Pagtudlo kay Kristi nga Higugmaon ang Dios

ANG amon anak nga babayi nga si Kristi natawo sang 1977. Wala madugay pagkatapos sini, ginsugid sa amon sang doktor ang isa ka masubo nga balita: si Kristi natawo nga bungol kag may haganhagan nga sahi sang cerebral palsy. Wala kami sing ideya kon daw ano gid ka daku ang mangin epekto sini sa amon kabuhi.

Paglipas sang pila ka bulan, nagtambong kami sang akon bana nga si Gary sa pinasahi nga mga klase sa siudad sang Melbourne, Australia, diin nagtuon kami kon paano makigkomunikar kag hanason ang amon anak. Nagkadto man kami sa National Acoustic Laboratory sa Melbourne. Didto ginbutangan sing magamay nga mga hearing aid ang napulo-ka-bulan nga si Kristi. Indi niya ini gusto, kag bangod may mga alambre nga naangot sa sini, kada takod namon sini sa iya magamay nga mga dulunggan ginalalas niya ini! May higot man sia para sa mga baterya, nga medyo mabug-at.

Bangod sang cerebral palsy, nabudlayan si Kristi sa pagtuon sa paglakat. Busa kinahanglan sia magkadto sa isa ka physical therapist kada semana. Apang, sa edad nga tatlo ka tuig, si Kristi nakatuon sa paglakat, bisan pa nga masami sia nagakatumba. Nag-physical therapy sia tubtob sa edad nga lima ka tuig. Sini man nga tion, nagsaylo kami sa kaiping nga banwa sang Benalla, diin nagnegosyo si Gary.

Edukasyon ni Kristi

Ginpatalupangod sa amon sang isa ka maestro para sa mga bungol nga kinahanglan ni Kristi ang pinasahi nga edukasyon. Amo kon ngaa kinahanglan nga magsaylo kami liwat, sini nga tion sa Bendigo, ang siudad nga may eskwelahan para sa mga bungol. Bangod nagamabdos ako sa amon ikaduha nga anak, ginpalantang namon ini nga pagsaylo tubtob nga mag-apat ka tuig si Kristi kag maglima ka bulan ang amon anak nga lalaki, nga si Scott. Ginsugdan sa isa ka ospital sa Bendigo ang semanal nga mga sesyon sang terapiya para sa paghambal​—ang pagbulong nga magadugay sing napulo ka tuig. Nagtuon man kami ni Gary sing sign language.

Ang ginakabalak-an gid namon amo ang espirituwal nga edukasyon ni Kristi. Mga Saksi ni Jehova kami ni Gary, kag determinado kami nga padakuon si Kristi “sa disiplina kag sa pagtudlo sang Ginuo.” (Efeso 6:4) Apang paano namon ini himuon? Ang prinsipal sa eskwelahan ni Kristi nagsiling: “Ang pagtudlo kay Kristi tuhoy sa Dios amo ang pinakamabudlay. Ang Dios indi makita, gani paano mo sia ipaathag sa iya?” Isa ka daku gid nga hangkat ang ginaatubang namon karon! Nahibaluan namon sang ulihi nga nagakinahanglan ini sing madamo nga tion, pagtuon, kag pagpailob.

Sang primero, naggamit kami sing mga larawan kag mga diagram, kag ginhuptan namon nga simple ang amon lenguahe. Gin-upod namon sia sa Cristianong mga miting kag sa pagbantala nga hilikuton, bisan pa nga halos indi niya nahangpan ang nagakatabo. Sang nagsagad na si Kristi sa sign language, nahangpan na niya karon ang mga butang nga wala niya anay mahangpan! Walay sapayan sini, madamo gihapon nga mga tinaga, mga dinalan, kag mga ideya sa Biblia ang mabudlay ipaathag. Ang isa sa iya paborito nga mga libro amo Ang Akon Libro sang mga Sugilanon sa Biblia, * nga ginsulat ilabi na para sa mga bata. Ang madamo-sing-duag nga mga  larawan​—upod ang pila ka diagram nga ginhimo namon​—nakabulig gid. Sang ulihi, nagtubo sa tagipusuon ni Kristi ang gugma sa Dios.

