Kon Paano Mahuptan ang Imo Trabaho

“Nakakita ka na bala sing tawo nga sampaton sa iya buluhaton? Magatindog sia sa atubangan sang mga hari.”​—⁠Hulubaton 22:29.

SUBONG sang ginapakita sang bersikulo sa Biblia nga nakutlo sa ibabaw, ang sampaton nga mga mamumugon masami nga ginapabaloran sing daku. Ano ang pila ka kalantip kag mga kinaiya nga ginapabaloran sang mga amo sa ila mga mamumugon? Si George, direktor sang departamento nga nagaasikaso sa mga tinawo sang isa ka kompanya nga may 700 ka mamumugon, nagsiling sa Magmata!: “Ang ginapabaloran namon sa isa ka empleyado amo ang iya ikasarang sa pagkomunikar sing maayo kag pagtrabaho sing mahidaiton upod sa iban.” Ang Biblia nagaunod sing praktikal nga laygay nga makabulig sa imo sa pag-uswag sa sini nga mga kalantip, sa amo nagadugang ang imo tsansa nga mahuptan mo ang imo trabaho. Binagbinaga ang pila ka halimbawa.

Magkomunikar sing Epektibo

Ginpakita sang manunulat sang Biblia nga si Santiago nga ang hilikuton sang isa ka epektibo nga komunikador nagasugod antes sia maghambal. Nagsulat si Santiago nga ang isa dapat “magmadagmit sa pagpamati, magmahinay sa paghambal.” (Santiago 1:19) Ngaa maayo ini nga laygay? Nagsulat si Solomon: “Kon ang bisan sin-o nagasabat tuhoy sa isa ka butang antes niya mabatian ini, kabuangan ini sa iya kag isa ka kahuluy-an.” (Hulubaton 18:13) Sa pagkamatuod, malikawan mo ang indi paghangpanay kag ang paghimo sing binuang nga mga sayop kon mamati ka sing maayo sa imo amo kag sa imo mga katrabaho.

Kon nagahambal ka, importante man kon paano ka nagahambal. Kon maghambal ka sing maathag kag may nagakaigo nga kabaskugon, mahimo gid nga mahangpan ka, kag labi pa nga tahuron sang nagapamati ang imo ginahambal. Si Brian, ang employment consultant nga ginsambit sa nagligad nga artikulo, nagkomento: “Mahimo makibot ka nga madamo nga tawo ang nadulaan sing trabaho,  indi bangod wala sila sing teknikal nga kalantip, kundi bangod wala sila sing ikasarang sa pagkomunikar sing epektibo.”

Magkooperar sa Iban

Bangod sang kalawigon sang tion nga ginahinguyang mo upod sa imo mga katrabaho, walay duhaduha nga sunado mo na sila. Subong resulta, mahimo masulay ka nga ikutsokutso sila, ginapadaku ang ila mga sala kag mga kakulangan. Apang, nagalaygay ang Biblia nga “himuon ninyo nga tulumuron nga magkabuhi sing malinong kag asikasuhon ang inyo lang buluhaton.” (1 Tesalonica 4:11) Sa paghimo sini, indi kamo makilala nga “mahilabtunon sa mga butang sang iban.” (1 Pedro 4:15) Dugang pa, malikawan mo ang pag-uyang sing tiempo kag ang pagbangigay sa imo mga katrabaho.

Kon may ipahimo sa imo, dumduma ang maalamon nga laygay ni Jesus: “Kon ang isa nga may awtoridad magpilit sa imo sa pag-alagad sing isa ka milya, updi sia sing duha ka milya.” (Mateo 5:41) Awtoridad sang gobierno ang ginpatuhuyan ni Jesus, apang pat-od gid nga ang prinsipio sini maaplikar sa trabaho. Kon makilala ka nga mapisan​—⁠isa nga magahimo sing kapin pa​—⁠mahimo gid nga mahuptan mo ang imo trabaho. Sa pagkamatuod, may limitasyon ang mapahimo sa imo sang imo amo. Nagsiling si Jesus nga dapat ‘ibayad kay Cesar ang mga butang nga iya ni Cesar, apang sa Dios ang mga butang nga iya sang Dios.’ (Mateo 22:21) Sa prinsipio, ginapakita diri ni Jesus nga indi gid dapat pagtugutan ang awtoridad nga mag-upang sa mas importante nga mga butang, subong sang pagsimba sa Dios.

