Ang Pinakamabudlay nga Pamangkot

“NGAA?” Makahalanusbo gid nga ining simple nga tinaga mahimo magpabutyag sing madamo nga kalisod kag kasakit. Masami ini ginapamangkot sang mga tawo pagkatapos sang kalamidad ukon trahedya: Isa ka bagyo nga nagpanglambas sa isa ka duog, nga nagresulta sa pagkapatay sang madamo nga tawo kag pagkapierde sang mga pagkabutang. Isa ka linog nga halos nagtapan sang isa ka siudad. Isa ka pagsalakay sang mga terorista nga naghimo sang isa ka malinong kag kinaandan nga adlaw nga makahaladlok kag masingki. Ukon isa ka aksidente nga naghalit ukon nagkutol sa kabuhi sang isa ka hinigugma.

Makahalanusbo nga sa masami, ang labing inosente kag walay depensa sa tunga naton amo ang pila sa mga biktima. Tuman kadamo nga kalamidad ang natabo sining karon lang, amo kon ngaa madamo ang nagtu-aw sa Dios, “Ngaa?” Binagbinaga ang pila ka halimbawa:

▪ “Ngaa ginhimo mo ini sa amon, O Dios? Ano ang ginhimo namon nga naakig ka?” Suno sa balita sang Reuters, ginpamangkot ini sang isa ka tigulang nga babayi sa India pagkatapos hapayon sang tsunami ang ila minuro.

▪ “Diin na ang Dios? Kag kon kontrolado sang Dios ang tanan nga butang, ngaa gintugutan niya nga mahanabo ini?” Ini ang mga pamangkot sang isa ka pamantalaan sa Texas, E.U.A., pagkatapos magpaniro ang isa ka lalaki sa sulod sang isa ka simbahan, kag madamo nga tawo ang napilasan kag napatay.

▪ “Ngaa gintugutan sang Dios nga mapatay sia?” Pamangkot ini sang isa ka babayi sang ang iya abyan napatay sa kanser, kag ginbilin sang iya abyan ang iya bana sa pag-atipan sa ila lima ka bata.

Indi lamang sila ang nagahunahuna nga sa bisan paano ang Dios amo ang kabangdanan sang mga natabo sa ila. May kaangtanan sa kinaugali nga mga kalamidad, halimbawa, nagapati ang halos katunga sang mga ginpamangkot sa sining ulihi lang nga surbe sa Internet nga ang mga kalamidad subong sang mga bagyo naghalin sa Dios. Ngaa amo sini ang pagpati sang tuman kadamo?

Kagumon sa Relihion

Sa baylo nga maghatag sing makaalayaw nga sabat, ang mga lider sang relihion masami nga amo pa ang ginabangdan sang kagumon. Binagbinagon naton ang tatlo lamang sang ila kinaandan nga mga sabat.

Una, madamo nga lider sang relihion ang nagawali nga ginapahanabo sang Dios ang mga kalamidad agod silutan ang malain nga mga tawo. Halimbawa, sa Estados Unidos, pagkatapos hapayon sang Bagyo Katrina ang New Orleans, Louisiana, nagsiling ang pila ka ministro nga ginsilutan sang Dios ang siudad. Gintudlo nila ang lapnag nga kagarukan, sugal, kag imoralidad. Ginbalikwat pa gani sang iban ang Biblia subong ebidensia, kag gintudlo ang mga okasyon nga ginlaglag sang Dios ang mga malauton paagi sa anaw ukon kalayo. Apang, indi husto ang ginsiling nila tuhoy sa Biblia.—Tan-awa ang kahon nga “Mga Buhat Sang Dios?”

Ikaduha, nagasiling ang pila ka klerigo nga may mga rason ang Dios kon ngaa ginapahanabo niya ang mga kalamidad sa katawhan apang indi gid kuno naton mahangpan ini nga mga rason. Madamo nga tawo ang indi kumbinsido sa sini. Nagapamangkot sila, ‘Ang isa bala ka mahigugmaon nga Dios makahimo sini nga kalainan kag nian indi man lang sia magpaathag sa mga nagapangayo gid sing lugpay kag nagapakitluoy nga nagapamangkot, “Ngaa?”’ Sa pagkamatuod, ang Biblia nagasiling: “Ang Dios gugma.”—1 Juan 4:8.

Ikatlo, nagadumdom ang iban nga mga lider sang relihion nga ang Dios indi labing gamhanan kag indi mahigugmaon. Sa liwat, ini nga paathag nagapautwas sing serioso nga mga pamangkot.  Indi bala mapunggan sang Isa nga ‘nagtuga sang tanan nga butang’—pati na ang di-matungkad kag malapad nga uniberso—ang pag-antos sa sini nga planeta? (Bugna 4:11) Paano nga ang Isa nga naghatag sa aton sing ikasarang nga maghigugma, kag ginalaragway sang Iya Pulong nga larawan sang gugma, indi matandog sa pag-antos sang mga tawo?—Genesis 1:27; 1 Juan 4:8.

Sa pagkamatuod, ang tatlo ka punto nga ginsambit bag-o lang pila lamang sang mga paagi kon paano ginapaathag sang tawo ang mga rason kon ngaa ginatugutan sang Dios ang pag-antos—ang pamangkot nga madugay na nga ginpaligban sang mga tawo nga nagapangita sing sabat. Sa masunod nga artikulo, binagbinagon naton kon ano ang ginatudlo sang Biblia tuhoy sa sining importante kag sibu gid sa tion nga topiko. Subong sang makita mo, ginaklaro sang masaligan kag makatarunganon nga paathag sang Biblia ang kagumon. Isa pa, ang Biblia nagahatag sing daku nga lugpay sa tanan nga nakaeksperiensia sing mga trahedya sa kabuhi.

[Kahon/Retrato sa pahina 4]

Mga Buhat sang Dios?

Ginatudlo bala sang Biblia nga ang Dios amo ang kabangdanan sang kinaugali nga mga kalamidad nga makita naton karon? Wala! Ang mga paghukom sang Dios subong sang ginlaragway sa Biblia tuhay gid sa kinaugali nga mga kalamidad. Una, ang Dios mapilion; mabasa niya ang tagipusuon sang mga tawo kag ginalaglag niya ang ginakabig niya nga mga malaut. (Genesis 18:23-32) Dugang pa, ang Dios nagapaandam anay, sa amo ginahatagan niya sing kahigayunan ang mga matarong nga makalikaw ukon makapalagyo.

Sa pihak nga bahin, ang kinaugali nga mga kalamidad nagakatabo nga halos wala sing paandam, kag wala ini sing ginapili kon sin-o ang mapatay kag mahalitan. Sa pila ka kasangkaron, ginpalala sang tawo ini nga mga kalamidad bangod sang pagguba nila sa kinaugali nga palibot kag bangod sang pagpatindog nila sing mga balay kag iban pa nga mga tinukod sa mga lugar nga pirme ginalinog, ginabaha, kag ginabagyo.

[Credit Line]

SENA VIDANAGAMA/AFP/Getty Images

[Retrato sa pahina 4]

Ang mga lider sang relihion naghatag sing makagulumon kag lainlain nga mga sabat