Ano ang Palaabuton sang Cristianismo?

MANGIN Cristiano bala ang bug-os nga kalibutan, ukon madula na lang ang Cristianismo? Nagapabilin bala nga putli ang Cristianismo subong suga sa nadulman nga kalibutan, ukon nasamuan na ini sang iban nga pagpati? Amo ini ang mga pamangkot nga ginakabalak-an naton tubtob karon.

Nagagamit sing simple nga ilustrasyon, ginpakita ni Jesus nga sa tapos niya masab-ug ang mga binhi sang Cristianismo, ang kaaway nga si Satanas, magapasilabot dayon. (Mateo 13:24, 25) Busa, ang pagbag-o sang Cristianismo sa una nga pila ka siglo sa tapos sang ministeryo ni Jesus, indi lamang bangod sa pag-uswag sang katilingban. Pahito ini sang kaaway nga si Satanas. Sa karon ginasulit gihapon sang mga relihion sang Cristiandad ang mga sayop sang nagligad kag gani ginaani nila ang mga epekto sini.—2 Corinto 11:14, 15; Santiago 4:4.

Patago nga Pagsalakay sa Cristianismo

Gintagna ni Jesus nga patikuon ang iya mga panudlo. Sia nagsiling: “Ang ginharian sang langit kaangay sa isa ka tawo nga nagsab-ug sing maayo nga binhi sa iya uma. Samtang nagakatulog ang mga tawo, nag-abot ang iya kaaway kag nagsab-ug sing mga gamhon sa tunga sang mga trigo, kag nagbiya.” Makapakibot nga sang ginpatalupangod sang mga alagad ining malaut nga buhat sa tawo kag nangabay sing pahanugot nga tipunon ang mga gamhon, ang tawo nagsiling: “Indi; kay basi sa paggabot ninyo sing mga gamhon, magabot ninyo pati ang mga trigo. Pabay-i nga magtubo anay sila sing dungan tubtob sa pag-ani; kag sa tig-alani suguon ko ang mga mangangani, Gabuta anay ang mga gamhon kag hugpunga sila agod sunugon, dayon tipuna ang mga trigo sa akon tambubo.”—Mateo 13:24-30.

Subong sang ginpaathag mismo ni Jesus, sa iya ilustrasyon ang tawo nga nagsab-ug sing trigo sa latagon amo si Jesus, kag ang mga binhi nga iya ginsab-ug amo ang matuod nga mga Cristiano. Ang kaaway nga nagsab-ug sing mga gamhon sa tunga sang mga trigo amo “ang Yawa.” Ang mga gamhon amo ang malinapason kag apostata nga mga tawo nga nagapangangkon nga mga alagad sang Dios. (Mateo 13:36-42) Ginsugid ni apostol Pablo kon ano pa ang matabo. Sia nagsiling: “Nahibaluan ko nga kon makahalin na ako magasulod ang mapiguson nga mga lobo sa  tunga ninyo kag indi makig-angot sing mapinalanggaon sa panong, kag gikan sa inyo mismo may mga tawo nga magalutaw kag magapamulong sing tiko nga mga butang agod ipahilayo ang mga disipulo kag pasundon sa ila.”—Binuhatan 20:29, 30.

Ginpukan ang Cristianismo

Nangin matuod bala ang ginsiling ni Jesus kag ang gintagna ni Pablo? Pat-od gid. Ginkontrol sang ambisyuso nga mga tawo ang kongregasyon nga ginpatok ni Jesus kag gingamit ini sa ila kaugalingon nga katuyuan. Ginsilingan anay ni Jesus ang iya mga sumulunod: “Kamo indi bahin sang kalibutan.” (Juan 15:19) Apang, ang gutom-sa-gahom nga mga tawo nakig-alyansa sa mga gumalahom kag nagtukod sing mga relihion nga ginasakdag sang Estado nga nakatigayon sing daku nga gahom kag manggad. Ginatudlo sining mga relihion ang “tiko nga mga butang.” Halimbawa, gintudluan nila ang mga tawo nga simbahon ang Estado kag ihalad ang ila kabuhi sa sini kon tion sang inaway. Sa amo ang nagapangangkon nga mga Cristiano nakigbahin sa mga Krusada kag nagpatay sa mga ginakabig nila nga mga di-tumuluo. Nakigbahin man sila sa inaway kag ginpatay ang ila mga “kauturan” nga karelihion nila. Wala nila ginpakita ang Cristianong neutralidad kag gugma sa isigkatawo.—Mateo 22:37-39; Juan 15:19; 2 Corinto 10:3-5; 1 Juan 4:8, 11.

