Ginbaton Ko ang Pagtamod sang Dios sa Dugo

Panaysayon sang isa ka Doktor

YARA ako sa awditoryum sang ospital, nga nagasumaryo sing mga resulta sang isa ka awtopsiya sa isa ka grupo sang mga doktor. Ang pasyente nga napatay may kanser, kag nagsiling ako, “Makahinakop kita nga ang gintunaan sang kamatayon sini nga pasyente amo ang hemolysis [ang pagkapierde sang pula nga mga selula sang dugo] kag ang indi pagpanghikot sang batubato bangod sang sobra nga pagtayon sing dugo.”

Nagtindog ang isa ka propesor kag akig nga nagsinggit, “Buot mo bala silingon nga lain nga tipo sang dugo ang gintayon namon?” Nagsabat ako, “Indi amo sina ang buot ko silingon.” Ginapakita ang pila ka slide sang magamay nga mga bahin sang batubato sang pasyente, nagsiling pa ako, “Makita naton ang lysis [pagkabungkag] sang madamo nga pula nga selula sang dugo sa batubato kag sa amo makahinakop kita nga gintunaan ini sang indi pagpanghikot sang batubato.”⁠ * Nangin tensionado ang kahimtangan, kag nagmala ang akon baba bangod sang kulba. Bisan pa lamharon lang ako nga doktor kag isa sia ka propesor, pamatyag ko indi ko na mabawi ang akon argumento.

Sang natabo ini, indi ako isa sa mga Saksi ni Jehova. Natawo ako sang 1943 sa Sendai, isa ka siudad sa naaminhan nga bahin sang Japan. Tungod ang akon amay isa ka patologo kag isa ka saykayatris, namat-od ako nga magtuon sing medisina. Sa ikaduha nga tuig sang akon pag-eskwela sa medisina, sang 1970,  ginpangasawa ko ang isa ka lamharon nga babayi nga si Masuko.

Pagsulod sa Patag sang Patolohiya

Nagtrabaho si Masuko agod makapiyanpiyan sa amon samtang gintapos ko ang pag-eskwela. Nalingaw gid ako sa patag sang medisina. Nahayanghag ako sa paagi sang pagkahuman sa lawas sang tawo! Walay sapayan sini, wala ko gid ginhunahuna ang pagluntad sang isa ka Manunuga. Abi ko ang pagpanalawsaw sa medisina makahatag sing kahulugan sa akon kabuhi. Gani sang nagdoktor na ako, ginpadayon ko ang pagtuon sa medisina paagi sa pagsulod sa patag sang patolohiya​—⁠ang pagtuon sa mga kinaiya, kabangdanan, kag epekto sang balatian.

Samtang ginahimo ang mga awtopsiya sa mga pasyente nga napatay sa kanser, nagsugod ako sa pagduhaduha tuhoy sa pagkaepektibo sang mga pagtayon sing dugo. Ang pasyente nga may malala nga kanser mahimo nga kulang sing dugo bangod sang pagdugo. Bangod ang chemotherapy nagapalala sa anemia, masami nga ginaresita sang mga doktor ang pagtayon sing dugo. Apang, nagsuspetsa ako nga basi ginapalapta lang sang pagtayon ang kanser. Kon matuod man ini, sa karon nahibaluan na nga ang pagtayon sing dugo ginatunaan sang immunosuppression (pagluya sang resistensia sang lawas), nga nagapadaku sang posibilidad nga maglukmat ang tumor kag nagabuhin sang posibilidad nga makalampuwas ang mga pasyente nga may kanser.⁠ *

Sang 1975, nasumalang ko ang kaso nga ginsambit sa panugod. Ang propesor amo ang nagauyat sing kaso kag isa sia ka espesyalista sa hematolohiya (may kaangtanan sa dugo). Gani indi katingalahan nga akig gid sia sang nabatian niya ako nga nagsiling nga ang pagtayon sing dugo amo ang kabangdanan sang kamatayon sang pasyente! Apang, ginpadayon ko ang pagpresentar, kag amat-amat nga nagkalma sia.