Mangin Bunayag

Ang isa ka surbe sa kapin sa 1,400 ka kompanya nagpakita nga ang kalabanan sang mga amo “nagkabig sang pagkabunayag kag integridad subong mga kinaiya sang mga aplikante nga nagapahamuot gid sa ila.” Maathag nga ang pagkabunayag nagakahulugan nga wala ka nagapangawat sing kuarta ukon mga materyales gikan sa imo amo. Nagakahulugan man ini nga wala ka nagapangawat sing oras. Natukiban sang pag-usisa sang isa ka ahensia sang trabaho nga sa promedyo 4 ka oras kag 15 minutos ang tion nga ginakawat sang kada empleyado kada semana. Dugang pa, ini nga mga kawatan sing tion amo ang pirme lang atrasado magsulod sa trabaho, temprano pa magpauli, kag nagaistoryahanay sa oras sang trabaho.

Ang Biblia nagalaygay: “Ang kawatan dili na magpangawat, kundi sa baylo magpangabudlay sia sing lakas, nga nagabuhat paagi sa iya mga kamot sing maayo nga buhat.” (Efeso 4:28) Dugang pa, ginapalig-on sang Pulong sang Dios ang mga Cristiano nga magpangabudlay sing lakas, bisan pa wala sila ginabantayan sang isa nga may awtoridad. Nagsulat si apostol Pablo: “Mangin matinumanon kamo sa tanan nga butang sa inyo mga agalon sa unod, indi paagi sa mga buhat sang pakitakita nga pag-alagad, subong sang mga nagapahamuot sa tawo, kundi upod ang pagkasinsero sang tagipusuon, nga may kahadlok kay Jehova.” (Colosas 3:22) Kon kilala ka nga maayo magtrabaho​—⁠bisan pa wala ginabantayan​—⁠isa ikaw ka masaligan nga empleyado.

Mangin Realistiko

Husto gid ang Biblia sa pagtagna nga ang aton tion mangin makahalanguyos kag mabudlay pakigbagayan. (2 Timoteo 3:1) Ang resulta nga walay kalig-unan nga politika kag katilingban kag kinagamo indi malikawan nga magaresulta sa paghuyang sang ekonomiya. (Mateo 24:3-8) Busa, bisan pa iaplikar mo ang nasambit na nga mga panugda, mahimo gihapon nga madulaan ka sing trabaho.

Apang, ang kabalaka bangod sang pagkawalay trabaho sarang mapahaganhagan kon iaplikar mo ang mga prinsipio sang Biblia. Nagsiling si Jesus: “Karon, kon ginapapanaptan sang Dios sing subong ang mga tanom sa latagon, nga yari karon kag buwas ginadap-ong sa hurno, indi bala magpapanapot sia sing labi pa sa inyo, kamo nga may diutay sing pagtuo? Busa indi gid kamo magkabalaka kag magsiling, ‘Ano bala ang kaunon naton?’ ukon, ‘Ano bala ang imnon naton?’ ukon, ‘Ano bala ang ipanapot naton?’ . . . Kay ang inyo langitnon nga Amay nakahibalo nga kinahanglan ninyo ini tanan nga butang.”​—⁠Mateo 6:30-32.

Kaangay sang minilyon pa sa bug-os nga kalibutan, naeksperiensiahan ni Ericka nga ginsambit kaina, ang kamatuoran sang bag-o lang makutlo nga mga pulong. Ginsumaryo niya ang iya ginbatyag sing subong sini: “Naluyagan ko gid ang akon trabaho karon. Apang, pasad sa akon naeksperiensiahan na, nahibaluan ko nga nagabag-o ang mga kahimtangan. Walay sapayan sina, paagi sa pag-aplikar sang mga prinsipio sang Biblia kag pagsalig kay Jehova, natun-an ko kon paano mapahaganhagan ang akon kabalaka sang wala ako sing trabaho kag kon paano pauswagon pa ang akon pagkakontento sa trabaho nga matigayon ko.”

[Retrato sa pahina 10]

Mahimo ka madulaan sing trabaho kon wala ka nagapamati kon nagamiting kamo