“Salamat sa Inyo Daku nga Gugma sa mga Tawo”

SUNO SA MANUNULAT SANG MAGMATA! SA RUSYA

▪ Sa siudad sang Chita sa sidlangan sang Siberia, ang kongregasyon sang mga Saksi ni Jehova naggamit sing isa ka kuarto sa eskwelahan para hiwatan sang ila pagtuon sa Biblia tubtob nakasaylo sila sa ila bag-o nga Kingdom Hall. Ginhuptan sang mga Saksi nga matinlo ang kuarto, kag ginkay-o ang mga guba. Mga mabuot man sila kag matinahuron, amo nga ang mga direktor sang eskwelahan nagsulat agod pasalamatan ang kongregasyon.

Ang isa ka bahin sini nga sulat nagsiling: “Salamat sa inyo daku nga gugma sa mga tawo, nga ginapakita gid ninyo sa tanan nga tawo nga inyo masumalang. Salamat man sa inyo pagwali kag pagbulig sa tanan. Sa mga tinuig nga nag-inupdanay kita, indi gid namon malipatan ang amon natun-an gikan sa inyo. Ginapakita sini nga ang mga tawo nga nagapati sa Dios mga disente, maukod, mabuot, kag labaw sa tanan, mga tawo nga may tulumuron, pagtuo, kag katuyuan sa kabuhi.” Ini nga pagpasalamat ginaapresyar sang mga Saksi ni Jehova.

▪ Sa nakatundan, mga 5,500 ka kilometro gikan sa Chita, ang isa ka tiglawas sang sanga talatapan sang mga Saksi ni Jehova sa Rusya gin-agda sa isa ka pinasahi nga kahiwatan nga gin-organisar sang pamunuan sang distrito sang St. Petersburg. Ngaa? Bangod kada tuig, kon matunaw na ang yelo, ang mga Saksi sa amo nga lugar nagabulig sa pagpanguha sa mga basura nga nagtipon sa 60 kilometros nga dalan nga malapit lang sa sanga talatapan. Ang ila ginhimo naghatag sing kaayuhan sa komunidad. Agod pasalamatan ini, pormal nga ginhatag sang isa ka opisyal sa tiglawas sang sanga ang isa ka sertipikasyon sang pagpasidungog. Mapagsik nga nagpinalakpak ang mga tumalambong. Talalupangdon nga sang nagsala ang humalambal sa pagmitlang sang ngalan nga Jehova, gilayon nga ginhambal sa iya sang pila ka indi Saksi nga tumalambong ang husto nga pagmitlang sini. Pamatuod ini nga pamilyar sila sa ngalan sang Dios kag sa mga Saksi ni Jehova.

Ang panguna nga rason kon ngaa pamilyar sini ang mga tawo amo ang pagbantala sa publiko sang mga Saksi ni Jehova. Mga 150,000 na subong ang mga Saksi sa Rusya. Ang ila tulumuron amo ang padayon nga pagpakita sing “daku nga gugma sa mga tawo” paagi sa pagsugid sing makapalugpay nga mensahe gikan sa Biblia sa tanan nga magapamati.​—Mateo 22:39.

[Retrato sa pahina 29]

Ginbaton sang sanga talatapan sang Rusya ang sertipikasyon sang pagpasidungog