Mainayuhon nga ginbuligan kami sang prinsipal sa eskwelahan ni Kristi nga makapakigkomunikar sa iban pa nga mga Saksi nga may bungol man nga mga bata. Nakabulig gid sing daku sang ginpaathag nila kon paano makabantala ang mga bungol sa mga tawo nga makabati. Ang isa ka paagi amo ang pagpabasa nila sa mga tawo sing mga kard nga may naimprinta nga mensahe gikan sa Kasulatan. Gani sang handa na si Kristi sa pagpaambit sang kamatuoran sang Biblia sa iban, mahapos niya nga nahimo ini! Nangin di-bawtismado sia nga manugbantala sing maayong balita sa edad nga 14. Sang 1994 ginbawtismuhan sia sa edad nga 17.

Apang, si Kristi nagakinahanglan sing maayo nga mga kaupod, kag nabudlayan sia sa pagpakig-abyan sa indi bungol nga mga Saksi. Gani naghiwat kami ni Gary sing mga klase sa sign language para sa mga katapo sang amon kongregasyon nga interesado sa pagbulig sa mga bungol. Ang pila nga nagtambong sa amon mga klase nagtrabaho sang ulihi subong manugpatpat para sa mga bungol. Apang ang labi pa ka importante amo nga madamo sang nagtuon sing sign language ang nalipay gid sa pagpakigkomunikar kay Kristi. Makabenepisyo na karon sing labi pa si Kristi gikan sa amon Cristianong mga miting kag mga asambleya. Tubtob sa karon aktibo sia nga nagapakigbahin sa sini. Nalipay gid si Kristi sa mahigugmaon nga interes nga ginpakita sang mga kauturan sa iya.

Isa ka adlaw ginpabutyag ni Kristi sa amon ang handum niya nga magregular payunir, ukon bug-os tion nga ebanghelisador. Ginbuligan sia ni Gary nga makakuha sing lisensia sa pagmaneho, kag sa tapos mahimos ang iban pa nga mga butang, si Kristi gintangdo nga isa ka regular payunir sang 1995. Sang 2000, nakatigayon man sia sing part-time nga trabaho sa isa ka elementarya nga eskwelahan. Nagabulig sia didto sa pagtudlo sa bungol nga mga bata.

Sa karon, si Kristi, si Gary, ang amon anak nga lalaki nga si Scott, kag ako malipayon nga nagaalagad subong mga regular payunir. Nalipay kami sa paghinguyang sing tion sa pagtudlo sa mga tawo tuhoy sa amon Dios, nga si Jehova!

‘Ang mga Handum sang Amon Tagipusuon’

Isa gihapon ka hangkat para sa amon nga si Kristi bungol. Kon kaisa kon makigbahin si Kristi sa Cristianong ministeryo, wala sia sing kaupod nga makapatpat para sa iya, wala sia sing kaupod nga mapaambitan niya sang iya mga panghunahuna kag mga balatyagon. Nagasiling sia: “Daw nagapuyo ako sa isa ka pungsod diin ang tanan nagahambal sing lain nga lenguahe.” Walay sapayan sini, natun-an namon tanan nga makigbagay sa iya kahimtangan.

Nalugpayan kami sang ginasiling sang Salmo 37:4: “Kalipay ka man sa GINUO, kag hatagan ka niya sang mga handum sang imo tagipusuon.” Handum gid ni Kristi nga makabati sang musika kag sang mga gahod sang kinaugali kag mabatian ang pagpakigsugilanon niya sa iya mga hinigugma. Ginakalangkagan ko gid ang adlaw nga mabatian ni Kristi ang akon tingog. Nagatuo kami nga ining mga handum sang amon tagipusuon ihatag sa ulihi sa amon, suno sa ginasaad sang Biblia.​—Isaias 35:5.​—Gin-amot

[Nota]

[Retrato sa pahina 14]

Si Kristi, sa edad nga 14 ka bulan, upod “Ang Akon Libro sang mga Sugilanon sa Biblia”

[Retrato sa pahina 15]

Si Kristi nagatanyag sing maayong balita nga nagagamit sang naimprinta nga kard

[Retrato sa pahina 15]

Sanday Scott, Kristi, Gary, kag Heather Forbes sa karon