ang Balaan nga Biblia. Ini ang pinakalapnag nga libro nga napanagtag sa bug-os nga kalibutan kag mabasa karon sing bug-os ukon ang bahin sini sa 2,400 ka lenguahe. (2 Timoteo 3:16) Ang Biblia nagsiling nga gintuga sang Dios ang uniberso kag ang tanan nga kabuhi sa duta. (Genesis, kapitulo 1 kag 2) Ginasugid man sini sa aton nga gintuga niya ang duta sa sulod sang anom ka “adlaw,” ukon mga hut-ong sang tion nga sibu sa ginabasihan sang mga sientista.

Ginapakita man sang Biblia kon ano ang katuyuan sang Dios para sa katawhan. Narekord ini sa Salmo 37:29: “Ang mga matarung magapanubli sang duta kag magapuyo dira sa gihapon.” Talupangda nga ang mga matarong, ukon ang mga tawo nga mataas sing moral kag nagasunod sa mga prinsipio sang Biblia, magakabuhi sing walay katapusan, indi sa langit, kundi  sa duta. Siempre pa, indi ini mahigko kaangay sang ginapuy-an naton karon, kundi mangin isa ini ka paraiso nga duta.​—Salmo 104:5; Lucas 23:43.

Ang Ihibalo nga Nagadul-ong sa Kabuhi

May duha ka sahi sang paraiso​—ang pisikal kag espirituwal. Ang Isaias 11:9 nagasiling: “Ang duta matugub sang pagkilala sa GINOO subong nga ang mga tubig nagatabon sang dagat.” Ini nga ihibalo natudok gid sa matuod nga mga Cristiano, gani napahulag sila nga magkabuhi sing mahidaiton kag may paghiusa. Dugang pa, ginasunod gid nila ang pangamuyo ni Jesus: “Ini nagakahulugan sang kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”​—Juan 17:3.

Kon luyag mo nga makatuon sing dugang pa tuhoy sa paglaum nga ginsambit sa Biblia, nalipay gid ang mga Saksi ni Jehova nga tun-an ka sa Biblia sing walay bayad. *

[Nota]