Wala sing Balatian Ukon Kamatayon

Mga amo man sadto nga tion nga ang akon asawa ginduaw sang isa ka may edad na nga babayi nga isa sang mga Saksi ni Jehova. Gingamit niya ang tinaga nga “Jehova” sa iya pagpaathag, kag ginpamangkot sia sang akon asawa kon ano ang buot silingon sini. Ang Saksi nagsabat, “Jehova ang ngalan sang matuod nga Dios.” Si Masuko nagabasa sing Biblia sugod pa sang bata sia, apang ang Biblia nga iya gingamit nag-ilis sa ngalan sang Dios sa “GINUO.” Nahibaluan na niya karon nga ang Dios isa ka persona nga may ngalan!

Gilayon nga nagtuon sing Biblia si Masuko upod sa may edad na nga Saksi. Sang pagpauli ko halin sa ospital sing mga 1:00 sa kaagahon, malangkagon nga ginsugiran ako sang akon asawa, “Ginasiling sa Biblia nga ang balatian kag kamatayon pagadulaon!” Nagsabat ako, “Makalilipay gid ina!” Nagsiling pa sia, “Bangod nagahilapit na ang bag-ong kalibutan, indi ko luyag nga uyangan mo pa ang imo tion.” Abi ko anay luyag niya nga mag-untat na ako sa pagkadoktor, gani naakig ako kag ang amon relasyon nangin indi maayo.

Apang, wala mag-untat ang akon asawa sa pagpukaw sang akon interes. Nangamuyo sia nga buligan sia nga makakita sing nagakaigo nga teksto kag ginpakita ini sa akon. Ang mga pinamulong sa Manugwali 2:​22, 23 nagtandog gid sang akon tagipusuon: “Ano ang naangkon sang tawo sa tanan niya nga lakas nga pagpangabudlay kag sa pagtinguha sang iya tagipusuon nga nagapangabudlay sia sing lakas sa idalom sang adlaw? . . . Sa kagab-ihon wala nagapahuway ang iya tagipusuon. Ini man wala sing pulos.” Naaplikar gid ini sa akon ginahimo​—⁠nagahugod sang akon kaugalingon sa medisina adlaw kag gab-i nga wala sing matuod nga kaayawan.

Isa ka Domingo sang aga sang Hulyo 1975, sang nagkadto ang akon asawa sa Kingdom Hall sang mga Saksi ni Jehova,  gulpi lang ako namat-od nga magkadto man. Nakibot gid ang akon asawa sang nakita niya ako didto, kag mainit nga gin-abiabi ako sang mga Saksi. Sugod sadto, nagtambong ako sa miting kada Domingo. Paglipas sing mga isa ka bulan, isa ka Saksi ang nagdumala sing pagtuon sa Biblia sa akon. Pagligad sang tatlo ka bulan sugod sang una nga ginduaw sang mga Saksi ni Jehova ang akon asawa, ginbawtismuhan sia.

Pagbaton sa Pagtamod sang Dios sa Dugo

Wala madugayi natun-an ko nga ang Biblia nagasugo sa mga Cristiano nga ‘maglihi sa dugo.’ (Binuhatan 15:​28, 29; Genesis 9:4) Bangod nagaduhaduha na ako tuhoy sa pagkaepektibo sang pagtayon sing dugo, wala ako mabudlayi nga batunon ang pagtamod sang Dios sa dugo.⁠ * Ginhunahuna ko, ‘Kon may isa ka Manunuga kag amo sini ang iya ginasiling, nian husto gid ini.’

