Ang Chukar Estranghero sa Paraiso

GINKALANGKAGAN gid namon sang akon mga abyan ang pagkadto sa isla sang Maui sa Hawaii. Luyag gid namon makita ang pagbutlak sang adlaw gikan sa putukputukan sang Haleakala nga bulkan, nga nagataas sing 3,055 metros. Ginsugiran kami nga pinasahi gid ini nga eksperiensia. Ang problema lang kay dapat kami magbugtaw sing alas dos sang kaagahon kag magbiyahe halin sa Kapalua nga ginateneran namon pakadto sa pihak sang isla. Nian masakay kami sa salakyan pataklad sa bukid. Abi namon mamingaw ang pagbiyahe kon kaagahon. Indi gali! Madamo kami nga mga salakyan nga mahinay nga nagataklad sa likuon nga haywey pakadto sa putukputukan. Pag-abot namon sa ibabaw, tuman katugnaw. Apang may dala kami nga mga habol agod nga mainit-initan kami.

Ginatos ka tawo ang nagahulat sing mapailubon sa pagbutlak sang adlaw sa mga alas seis sa aga. Ang tanan nagakalangkag gid, kag ginpuwesto ang mga kamera agod maretratuhan ining makakulunyag nga talan-awon. Apang, kanugon gid! Sa importante nga tion, nadismaya gid kami sang nakita namon ang daku nga panganod nga nagapakadto sa baba sang bulkan, kag wala kami sing naretratuhan! Apang pirme gid nagakatabo nga may mga panganod sa mga bukid malapit sa Pacific Ocean. Gani dapat namon batunon ang amon kapaslawan kag hulaton ang pagsilak sang adlaw. Nian, natabo ang wala namon ginapaabot! Nakita namon ang isa ka matahom nga talan-awon sang nagalikuliko nga mga banas pakadto sa baba sang bulkan. Ang kahimtangan indi man gid makahalanusbo.

Sa hinali lang, may nabatian kami nga tunog—isa ka alagisod nga putak nga ang sa punta “chuKAR, chuKAR.” Nian nakita namon ang ginahalinan sini. Isa ini ka matahom nga pispis nga Eurasian gikan sa pamilya sang umbok, ang chukar, nga ang Latin nga ngalan sini amo ang Alectoris chukar. Sa duta ini nagatener kon nagapangitlog. Wala ini naglupad kundi nagdalagan lang.

Ngaa sa sining daw paraiso nga isla sang Maui makita ini nga sahi sang pispis? Sa pagkamatuod ang mga chukar gindala diri. Sa kontinente sang Aminhan nga Amerika, regular sila nga ginabuhian agod ayamon. Pribilehiyo gid namon nga mahimutaran ining maila nga pispis.—Gin-amot.