Buligi ang mga Pamatan-on nga Matigayon ang Ila mga Kinahanglanon

KINAHANGLAN sang mga pamatan-on nga may istoryahon sila tuhoy sa ila mga tulumuron, mga paglaum, kag mga problema. Kinahanglan man nila ang maayo nga mga abyan. Samtang nagahamtong sila, kinahanglan sang mga pamatan-on ang identidad kag pagkapinasahi subong indibiduwal. Kon ginabuligan sang mga ginikanan ang ila kabataan nga matigayon ini nga mga kinahanglanon, ginaamligan nila ang ila kabataan gikan sa pagpakig-abyan nga mahimo makahalit, lakip na ang mga napalambo sa Internet.

▪ Kinahanglan sang mga pamatan-on nga makighambal. Kon tuhoy sa pagpabutyag sang ila balatyagon, ang mga pamatan-on daw mahuluy-on ukon hipuson. Apang, saligi nga luyag nila nga makighambal—huo, sa imo, nga ila ginikanan—tuhoy sa importante kag indi gid man importante nga mga butang. Ang pamangkot amo, Handa ka bala kag luyag mamati sa ila?—Santiago 1:19.

Indi pagtuguti ang mga pag-ipit sa kabuhi nga magpugong sa imo sa paghimulos sa kahigayunan nga masugilanon ang imo kabataan. Kon ginabudlayan ka nga himuon ini, mahimo nga tion na nga hunahunaon sing serioso ang maalamon nga laygay sang Biblia: ‘Pat-ura ang mas importante nga mga butang.’ (Filipos 1:10) Ano pa ang mas importante sangsa imo kabataan?

Indi maghinakop dayon nga mas luyag sang mga pamatan-on nga magdangop sa ila mga katubotubo para sa laygay sangsa ila ginikanan. Sa isa ka surbe, kapin sa 17,000 ka estudyante halin sa ika-6 tubtob sa ika-12 nga grado ang ginsilingan nga graduhan halin sa 0 tubtob 5 kon daw ano kadaku ang impluwensia sang ila ginikanan, mga abyan, mga artista, media, kag mga manunudlo. Ang sabat nga 0 nagakahulugan nga wala sing impluwensia, kag ang 5 daku gid ang impluwensia. Halos katunga ang nagsabat sing 5 para sa ila ginikanan.

Sing maathag, subong isa ka ginikanan may daku ka nga papel sa pag-impluwensia sa pamatasan kag tulumuron sang imo kabataan. “Mahimo nga indi mo sila maimpluwensiahan sang tanan mo nga ginahambal,” siling sang isa ka iloy. “Apang kon wala mo sila ginasugilanon, indi mo gid sila maimpluwensiahan.”

▪ Kinahanglan sang mga pamatan-on ang mga abyan. “Masami nga wala mahibaluan sang mga ginikanan ang ginahimo sang ila kabataan sa Internet ukon indi sila interesado nga mahibaluan ini,” siling sang 15-anyos nga babayi. Sa karon, indi dapat pagpabay-an sang mga ginikanan ang ila kabataan nga bisan sin-o lang ang kaupod. Nahibaluan mo bala kon sin-o ang kaupod sang imo kabataan, sing literal man ukon sa Internet? Ang Biblia nagasiling: “Ang malain nga pagpakig-upod nagapalain sang mapuslanon nga mga batasan.” (1 Corinto 15:33) Huo, may mabug-at nga rason nga hibaluon gid kon sin-o ang kaupdanan sang imo bata.

 Ang pag-atipan kapin pa sangsa pag-amlig lamang sa mga pamatan-on gikan sa makahalalit nga impluwensia. Kinahanglan sang kabataan ang husto nga sahi sang mga abyan. “Sia nga nagalakat upod sa maalam nga tawo magaalam,” siling sang Biblia. (Hulubaton 13:20) Busa, kinahanglan gid nga buligan mo ang imo kabataan nga makasapo sang maayo nga kaupdanan—lakip ang iban nga pamatan-on nga nagapahamtang sing maayo nga halimbawa sa pagdumdom sa ila Manunuga.—Manugwali 12:1.

