Gikan sa Amon mga Bumalasa

Pamangkot sang mga Pamatan-on . . . May Problema Bala Ako sa Pagkaon? (Oktubre 2006) Sang mabasa ko ini nga artikulo, ginsubuan gid ako. Madugay na ako nga nagapakigbato sa problema sa pagkaon. Ginpabatyag sa akon sini nga artikulo nga dapat “nasolbar” ko na ini sang pamatan-on pa ako. Apang, tubtob karon ginapakigbatuan ko gihapon ining mabudlay gid nga problema, kag pamatyag ko wala na ako sing mahimo sa sini. Daw ginpahangop sa artikulo nga malandas ini sang isa kon may mabakod lamang sia nga pagtuo.

J. J., Estados Unidos

Sabat sang “Magmata!”: Bisan pa ang mga topiko nga ginabinagbinag sa mga serye sang “Pamangkot Sang mga Pamatan-on . . .” panguna na nga gintuyo para sa mga pamatan-on, ang mga prinsipio sa Biblia nga ginaunod sini nga mga artikulo naaplikar sa tanan. Nahibaluan namon nga ang problema sa pagkaon isa sa labing mabudlay nga mga balatian nga dapat landason. Wala ginsiling sang artikulo nga ang mga nagapakigbato sa problema sa pagkaon kulang sing pagtuo. Ginpanugda lamang sini nga ang mga nagapakigbato makapangamuyo kay Jehova para sa bulig agod malandas ini. Dugang sa pagpakitluoy sa Dios para sa bulig, ginapalig-on man ang mga biktima nga mangayo sing bulig sa ila “ginikanan ukon sa iban nga hamtong.” Subong man, maathag nga ginbaton sang artikulo nga “ang pagpanikasog nga mag-ayo indi mahapos” kag mahimo nga maglukmat ini liwat. Ang katunayan nga padayon ka gihapon nga nagapakigbato sa problema sa pagkaon pagkatapos sang madamo nga tinuig nagapakita nga luyag mo gid nga mag-ayo.

Pamangkot sang mga Pamatan-on  . . . Ano ang Dapat Ko Himuon sa Akon Kabuhi? (Hulyo 2006) Manuggradwar na ako sa kolehiyo, kag dapat ko na planuhon ang akon kabuhi. Bangod sini nga artikulo nangin determinado pa gid ako nga lab-uton ang akon tulumuron nga magsulod sa bug-os tion nga ministeryo. Wala na sing iban pa nga hilikuton nga mas mapuslanon kag makahatag sa akon sing labi nga kalipay.

H. W., Hong Kong

Nagapasalamat gid ako sa sini nga artikulo bangod nagbulig ini sa akon sa paghangop nga sa sining materyalistiko nga kalibutan, ang pinakamaayo nga mahimo sang mga pamatan-on kaangay ko amo ang pag-una sa espirituwal nga mga tulumuron.

A. S., Brazil

Bangod masako ako adlaw-adlaw, masami nga wala na sa bungog ko ang akon mga tulumuron. Sang mabasa ko ini nga artikulo nangin determinado ako liwat nga himuon ang akon bug-os nga masarangan agod alagaron si Jehova. Madamo gid nga salamat sa inyo pag-ulikid sa amon nga mga pamatan-on.

E. M., Japan

Kon Paano Magtukod sing Isa ka Malipayon nga Pag-asawahay (Hulyo 2006) Kanami gid sini nga mga artikulo. Ang paggamit sang halimbawa ni Jesus kag sang iya pagpakig-angot sa iya mga apostoles agod ipakita kon paano dapat pakig-angutan sang magtiayon ang isa kag isa nagakaigo gid. Padayuna palihug ang pagbalhag sing kaangay sini nga mga artikulo. Ginakalangkagan gid namon ang aton mga magasin kada bulan.

S. C., Estados Unidos

Sang Una Wala sing Paglaum Karon Malipayon Na (Hulyo 2006) Kaangay ni Utod González, nagabatyag man ako nga di-takus. Nangatarungan ako, ‘Ayhan indi gid ako paghigugmaon ni Jehova, ilabi na kay may nahimo ako nga sala sang una.’ Makapalig-on mahibaluan nga si Jehova maluluy-on, mapinatawaron, kag mahigugmaon gid! Paagi sa mga laygay kag mahigugmaon nga suporta gikan sa kongregasyon, kag sa balaan nga espiritu ni Jehova, naaplikar ko ang mga kamatuoran sang Biblia sa akon kabuhi. Salamat gid sa sining suno sa tion nga espirituwal nga pagkaon.

T. A., Estados Unidos