Mga Relihion—Sa Diin Ini Nagapadulong?

ANO ang nagakatabo sa “Cristiano” nga mga relihion? Sa duog nga imo ginapuy-an, nagausmod bala ini ukon nagauswag? Ayhan nabatian mo nga nangin interesado liwat ang iban sa relihion, kag nabalitaan ang mga report sang pag-uswag sang mga kongregasyon nga nagahalin kon kaisa sa mga duog subong sang Aprika, Estados Unidos, kag Nasidlangan nga Europa. Apang, ang mga balita gikan sa iban nga bahin sang kalibutan, ilabi na sa Nakatundan nga Europa, nagasugid tuhoy sa pagsira sang mga simbahan, pagdiutay sang mga kongregasyon, kag lapnag nga pagkawalay interes sa relihion.

Bangod sang pagnubo sang tumalambong, ginbag-o sang madamo nga relihion ang ila pamaagi. Ginasiling sang iban nga “di-mahinukmanon” sila, nga nagapahangop nga ginabaton sang Dios ang bisan ano man nga sahi sang paggawi. Nagadamo ang mga relihion nga nagatanyag sing kalingawan, paglipaylipay, kag sekular nga mga pangganyat sa baylo nga instruksion gikan sa Pulong sang Dios. Bisan pa ginkabig sang pila ka sumilimba nga kinahanglanon ang mga pagbag-o bangod sa realidad sang kalibutan karon, madamong sinsero nga mga tawo ang nagapalibog kon bala ang mga relihion wala na nagasunod sa sugo ni Jesus. Usisaon naton ang nagakatabo sa mga relihion sining karon lang nga mga dekada.