Si Jehova nga Dios mapilion tuhoy sa sahi sang tawo nga luyag niya mangin abyan, kag dapat nga ilugon naton sia. (Salmo 15:1-5; Efeso 5:1) Sa pagkamatuod, ang isa sa labing mapuslanon nga ikasarang sa kabuhi nga matudlo mo sa imo kabataan—paagi sa pulong kag halimbawa—amo ang pagpili sing maayo nga kaupdanan.—2 Tesalonica 3:6, 7.

▪ Kinahanglan sang mga pamatan-on ang identidad. Ang importante nga bahin sang pagdaku amo ang paghuman sing identidad—isa ka pinasahi nga pamatasan nga nagapatuhay sa isa ka bata sa iban. Ang isa ka hulubaton sa Biblia nagasiling: “Ginapakita sang bata kon sin-o sia paagi sa iya ginahimo.” (Hulubaton 20:11, The Holy Bible in the Language of Today, by William Beck) Ang isa sang imo obligasyon subong ginikanan amo ang pagpatudok sing matarong nga mga prinsipio sa tagipusuon sang imo kabataan.—Deuteronomio 6:6, 7.

Sa pag-ilustrar: Masami nga ginapili sang mga ginikanan ang ginasuksok sang isa ka bata adlaw-adlaw, nga nagalaum nga matun-an niya ang husto nga pamayo. Apang mahanduraw mo bala ang isa ka 30 anyos nga mapagros nga adulto nga ginailisan pa sang iya ginikanan? Pat-od nga indi gid! Ginagamit ang ilustrasyon tuhoy sa pamayo, ang Biblia nagapalig-on sa aton: “Magpanapot kamo sang bag-o nga personalidad”—isa ka tulad-Cristo nga personalidad. (Colosas 3:10) Mabuligan mo ang imo kabataan nga masuklob ang bag-o nga personalidad paagi sa mahigugmaon nga disiplina kag “nagatuytoy nga panghunahuna.” (Efeso 6:4) Nian samtang nagadaku sila kag nangin independiente, mahimo gid nga pilion nila nga ila man “pamayo,” ang “bag-o nga personalidad” nga ginakabig ini nga matahom kag makagalanyat gid.—Deuteronomio 30:19, 20.

Pamangkuta ang imo kaugalingon: ‘Ano gid ang ginabatyag sang akon kabataan tuhoy sa pamatasan nga ginatudlo sang Pulong sang Dios? Paano ko sila mabuligan nga “magkabuhi nga may maligdong nga hunahuna”?’ (Tito 2:12) Ang imo tulumuron indi amo ang pagpatubas sing daw matinumanon nga bata. Ang pila ka kabataan daw maayo gid kon suguon, nga wala nagareklamo, nagabais, ukon nagarebelde. Apang ang bata nga nagasunod lamang sang gusto mo nga himuon niya karon mahimo magasunod sa gusto sang kalibutan nga himuon niya buas. Busa, hanasa ang imo kabataan nga palambuon ang ila “ikasarang sa pagpangatarungan.” (Roma 12:1) Buligi sila nga mahangpan kon ngaa ang mga prinsipio sa Biblia masaligan kag kon paano ini makahatag sing kaayuhan sa aton tanan.—Isaias 48:17, 18.

Huo, nagakinahanglan sing panikasog ang pagbulig sa mga pamatan-on nga matigayon ang ila mga kinahanglanon. Apang takus gid ang padya! Kon ang imo kabataan nagakabuhi sa matadlong nga mga prinsipio nga ginpatudok mo sa ila, makasiling ka sing hanuot sa imo tagipusuon nga ang kabataan isa gid ka “palanublion gikan kay Jehova.”—Salmo 127:3.

[Mga retrato sa pahina 9]

Buligi ang imo kabataan sa pagpili sang maayo nga Cristianong mga kaupdanan