Pornograpiya—Magkatuhay nga mga Punto-de-Vista

“Nagatuga ini sing mabaskog nga mga handum nga dapat wala nagaluntad, nagapukaw ini sing daku nga kailigbon nga indi dapat pasundan.”​—⁠Tony Parsons, kolumnista.

INDI gid tuyo ni John nga magiyan sa ‘sekso sa Internet.’* Kaangay sang madamo nga tawo nga aksidente nga nakakita sing pornograpiya kag chat room sa sekso, ginagamit niya ang Internet isa ka adlaw sang di-hungod nga nabuksan niya ang isa ka site nga nagatanyag sini nga mga chat room. Wala lamang madugay, nawili na sia sa cybersex. “Ginahulat ko nga maglakat sa trabaho ang akon asawa,” hinumdom niya, “kag dayon maabtik ako nga nagabangon kag inoras nga nagakompyuter.” Sa tion sang malawig nga pagpakigsugilanon, wala sia nagadulog bisan sa pagkaon ukon sa pag-inom. “Wala ako makabatyag sing gutom,” siling niya. Nagsugod sia sa pagbinutig sa iya asawa tuhoy sa iya likom nga ginahimo. Naapektuhan ang iya konsentrasyon sa trabaho, kag nangin suspetsuso. Indi maayo ang nangin epekto sa ila pag-asawahay, kag sang luyag na niya makigkita sa isa sang iya naka-cybersex, natukiban ini sang iya asawa. Sa karon si John nagapabulong bangod sang iya pagkagiyan.

Ginasambit sang mga aktibista nga nagakontra sa pornograpiya ang mga eksperiensia subong sini subong pamatuod sang malain nga mga epekto sang pornograpiya. Nagasiling sila nga ginaguba sini ang mga relasyon kag ginapakanubo ang mga babayi, ginaabusuhan ang mga kabataan, kag nagaresulta ini sa tiko kag makahalalit nga pagtamod sa sekso. Sa pihak nga bahin, ang pornograpiya ginadepensahan sang mga nagasuportar sa sini subong wala limitasyon nga pagpakita sang balatyagon kag ginatamod nila ang mga nagakontra sa pornograpiya subong tuman kahinhin. “Indi dapat ikahuya sang mga tawo ang ila interes ukon kaibog sa sekso,” siling sang isa nga pabor sa pornograpiya. “Ang pornograpiya sarang magamit sa pagsugod kag sa pagpukaw sing tampad nga paghambalanay tuhoy sa sekso.” Nagasiling pa gani ang iban nga ang madasig nga pagdamo sang pornograpiya tanda sang isa ka bukas kag maligdong sing panghunahuna nga katilingban. “Ang katilingban nga makasarang sa pagtan-aw sa maathag nga paglaragway sa sekso sa ulot sang nagasugtanay nga mga adulto mahimo isa ka katilingban nga indi nasaw-ahan sa homoseksuwalidad kag lesbianismo kag sa pag-alangay sang mga babayi,” siling sang manunulat nga si Brian McNair.

Nangin kalahamut-an bala ang pornograpiya bangod sang magkatuhay nga mga punto-de-vista sang katilingban? Ngaa lapnag gid ini? Ang pornograpiya isa gid bala ka makatalagam nga huyog? Ini nga mga pamangkot binagbinagon sa masunod nga mga artikulo.

[Nota]

Ang mga ngalan gin-islan.