Isa Ako Anay ka Buhaha nga Anak

Panugiron ni Meros William Sunday

Sugod sa pagkalapsag gintudluan ako nga higugmaon ang Dios; apang sang 18 anyos ako, nagrebelde ako kag nagbiya sa balay. Sa sulod sang 13 ka tuig nagkabuhi ako kaangay sang buhaha nga anak sa parabola ni Jesus. (Lucas 15:11-24) Nagbaligya ako sing droga kag halos ginguba ko ang akon kabuhi. Pasugira ako kon ano ang nagpabag-o sa akon estilo sang pagkabuhi kag sang akon pagbalik sang ulihi.

NATAWO ako sang 1956 sa Cristiano nga mga ginikanan, ikaduha sa siam ka kabataan. Nagapuyo kami sa Ilesha, isa ka banwa sa bagatnan-nakatundan sang Nigeria. Ang akon amay nagdaku nga Katoliko, apang sang 1945 ginhatagan sia sang iya tiyo sing libro nga The Harp of God. * Sa tapos niya ini mabasa, ginpangita ni Tatay ang mga Saksi ni Jehova. Sang 1946 ginbawtismuhan sia, kag wala madugay si Nanay ginbawtismuhan man.

Nadumduman ko pa kon daw ano ka matuod si Jehova sa akon sang bata pa ako kag kon daw ano ako kakugi nga nagpakigbahin sa pagbantala upod sa akon mga ginikanan. Si Tatay ang nagatuon sing Biblia sa akon. Kon kaisa, ginatun-an man ako ni Alice Obarah, nga asawa sang nagalakbay nga manugtatap sa amon duog. Luyag sang akon mga ginikanan nga mangin bug-os tion nga ministro ako. Apang, ginpanugyan ni Nanay nga paeskwelahon anay ako sa hayskul.

Sang mag-eskwela na ako sa hayskul, bisan pa nga 16 anyos na ako, di-maalamon nga nakig-abyan ako sa akon mga kabutho nga wala nagatahod sa mga prinsipio sang Biblia. Isa gid yadto ka kabuangan! Sang ulihi, nanigarilyo ako kag nakigbahin sa imoral nga paggawi. Narealisar ko nga ang akon bag-o nga estilo sang pagkabuhi supak sa instruksion nga akon nabaton sa Cristianong mga miting, gani nag-untat na ako sa pagtambong sa mga miting kag sa pagpakigbahin sa pamalaybalay nga ministeryo. Nagkasubo gid ang akon mga ginikanan, apang wala na ako sing labot sa balatyagon sang iban.

Nagbiya Ako sa Balay

Pagkatapos lamang sang duha ka tuig sa hayskul, nagbiya ako sa balay kag nagpuyo upod sa akon mga abyan sa amon lugar. Kon kaisa patago ako nga nagapauli sa balay, nagakuha sing bisan ano nga pagkaon, kag nagahalin dayon. Bangod nalugaw-an, wala na ni Tatay ginbayaran ang akon matrikula, nga nagalaum nga magabag-o ako.

Apang, halos sa amo man nga tion, nangin iskolar ako. Ang naga-isponsor sa akon halin sa Scotland nagapadala sing kuarta agod ibayad ko sa matrikula kag kon kaisa nagahatag man sia sa akon sing mga regalo, lakip na sing kuarta. Samtang ang akon duha ka utod nga lalaki nag-untat man sa pagpakig-upod sa mga Saksi ni Jehova, tanan ini nagdala sing indi malaragway nga kasubo sa akon mga ginikanan. Pila ka beses nga nagahilibion si Nanay samtang nagapakitluoy sa akon. Bisan pa nga nagalalain ako sa sini, wala ko ginbag-o ang akon mga dalanon.

Sa Dalagku nga mga Siudad

Sang makatapos na ako sa pag-eskwela sang 1977, nagkadto ako sa Lagos kag nagtrabaho. Wala madugay  pagkatapos sini, nangawat ako kag nagbakal sing taksi. Bangod madamo na ako sing kuarta karon, nagdroga ako kag naghinguyang sing madamo nga oras sa mga naytklab kag sa balay sang mga alpot. Sang ulihi gintak-an ako sa akon kabuhi sa Lagos, kag sang 1981, nagpa-London ako. Halin didto nagkadto ako sa Belgium, diin nagtuon ako sing Pranses kag nagtrabaho sing part-time sa restawran. Apang, kalabanan sang akon tion ginhinguyang ko sa pagpadala sing mga salakyan kag elektroniko nga kasangkapan sa Nigeria.

Nagsulat si Tatay sa sanga talatapan sang mga Saksi ni Jehova sa Belgium kag nangabay nga kontakon ako kag tinguhaan nga makatuon sing Biblia. Apang kada may magkadto nga mga Saksi sa akon balay, wala ako nagapamati sa ila. Nagatambong ako sa simbahan diin makakaon kami, makainom, kag makahampang sing nanuhaytuhay nga mga isport pagkatapos sang serbisyo.

