Pagbantay sa Kalibutan

▪ Ang Web site sang mga Saksi ni Jehova (www.watchtower.org) nagaaman na subong sing impormasyon sa 314 ka lenguahe. Sang nagligad nga tuig, kapin sa 22 milyones ang nagbukas sa sini nga Web site​—buot silingon may kadamuon nga kapin sa 60,000 kada adlaw.

▪ “Ang isa sa pinakamabudlay nga problema nga ginaatubang karon sang bug-os nga kalibutan amo ang pagtigayon sing ilimnon kag bugana nga tubig para sa tanan. . . . Sa masami, mas mahapos pa matigayon ang mga armas sangsa tubig.”​—BAN KI-MOON, SEKRETARYO HENERAL SANG UN.

Kalipay kag Ikaayong Lawas

Madugay na nga ginapatihan nga ang malipayon kag positibo nga tawo mas mapagros sangsa mga tawo nga problemado, maakigon, ukon negatibo. Sa isa ka pagtuon sining karon lang, naghinakop ang mga manugpanalawsaw nga ang mga tawo nga “masinadyahon” may diutay lamang nga cortisol. Ang cortisol isa ka stress hormone nga kon magdamo sa aton lawas mahimo bangdan sang pagbalatian. Ang “duha ka protina nga nagapahibalo sang pagpalanghubag sang lawas” manubo man sa sini nga sahi sang mga tawo. Suno kay Dr. Andrew Steptoe sang University College, London, “ang aton panimuot ukon disposisyon wala lamang nagadepende sa batasan nga aton napanubli sa aton mga ginikanan, kundi sa aton man pagpakig-angot sa iban kag kon nagabatyag kita nga may direksion ang aton kabuhi.”

Nangin Moderno Na ang Pagtan-aw sa Bulan

Ginatos na ka tuig nga ginabantayan sang mga Muslim ang una nga pagua sang lati, nga amo ang katapusan sang Ramadan kag pagsugod sang Hariraya Puasa. Sa iban nga duog, wala sila sing mga instrumento nga makabulig sa pagtan-aw sa bulan, kag ginasugiran na lang ang mga Muslim sang ila mga lider sa simbahan kon lati na. Apang, sang nagligad nga pila ka tuig, gintugutan na sang pila ka klerigo ang paggamit sang moderno nga pamaagi. Ang mga astronomo sa Iran, upod sa mga klerigo nga nagapat-od sa pagsugod sang lati, nagagamit na karon sing moderno nga mga teleskopyo, mga instrumento nga makakita sa dulom, kag eroplano pa gani nga may moderno nga mga instrumento sa pagtan-aw sa bulan. Kon temprano pa nila ini makita, temprano man magsugod ang ila selebrasyon.

Ikasarang sang Lapsag sa Pagpanilag sing Batasan?

Ang anom ka bulan nga mga lapsag makapalambo na sang “ikasarang sa paghibalo sang batasan sang tawo antes pa sila makahambal,” siling sang mga manugpanalawsaw sa Yale University, U.S.A. Ginpatan-aw sa mga lapsag nga nagaedad sing anom tubtob napulo ka bulan ang isa ka daku sing mata nga hampanganan nga nagasaka sa banglid, samtang ang iban nga hampanganan nagabulig sa iya kag ang iban naman nagatikwang. Nian “ginpakita sa mga bata ang mga hampanganan agod mahibaluan kon diin ang gusto nila nga hampangan. Halos tanan nga lapsag nagpili sang mabinuligon nga hampanganan,” paathag sang Houston Chronicle. Gani ginapakita sini, nga “bisan ang mga lapsag makahibalo magpili kon sin-o ang salawayon kag kon sin-o ang maayo nga mga kahampang,” siling sang pamantalaan.

“Kauhaw sa Ginabaligya nga Tubig nga Ilimnon”

“Ang kauhaw sang mga Amerikano sa ginabaligya nga tubig nga ilimnon daw indi maumpawan, kay nagakonsumo sila sing halos 30 bilyones sini kada tuig,” siling sang U.S.News & World Report. Apang, likom sa ihibalo sang madamo nga konsumidor, ang ila gali ginabakal nga tubig naghalin lang sa gripo, gani ang “bisan sin-o nga nagahunahuna nga de-kalidad nga tubig ang ila ginbakal para sa ila ikaayong lawas, nadayaan gid,” siling sang magasin. Sa madamo nga pungsod, ang tubig nga naghalin sa gripo ginausisa sing maayo agod makapasar sa mataas nga talaksan sang ila gobierno. Kag kon ipaanggid sa “tuman ka mahal” nga tubig nga ilimnon, ang tubig sa gripo “tuman ka barato!”