Pamangkot sang mga Pamatan-on . . .

Paano Ako Makakita sing Maayo nga Kaupod sa Kuwarto?

“Kon wala ako sing mga kaupod sa kuwarto, wala kuntani ako mangin bug-os tion nga ebanghelisador kag wala ko kuntani mabayaran ang arkila kag ang mga balayran sa balay.”—Lynn. *

KON ang mga pamatan-on magbiya sa balay, sa masami nagakakibot sila nga mahibaluan kon daw ano gali ka gasto ang mangabuhi. Para sa madamo, agod masarangan ang daku nga gasto sa pangabuhi, kinahanglan nila ang isa ukon kapin pa ka kaupod sa kuwarto (roommate) nga makabulig sa mga gasto.

Apang subong sang ginpakita sang nagligad nga artikulo sa sining serye, ang isa ka kaupod sa kuwarto—ilabi na ang isa nga estranghero gid—daku nga hangkat. * Matuod ini bisan sa tunga sang pamatan-on nga mga Cristiano nga nag-upuray sa kuwarto agod mag-alagad subong bug-os tion nga mga ebanghelisador. Ano man ang imo kahimtangan, kon nagapangita ka sing kaupod sa kuwarto, makatarunganon gid nga gamiton mo ang “praktikal nga kaalam” sa pagpili sa iya. *​—Hulubaton 3:21.

Ang Katalagman sang Malain nga Kaupdanan

Madamong lamharon nga mga adulto ang nagapangita sing posible nga mga kaupod sa kuwarto sa mga bulletin board, classified ads sa mga pamantalaan, kag Internet. Apang para sa pamatan-on nga mga Cristiano, makatalagam gid ini. Ayhan makilala mo diri ang mga tawo nga indi pareho sa imo sing pagtuo, moral, ukon talaksan. Makitid bala sing hunahuna ang isa ukon indi mainabyanon kon masigkatumuluo lamang ang luyag niya nga mangin kaupod sa kuwarto? Indi, maalamon ini. Ang Biblia mismo nagapaandam: “Ang malain nga kaupdanan nagadunot sang mapuslanon nga mga batasan.”—1 Corinto 15:33.

Binagbinaga ang lin-ay nga si Lee. Indi pa sia bawtismado nga Cristiano sang nagpuyo sia sa dormitoryo sang unibersidad. “Makatalagam ini nga palibot,” hinumdom niya. “Naabtan sang iban nga mga pamatan-on nga babayi ang ila kaupod sa kuwarto nga nagapakigsekso.” Sang ulihi, may malain nga epekto sa espirituwalidad ni Lee ang pagpuyo didto. “Wala na ako makatambong sa kalabanan nga Cristianong mga miting,” ginabaton niya. Indi makapakibot nga ang iya paggawi naglain. “Isa ka adlaw, namuyayaw ako, kag ang isa sang akon mga kaupod sa kuwarto nagsiling: ‘Nahamuot bala si Jehova sa sina?’ ” Makahuluya gid! Maayo na lang naghalin si Lee sa sadtong malain nga palibot kag nag-uswag sa espirituwal. Apang ginapakita sang iya eksperiensia ang katalagman sang pagpuyo upod sa mga tawo nga wala nagatahod sang imo mga talaksan.

Pagpangita sing Maayo nga mga Kaupod sa Kuwarto

Apang, diin ka mangita? Magsugod ka sa pagpangita sa inyo lokal nga kongregasyon sang mga Saksi ni Jehova. Sa masami, ang bug-os tion nga mga ebanghelisador makakita sing iban pa nga mahunahunaon-sa-espirituwal nga mga pamatan-on sa nagkalainlain nga eskwelahan kag miting nga ginahiwat  ilabi na para sa bug-os tion nga mga manugbantala. * Ang mga ginikanan, mga gulang sa lokal nga kongregasyon, nagalakbay nga mga manugtatap, kag ang iban pa makabulig man; ayhan may kilala sila nga mga pamatan-on nga mangin maayo nga mga kaupod sa kuwarto.