Ang Akon Kabuhi Subong Manugbaligya Sing Droga

Sang 1982, ginpadala ko ang isa ka malahalon kag maluho nga salakyan sa Nigeria kag nag-upod pa ako tubtob sa pantalan sa Nigeria agod pat-uron nga ang salakyan makalusot sa customs. Nadakpan sang Customs sa Nigeria nga palsipikado ang dokumento para sa buhis sang kargamento nga dala ko, gani ginpriso ako sing mga 40 ka adlaw. Ginpiyansahan ako ni Tatay. Sanglit kinahanglan ko ang kuarta agod mahusay ang kaso sa korte, nagbalik ako sa Belgium nga may dala nga mga produkto, lakip na ang pila ka kilo nga marijuana. Sang mahilway na ako sa kaso nga pagpalsipikar sang dokumento, nagbaligya ako sing droga.

Sa isa ko ka biyahe gindakop ako sa Netherlands. Ginpagua ako sa pungsod sang mga opisyal sang imigrasyon, kag ginpasakay ako sa eroplano nga pakadto sa Nigeria. Samtang yara sa eroplano nagkitaay kami sang iban nga mga manugbaligya man sang droga, kag nagporma kami sing isa ka grupo sa pagbaligya sang droga. Sang Enero 1984, nagsaylo ako sa isa pa ka pungsod sa Aprika. Sanglit makahambal ako sing Pranses, ang lenguahe nga ginapamulong didto, nakapakig-abyan ako dayon sa mga pulis, soldado, kag mga opisyal sang imigrasyon. Gani, naka-importar kami sing linibo ka kilo nga marijuana sa sina nga pungsod.

Gindakop kag Ginbilanggo

Nian, nahulog ako liwat sa gamo. Ginkontak ko ang kapitan sang army nga buligan ako sa pagsaylo sang mga ilegal nga droga sa erport sina nga pungsod. Apang, naulihi sia sa pag-abot, amo nga nadakpan ako. Ginkastigo ako sang mga pulis kag ginpaantos sing tuman amo nga nalipong ako. Gindala nila ako sa ospital kag ginbiyaan didto, nga nagalaum nga mapatay ako. Apang wala ako napatay, gani gin-akusar ako, ginpamatbatan nga nakasala, kag ginbilanggo.

Paggua ko sa prisuhan, nadiskobrehan ko nga ginbaligya sang akon abyan nga ginpangabay ko sa pagtatap sang akon balay ang tanan ko nga pagkabutang kag nalagyo sia. Agod mabuhi, nagbaligya dayon ako sing marijuana. Apang, pagligad sang pulo ka adlaw gindakop ako kag ginpriso sa sulod sang tatlo ka bulan. Sang makagua na ako, tuman sa akon ka balatianon nga halos daw mapatay ako liwat. Apang, nakapauli ako sa Lagos.

Sa “Negosyo” Liwat

Sa Lagos nakita ko ang pila ko ka mga upod, kag nagkadto kami sa India, diin nagbakal kami sing heroina nga nagabalor sing mga 600,000 dolyares. Halin sa Bombay (karon Mumbai) nagkadto kami sa Switzerland, dayon sa Portugal, kag sang ulihi sa Espanya. Nakaganar kami sing dakudaku kag nagpauli sa Lagos paagi sa lainlain nga mga ruta. Sang ulihi nga bahin sang 1984, nagbaligya ako sing isa pa ka shipment sang mga droga. Handum ko gid nga makaganar sing minilyon ka dolyar kag dayon magpangabuhi sing matawhay sa Estados Unidos.

Sang 1986, gintipon ko ang tanan ko nga kuarta kag nagbakal sing puro nga heroina sa Lagos. Gindala ko ini sa iban nga pungsod, apang ginkuha ini sa akon sang isa ka makagod nga manugbaligya nga wala gid magbayad sa akon. Sa kahadlok nga basi patyon ako, nagpauli ako sa Lagos nga wala gid nanugid sang natabo. Nalusod gid ako sa pinansial kag emosyonal. Sa una nga tion, ginbinagbinag ko sing maayo ang katuyuan sang kabuhi. ‘Ngaa amo sini ang nagakatabo sa akon?’ pamangkot ko sa akon kaugalingon.

Pagbalik sa Dios

Isa ka gab-i wala madugay pagkatapos sini, nangayo ako sing bulig kay Jehova paagi sa pangamuyo. Nian, pagkaaga may isa ka tigulang nga lalaki upod sa iya asawa nga nanuktok sa puertahan. Mga Saksi ni Jehova sila. Namati ako sing maayo sa ila kag nagkuha sing isa ka magasin. “Ang akon mga ginikanan mga Saksi ni Jehova man,” siling ko sa ila. “Si Alice Obarah amo anay ang nagatuon sa akon sing Biblia.”