Maathag nga ang mga relihion nga sa sulod sang mga siglo nagtawag sa ila kaugalingon nga mga Cristiano nagailog-ilog lamang sa Cristianismo. Amo sini kon ngaa subong sang nakita naton sa nauna nga mga artikulo, may mga relihion gihapon nga nagabahinbahin sa mga sekta, mga relihion nga nagaentra sa politika, kag mga relihion nga nagasikway sang mga kasuguan sang Dios. Ining malain nga bunga indi bangod sa matuod nga Cristianismo, kundi sa huwad nga Cristianismo, nga ginsab-ug sang Yawa. Ano ang palaabuton sining butig nga relihion? Subong sang ginpakita ni Jesus sa iya ilustrasyon, indi ini madula bangod lamang sa kakulang sing suporta. Pagahukman ini kag pagalaglagon.

Ang Matuod nga mga Cristiano Nagasiga sa Kadudulman

Apang, antes tipunon kag laglagon ang “gamhon” sang butig nga Cristianismo, ginpakita sang ilustrasyon ni Jesus nga may butang pa nga dapat mahanabo. Sa sulod sang mga siglo daku gid ang paglambo sang butig nga Cristianong “gamhon” amo nga ang “trigo” sang matuod nga Cristianismo daw indi na makilala. Apang ginlaragway ni Jesus nga painon ang trigo sa gamhon sa tion sang “tig-alani,” nga suno sa iya ginsiling nagarepresentar sa “katapusan sang sistema sang mga butang.” Nagsiling man sia: “Sa amo nga tion ang mga matarong magasilak sing masanag kaangay sang adlaw.” (Mateo 13:39-43) Ginapakita sang mga pamatuod nga nagakabuhi kita sa katapusan sang sistema sang mga butang sugod sang Bug-os Kalibutan nga Inaway I, nga natabo kapin sa 90 ka tuig na ang nagligad. (Mateo 24:3, 7-12) Ini bala nga bahin sang  matagnaon nga ilustrasyon ni Jesus nangin matuod man?

Ang matuod nga mga Cristiano ginpain gikan sa “gamhon” sang Cristiandad. Ang mga Saksi ni Jehova ‘nagasilak sing masanag kaangay sang adlaw,’ nga nagabulig sa iban nga makilala ang matuod nga Dios nga si Jehova. Wala ginapanubo sang mga Saksi ang iya mga talaksan. Sa baylo, ang mga tawo nga nangin mga Saksi masami nga nagahimo anay sing daku nga pagbag-o sa estilo sang ila pagkabuhi agod masunod ang Cristianong mga prinsipio nga masapwan sa Biblia.

Ang mga Saksi ni Jehova wala nagatanyag sing kalingawan sa ila mga miting, apang nagatanyag sila sing walay bayad nga pagtuon sa Biblia. Nagapakita man sila sing mainit nga gugma kag pagpakig-abyan, mga kinaiya nga natun-an nila gikan sa ila pagtuon sa Kasulatan. Nagapati sila nga himuon sang Dios ang duta nga isa ka paraiso kag papuy-an ini sa mga mapainubuson sang duta, subong sang gintuyo niya sa ginsuguran. Apang dapat kuhaon anay sa kalibutan ang makahalalit nga impluwensia sang butig nga relihion, nga kilala sa Biblia subong ang Babilonia nga Daku. Suno sa tagna sang Biblia, pahanabuon ni Jehova sa dili madugay ining daku nga pagbag-o.—Mateo 5:5; Bugna 18:9-10, 21.

Sa tapos nga mahilway ang matinumanon nga katawhan gikan sa makapatalang nga buhat sang butig nga relihion, ang pagsimba sang matuod nga Cristiano magahiusa sa tanan nga nagapuyo sa duta. Isa gid ka makalilipay nga palaabuton para sa matuod nga Cristianismo ang ginsab-ug ni Jesus! Ang Paraiso sa Eden ipasag-uli sa isa ka mahidaiton nga duta, nga wala na sing nabahinbahin nga relihion nga magasab-ug liwat sing pagbinangig!

[Retrato sa pahina 7]

“Nag-abot ang iya kaaway kag nagsab-ug sing mga gamhon.”—Mateo 13:25

[Mga retrato sa pahina 8, 9]

Mainit ka nga ginaabiabi sa Kingdom Hall sang mga Saksi ni Jehova, diin ginatanyag ang pagtuon sing Biblia nga walay bayad

[Retrato sa pahina 9]

“Dayon tipuna ang mga trigo sa akon tambubo.”—Mateo 13:30