Natun-an ko man nga ang kabangdanan sang balatian kag kamatayon amo ang sala nga ginpanubli naton kay Adan. (Roma 5:12) Sadtong tion, nagapanalawsaw ako tuhoy sa arteriosclerosis. Samtang nagatigulang kita, ang aton mga kaugatan nagatig-a kag nagakitid, nga ginatunaan sang mga balatian sa tagipusuon, balatian sa utok, kag balatian sa batubato. Makatarunganon nga ang ginatunaan sini amo ang aton napanubli nga di-kahimpitan. Pagkatapos sadto, nag-ugdaw ang akon huyog sa medisina. Si Jehova nga Dios lamang ang makadula sang balatian kag kamatayon!

Sang Marso 1976, pagligad sang pito ka bulan nga nagsugod ako sa pagtuon sa Biblia, nag-untat ako sa pag-eskwela sa ospital sang unibersidad. Nahangawa ako nga indi na gid ako makaobra liwat subong isa ka doktor, apang nakatrabaho ako sa isa pa ka ospital. Ginbawtismuhan ako sang Mayo 1976. Namat-od ako nga ang pinakamaayo nga paagi nga magamit ko ang akon kabuhi amo ang pag-alagad subong isa ka bug-os tion nga ebanghelisador, ukon payunir, kag nagpayunir ako sang Hulyo 1977.

Pagpangapin sa Pagtamod sang Dios sa Dugo

Sang Nobiembre 1979, nagsaylo kami ni Masuko sa isa ka kongregasyon sa Chiba Prefecture diin kinahanglanon gid ang mga manugbantala. Nakatrabaho ako sing part-time sa isa ka ospital. Sa una nga adlaw ko sa trabaho, ginpalibutan ako sang mga doktor. Ginsagad nila ako pamangkot, “Subong isa sang mga Saksi ni Jehova, ano ang himuon mo kon may dalhon diri nga pasyente nga nagakinahanglan nga tayunan sing dugo?”

Matinahuron ko nga ginpaathag nga sundon ko ang ginasiling sang Dios tuhoy sa dugo. Ginpaathag ko nga may yara mga tal-us sa pagtayon sing dugo kag himuon ko ang bug-os ko nga masarangan agod mabuligan ang akon mga pasyente. Pagkatapos sang mga isa ka oras nga diskusyon, ang pangulo sa pagbusbos nagsabat, “Nahangpan ko. Apang kon ang isa ka pasyente nga nadulaan sing madamo nga dugo dalhon diri, kami na ang bahala sa pasyente.” Kilala ang pangulo sa pagbusbos nga mabudlay pakigbagayan nga tawo, apang pagkatapos sadto nga diskusyon nangin maayo ang amon kaangtanan, kag pirme niya ginatahod ang akon mga pagpati.

Ang Pagtahod sa Dugo Gintilawan

Samtang nagaalagad kami sa Chiba, ang bag-o nga talatapan sang mga Saksi ni Jehova sa Japan ginapatindog sa Ebina. Nagkadto kami sang akon asawa didto sing makaisa sa isa ka semana agod maatipan ang kapagros sang mga boluntaryo nga Saksi nga nagapatindog sini nga pasilidad, nga ginatawag Bethel. Pagligad sang pila ka bulan, nakabaton kami sing imbitasyon nga mag-alagad sing bug-os tion sa Ebina Bethel. Sa amo, sang Marso 1981 nagpuyo kami sa temporaryo nga mga tinukod nga nagapaistar sa kapin sa 500 ka boluntaryo nga mga manugpangabudlay. Sa aga, nagabulig ako sa pagtinlo sa mga palaliguan kag mga kasilyas, kag sa hapon ginaeksamin ko ang kapagros sang mga boluntaryo.

