Gikan sa Amon mga Bumalasa

Ang Pagtuo sang Isa ka Bata (Agosto 2006) Ginakalangkagan ko nga makita si Dustin, nga mapagros nga nagaduludalagan kag nagalumpatlumpat, upod sa minilyon nga nagkalamatay, sa bag-ong kalibutan nga malapit na lang mag-abot.

A. A., Sri Lanka

Natandog gid ako sang pagtuo kag kaisog ni Dustin. Ang iya eksperiensia nakabulig sa akon nga binagbinagon ang kahulugan sang kamatuoran sa akon kabuhi kag magpahamtang sing husto nga mga prioridad. Narealisar ko karon nga dapat ko unahon ang paghupot sing maayo nga kaangtanan kay Jehova kag ang mga butang may kaangtanan sa Ginharian.

M.C.V., Brazil

Natandog gid ang akon balatyagon sang makapalig-on nga apresasyon ni Dustin sa kamatuoran. Ginpakita niya nga luyag gid niya pahamut-an si Jehova kag buligan ang iban. Kaangay ni Dustin, luyag ko man nga ‘matapos ang dalaganon kag matipigan ang akon pagtuo’!

M. N., Japan

Pito ka tuig ang akon edad. Salamat sa pagbalhag ninyo sini nga eksperiensia. Nagdayaw gid ako sa mabakod nga pagtuo ni Dustin kay Jehova, bisan pa may balatian sia nga indi mabulong. Ang iya huwaran nagpalig-on sa akon nga magmakugi pa gid sa akon pag-alagad sa Dios.

T. D., Italya

Makawiwili nga mga Desinyo sa mga Tanom (Septiembre 2006) Ginwili ako sini nga artikulo sa sulod sang isa ka oras kag tunga! Madamo gid ako sing natun-an sa sini! Naghimo pa ako sing mga dayagram agod mahangpan ko ini sing maayo. Apang, palihug talupangda nga ang fraction nga 13/21 indi amo ang ginatawag nga bulawanon nga proporsion sang isa ka tipulon, kundi amo ang nabilin nga proporsion sang 222.5 degrees.

L. C. Estados Unidos

Sabat sang “Magmata!”: Ginpatalupangod sang pila ka bumalasa nga mga 222.5 degrees ang bulawanon nga proporsion sang isa ka tipulon. Ngaa nga suno sa amon artikulo ang bulawanon nga anggulo 137.5 degrees​—ang takus kon takson sing paatras ini man gihapon nga anggulo? Ang Website sang MathWorld nagsiling: “Ang bulawanon nga anggulo amo ang anggulo kon tungaon ang isa ka tipulon [360°] sa bulawanon nga proporsion (apang gintakus sing paatras amo nga kubos ini sa 180°).” Agod ipaathag kon ngaa amo sini ang pagtakus sang mga matematiko kag mga sientista sa bulawanon nga anggulo, ang taga-Britanya nga matematiko nga si Dr. Ron Knott nagsiling: “Ang mas gamay nga anggulo ang amon ginatan-aw.” Gani, bisan pa nga ang husto nga proporsion mga 13/21 (labaw sa katunga), kinaandan na nga 137.5 degrees (kubos sa katunga) ang takus sang bulawanon nga anggulo.

“Ginbilanggo Bangod Sang Ila Pagtuo” (Abril 2006) Indi ako isa sa mga Saksi ni Jehova, apang daku gid ang akon pagtahod sa mga miembro sang inyo relihion. May nakilala ako nga pila ka Saksi sang mabilanggo ako sa kampo konsentrasyon sang Gross-Rosen kag Buchenwald. Huwaran gid ang ila paggawi kag talalupangdon gid ang ila pagtuo amo nga gintahod sila kag gindayaw sang iban nga mga bilanggo. Gindayaw man sila pati sang mga guardia nga SS. Bukas pirme ang akon ganhaan para sa mga Saksi ni Jehova.

P. V., Estados Unidos