Ang tigulang nga lalaki nga si P. K. Ogbanefe,  nagsabat: “Kilala gid namon ang mga Obarah. Nagaalagad sila karon sa sanga talatapan namon sa Nigeria nga nahamtang sa Lagos.” Ginpalig-on nila ako nga makigkita sa mga Obarah. Napalig-on gid ako sang magkitaay kami sang mga Obarah. Pagkatapos sini, gintun-an ako sing Biblia ni Utod Ogbanefe, kag sa gilayon ginbag-o ko ang akon imoral nga estilo sang pagkabuhi. Indi ini mahapos bangod mabudlay untaton ang madugay nga paggamit sing droga. Sa gihapon, determinado ako nga magbag-o kag magkabuhi nga may matinlo nga moral.

Apang, may madamo nga mga pagsulay kag mga pag-ipit! Ang akon di-matuod nga mga abyan pirme nagakadto sa balay kag may makagalanyat nga mga tanyag. May tion pa gani nga nanigarilyo ako liwat kag nangabuhi sing imoral. Ginbubo ko ang akon tagipusuon sa Dios sa pangamuyo. Bangod nahibaluan ko nga ang mga abyan sa kalibutan amo ang nagpatalang sa akon, indi nila ako mabuligan karon. Narealisar ko nga agod mag-uswag sa espirituwal kinahanglan ko maghalin sa Lagos. Pero nahuya ako magpauli sa amon balay sa Ilesha. Apang, sang ulihi nagsulat ako sa akon amay kag sa akon magulang nga lalaki kag nangabay kon puede ako makapauli sa amon.

Ginpasalig ako sang akon amay nga ginaabiabi gid nila ang akon pagpauli, kag ang akon magulang nga lalaki nagsiling nga buligan niya ako sa pinansial. Gani pagligad sang pulo ka tuig nga pagbiya sa akon mga ginikanan, nagpauli ako sa amon. Mainit ako nga ginbaton. “Salamat, Jehova!” tuaw ni Nanay. Sang mag-abot si Tatay sina nga gab-i, nagsiling sia, “Si Jehova magabulig sa imo.” Upod ang bug-os nga pamilya, nangamuyo sia kay Jehova nga nagapangabay sa Iya nga buligan ako, karon nga nagbalik na ako sa paghimo sang Iya kabubut-on.

Paghimo sang Hilikuton nga Kuntani Sadto Ko Pa Ginahimo

Ginpadayon ko ang akon pagtuon sing Biblia kag madasig nga nag-uswag; nabawtismuhan ako sang Abril 24, 1988. Sa gilayon nangin aktibo ako sa ministeryo. Sang Nobiembre 1, 1989, nagpayunir ako—isa ka bug-os tion nga ebanghelisador. Sang 1995, gin-agda ako nga mag-eskwela sa ikanapulo nga klase sang Ministerial Training School sa Nigeria. Nian, sang Hulyo 1998, gin-asayn ako subong nagalakbay nga manugtatap, nga nagaduaw sa mga kongregasyon sang mga Saksi ni Jehova. Isa ka tuig sang ulihi, makalilipay nga nakilala ko si Ruth, nga nangin asawa ko kag kaupod sa nagalakbay nga hilikuton.

Ang iban nga miembro sang akon pamilya nag-uswag man sa espirituwal. Ang isa ko ka magulang nga lalaki nga nag-untat man sa pag-alagad kay Jehova, nagbalik sa matuod nga pagsimba kag nabawtismuhan. Nalipay ako nga nakita ni Tatay ang amon pagbalik sa kamatuoran. Nag-alagad sia sing malipayon subong ministeryal nga alagad sa kongregasyon tubtob sang mapatay sia sang 1993 sa edad nga 75 anyos. Si Nanay padayon nga nagaalagad kay Jehova sing makugi sa Ilesha.

Nakalakbay ako sa kabug-usan nga 16 ka pungsod sa Aprika, Asia, kag Europa sa pagpangita sing manggad. Subong resulta, ginbuno ko ang akon kaugalingon sing madamong kasakitan. (1 Timoteo 6:9, 10) Sa paghinumdom, ginhinulsulan ko gid sing daku nga gin-uyangan ko ang tinuig sang akon pagkalamharon sa mga droga kag imoralidad. Ginhinulsulan ko man ang kasakit nga gintuga ko kay Jehova nga Dios kag sa akon pamilya. Apang, mapinasalamaton ako nga nalampuwasan ko ini tanan kag nakabalik ako. Determinasyon ko nga magpabilin nga matutom kay Jehova kag alagaron sia sing dayon.

[Nota]

[Retrato sa pahina 13]

Subong isa ka rebelyuso nga tin-edyer

[Retrato sa pahina 15]

Sang adlaw sang akon bawtismo

[Retrato sa pahina 15]

Upod sa akon asawa nga si Ruth