Ang isa sang akon mga pasyente amo si Ilma Iszlaub, nga nagkadto sa Japan halin sa Australia subong isa ka misyonera sang 1949. May leukemia sia kag ginsilingan sang mga doktor niya nga pila na lang ka bulan ang iya pagkabuhi. Nangindi si Ilma  nga tayunan sing dugo agod palawigon ang iya kabuhi kag namat-od sia nga magtener sa Bethel tubtob mapatay sia. Sadtong tion ang mga bulong nga nagapadasig sang pagpatubas sing pula nga selula sang dugo, subong sang erythropoietin, indi pa matigayon. Gani kon kaisa ang iya hemoglobin 3 ukon 4 ka gramo kanubo! (Ang normal 12 tubtob 15.) Apang ginhimo ko ang akon masarangan agod bulngon sia. Padayon nga ginpakita ni Ilma ang iya di-mationg nga pagtuo sa Pulong sang Dios tubtob mapatay sia sang Enero 1988​—⁠mga pito pa ka tuig ang naglipas!

Sa sulod sang mga tuig pila ka boluntaryo sa sanga talatapan sang mga Saksi ni Jehova sa Japan ang kinahanglan operahan. Dalayawon nga ang mga doktor sa malapit nga mga ospital nagkooperar paagi sa pag-opera nga wala naggamit sing dugo. Pirme ako gin-agda nga magsulod sa hulot-uluperahan agod magtan-aw sa mga pamaagi, kag kon kaisa, nagbulig pa gani ako sa pag-opera. Nagapasalamat gid ako sa mga doktor nga nagatahod sang panindugan sang mga Saksi ni Jehova tuhoy sa dugo. Ang pagtrabaho kaupod nila naghatag sa akon sing madamo nga kahigayunan nga mapaambit ang akon mga pagpati. Ang isa sa mga doktor nangin bawtismado nga Saksi sining karon lang.

Makawiwili nga ang mga panikasog sang mga doktor nga bulngon ang mga Saksi ni Jehova nga wala nagagamit sing dugo may talalupangdon nga epekto sa medisina. Ang mga pag-opera nga wala nagagamit sing dugo nagapamatuod sang mga benepisyo sa paglikaw sa pagpatayon sing dugo. Ginapakita sang mga pagtuon nga madali mag-ayo ang mga pasyente kag diutay lang ang mga problema pagkatapos sang operasyon.

Padayon nga Nagatuon Gikan sa Labing Daku nga Manugbulong

Ginatinguhaan ko nga mahibaluan gihapon ang pinakabag-o nga mga impormasyon sa medisina. Apang, padayon man ako nga nagatuon gikan kay Jehova, ang labing daku nga Manugbulong. Wala lamang niya ginatan-aw ang nagua nga bahin, kundi ginatan-aw niya ang aton bug-os nga pagkatawo. (1 Samuel 16:7) Subong isa ka doktor, ginatan-aw ko ang bug-os nga pagkatawo sang tagsa ka pasyente, wala lamang nagatalupangod sang iya balatian. Bangod sini, mabulong ko sing mas maayo ang pasyente.

Padayon ako nga nagaalagad sa Bethel, kag ang pagbulig sa iban nga makatuon tuhoy kay Jehova​—⁠pati na ang pagtamod niya sa dugo​—⁠isa gihapon sang akon pinakadaku nga kalipay. Ginapangamuyo ko nga ang Daku nga Doktor, si Jehova nga Dios, magadula sa indi madugay sang tanan nga balatian kag kamatayon.​—⁠Panugiron ni Yasushi Aizawa.

[Mga nota]

[Blurb sa pahina 14]

“Ginpaathag ko nga may yara mga tal-us sa pagtayon sing dugo kag himuon ko ang bug-os ko nga masarangan agod mabuligan ang akon mga pasyente”

[Blurb sa pahina 15]

“Ang mga pag-opera nga wala nagagamit sing dugo nagapamatuod sang mga benepisyo sa paglikaw sa pagpatayon sing dugo”

[Retrato sa pahina 15]

Ibabaw: Nagapamulongpulong tuhoy sa Biblia

Tuo: Upod sa akon asawa, si Masuko, sa karon