Ang pagsugid sa iban nga nagakinahanglan ka sing kaupod sa kuwarto makabulig man. Kon mas madamo nga tawo ang sugiran mo, mas daku ang posibilidad nga makakita ka. (Manugwali 11:6) Labaw sa tanan, mangayo sing bulig kay Jehova nga makakita ka sing kaupod sa kuwarto, kag magsalig ka nga pakamaayuhon niya ang imo mga panikasog.—1 Juan 5:14, 15.

Pagpangusisa

Kon makakita ka na sing posible nga kaupod sa kuwarto, ayhan nalangkag ka nga mangin kaupod sia. Apang maalamon nga mangusisa anay. Sia bala ‘ginasugid sing maayo sang mga kauturan’ sa iya kongregasyon? (Binuhatan 16:1, 2) Ayhan masugilanon ninyo sang imo mga ginikanan ang sangkol sa espirituwal nga mga indibiduwal nga nakakilala sa iya. Mahimo kamo mamangkot: ‘Ano ang iya reputasyon? Malig-on bala sia sa emosyon kag sa espirituwal? Nagabantala bala sia sa iban kag nagakomento sa mga miting? Kilala bala sia nga may matadlong nga paggawi?’

Dumduma, “sia nga nagalakat upod sa maalam nga mga tawo magaalam.” (Hulubaton 13:20) “Ang akon kaupod sa kuwarto mahunahunaon gid sa espirituwal,” siling ni David. “Nagabulig ini sa akon agod mahuptan ang akon espirituwalidad.” Si Renee, nga may pila na nga nangin kaupod sa kuwarto, nagsiling man: “Ang akon iban nga mga kaupod sa kuwarto nagapanugda nga basahon namon ang isa ka kapitulo sa Biblia kada gab-i. Bangod ang akon mga ginikanan indi mga Saksi, wala gid kami sing pangpamilya nga pagtuon sa Biblia. Gani ang ‘pangpamilya nga pagtuon’ upod sa akon mga kaupod sa kuwarto maayo gid para sa akon!” Huo, ang kaupod sa kuwarto nga may gugma man sa espirituwal nga mga butang isa gid ka pagpakamaayo.

Paghambalanay sing Prangka

Masunod, magkitaay kamo kag maghambalanay. Makabulig ini agod mahibaluan mo kon bala magasahuay  kamo. Sing makawiwili, ginpakita sang isa ka pagtuon nga ginreport sa balasahon nga Communication Research Reports nga ang mga magkaupod sa kuwarto nga magkapareho sing ugali sa ila pagpakigkomunikar “nagreport sing pinakamataas nga pagkakontento kag kaluyag sa kaupod sa kuwarto.” Gani kon ikaw prangka, mainabyanon, kag palahambal, mangin problema mo kon ang imo kaupod sa kuwarto mahuluy-on, hipuson, ukon mahuyugon mag-isahanon.

Bisan pa indi mo luyag nga ang inyo paghambalanay daw mangin subong sang pulis nga nagapangusisa, mapuslanon nga hambalan ninyo ang mga tulumuron kag mga plano sang isa ka posible nga kaupod sa kuwarto. Luyag bala niya mag-uswag sa espirituwal ukon luyag lamang bala niya likawan ang mahuol nga kahimtangan sa puluy-an? Ginpatalupangod ni Lynn ang isa pa ka problema nga mahimo mag-utwas: “May kaupod ako anay sa kuwarto nga naga-date, kag ang iya nobyo pirme nagaduaw kag gab-i na nagapauli.” Nalainan kag nasaw-ahan si Lynn sa ila ginapakita nga matam-is nga pagtamdanay. Apang, ini nga mga problema malikawan kon kaisa kon may yara sadsaran nga mga pagsulundan nga ginhimo sing abanse. Halimbawa, si Renee nagsiling: “May pagsulundan kami nga paglampas sang gintalana nga oras, ang mga lalaki dapat na maglakat.” Maalamon man nga magsugtanay ang duha ka magkaupod sa kuwarto nga ang isa indi dapat mag-isahanon sa kuwarto ukon sa apartment upod sa tuhay nga sekso.

Mapuslanon man nga hambalan ang mga butang subong sang kalingawan, mga luyag, kag nanamian nga musika. “Luyag ko ang kaupod sa kuwarto nga magkapareho kami sing gusto, magkapareho sing personalidad, magkapareho sing butang nga luyag himuon,” siling ni Mark. Matuod, wala ini nagakahulugan nga indi na mahimo mag-updanay ang duha nga indi magkapareho sing luyag. Ang importante gid amo, Daw ano kamo ka mapasibusibuon? Handa bala kamo nga indi pagsapakon ang mga kinatuhayan kag magpasibu agod makigbagay sa isa kag isa?

Si Lee nagapanugda: “Dapat ka man mamangkot kon ano ang iya ginapaabot kon mag-updanay kamo. Ang iban nga mga tawo nagapaabot nga mangin mahirop nila ikaw nga abyan kag suod nga kaupod. Apang indi ako interesado sa sini.” Si David nagsiling man: “Luyag ko ang isa ka kaupod sa kuwarto nga makabulig sa akon sa paghimo sing pila ka butang apang isa nga wala nagahunahuna nga dapat sia pirme magtabidtabid sa akon kon may himuon ako upod sa iban nga mga tawo.” Nahisanto man sa sini, hibalua kon interesado sia nga mangin kaupod mo sa hilikuton nga pag-ebanghelyo ukon kon may iban pa sia nga ginahunahuna, subong sang pag-alagad sa nagahambal-sing-dumuluong nga kongregasyon.

Sa katapusan, pat-ura nga wala ninyo ginakalimtan ang mga butang subong sang pagluto (makahibalo bala kamo nga duha magluto?), pagbuligay sa hilikuton sa balay, paggamit sang personal nga mga kasangkapan, lugar sa closet, muwebles, lugar sa talaguan, kag mga hinuptanan. Paagi sa pagbinagbinag sini nga mga butang, malikawan ninyo ang di-paghangpanay kag paglainay sing buot. Ang Hulubaton 20:18 nagasiling: “Paagi sa laygay malig-on nga matukod ang mga plano.”

“Sing Nagakaigo kag Suno sa Kahimusan”

Ang isa pa ka mapuslanon nga prinsipio mabasa sa Lucas 14:28, nga nagasiling: ‘Bulubantaa ang kabilihanan.’ Huo, kuwentaha kon pila ang inyo magasto. Pila ang gastuhon sa arkila? Sa pagkaon? Sa mga balayran subong sang suga kag tubig? Magabuligay bala kamo sa pagbayad sa telepono? Kon amo, paano ninyo tungaon ang balayran? “Dapat ko pat-uron nga mabayaran niya ang iya bahin sa mga gasto antes sia kuhaon nga mangin kaupod ko sa kuwarto,” siling ni Lynn. Ang magasin sa kompyuter nga The Next Step nagsiling sing husto: “Ang mga kaupod sa kuwarto nga wala nagabulig sa pagbayad sa arkila ukon sa gasto sa pagkaon . . . ukon indi makinuton sa paggamit sang ginabayaran nga mga kagamitan magapahuol sa imo.”

“Kon kaisa ang problema indi kon pila ang dapat niya bayaran,” siling ni Renee, “kundi kon san-o!” Nagapaathag sia: “Dapat namon bayaran ang amon arkila sa ikatlo nga adlaw sang bulan. Apang kon kaisa ang akon kaupod sa kuwarto nagalakat kon talipuspusan sang semana nga wala ginabayaran ang iya bahin, kag dapat ako magpangayo sing pasaylo sa tag-iya sang balay.” Maathag nga maalamon nga himuon ang tanan nga butang “sing nagakaigo kag suno sa kahimusan” kag indi pagpabay-an nga wala maplano ang importante nga mga butang. (1 Corinto 14:40) Sa masami, maalamon nga isulat ang kasugtanan.

Ang paghalong kag pagkamaalamon nagapaposible gid nga makakita ka sing kaupod sa kuwarto nga mangin isa ka pagpakamaayo sa imo kag indi mangin ginahalinan sang kalisdanan. Apang, ano kon mag-utwas ang mga problema kag di-pagsahuay? Binagbinagon ini sang palaabuton nga artikulo.

[Mga nota]

[Retrato sa pahina 26]

May katalagman kon mangin kaupod sa kuwarto ang mga indibiduwal nga wala nagasunod sa mga prinsipio sa moral sang Biblia

[Retrato sa pahina 26]

Antes magsugot nga mag-updanay, magkitaay anay kamo kag hambalan ang importante nga mga butang