May Solusyon Na!

HANDURAWA ang isa ka kalibutan diin ang tagsa ka bata tunay nga naluyagan, tunay nga ginahigugma, kag ginapakamaayo nga may mainulikdon, mahigugmaon nga mga ginikanan nga maluyag gid sa paghatag sing pinakamaayo nga laygay kag panuytoy sa ila anak. Handurawa ang isa ka kalibutan diin ang tagsa ka bata mapagros sing lawas kag sing hunahuna, diin indi na makita ang mga bata sa kalye, kag diin ang mga kabataan indi na pagdingutan sang ila pagkabata agod magtrabaho bangod sang kapurauton!

Makalilipay gid bala? Siempre. Mapatihan gid bala? Amo sini ang ginahunahuna sang mga Saksi ni Jehova, kag tungod ini sa duha ka rason.

Ang mga Ginikanan Makapakigbahin sa Solusyon

Pat-od gid nga nagaugyon kamo nga ang mga hamtong may ikasarang agod malubad​—⁠kon kaisa agod matapna pa gani—ang pila ka problema sang mga kabataan. Siempre pa, ginaaman ini kon sila, nga mga hamtong, handa sa paghimo  sini. Huo, ang mga ginikanan mismo may isa sang mga solusyon sa problema.

Halimbawa, ang mga hamtong nga makasarang sa pagtuman sa laygay sang Biblia nga “ang asawa indi dapat magbulag sa iya bana . . . kag indi dapat bayaan sang bana ang iya asawa” wala sing mga kabataan nga nagaantos bangod sang pagkabuhi sa isa ka puluy-an nga ginwasdak bangod sang pagbulagay ukon diborsio.​—⁠1 Corinto 7:​10, 11.

Ang mga hamtong nga handa sa pagsunod sa laygay sang Biblia nga ‘maglakat sing disente, indi sa magansal nga kinalipay kag paghinubog,’ wala sing mga kabataan nga nagaantos sang kalisod nga naeksperiensiahan sang mga may palahubog ukon nagadroga nga mga ginikanan.​—⁠Roma 13:​13; Efeso 5:⁠18.

Ang mga hamtong nga handa sa pagsunod sa laygay sang Biblia nga ‘maglihi sa pagpakighilawas’ nagabulig agod mabuhinan ang katalagman nga ang ila mga kabataan magdaku nga wala maluyagan, ayhan sa isa-sing-ginikanan nga pamilya.​—1 Tesalonica 4:3; Mateo 19:9.

Ang mga hamtong nga handa sa pagsunod sa laygay sang Biblia, “Dili ninyo pagpaakiga ang inyo mga anak, agod nga indi magluya ang ila buot,” kag nga ‘nagahigugma sang ila mga anak’ indi makatigayon sing mga kabataan nga nagaantos sing pisikal ukon mental nga kasakit sang bisan ano man sang lainlain nga mga sahi sang pag-abuso.​—⁠Colosas 3:​21; Tito 2:⁠4.

Bilang pagsumaryo, kon ang tanan nga hamtong handa sa pagsunod sa laygay sang Biblia nga ginhatag ni Jesus, “Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila,” mahimo bala nga may yara minilyon sang wala maluyagan kag wala ginahigugma nga kabataan?​—⁠Mateo 7:⁠12.

Sing makalilipay, madamong hamtong ang handa sa paghimo sang tanan sa ibabaw. Apang, sing makapasubo, indi tanan ang handa, kag diri nasandig ang problema. Kag nasapwan bisan sang mga handa nga ang ila mga panikasog masunson nga ginapaslaw sang tawhanon nga pagkadi-himpit kag sang mga butang nga indi nila masarangan kontrolon. Ang mga tawo mahimo makapakigbahin sa solusyon sang mga problema sang mga kabataan, apang maathag gid nga indi sila makasarang sa paghatag sing bug-os nga solusyon.

Ang Gobierno sang Dios nga Magaaman sing Bug-os nga Solusyon

Ang manunulat nga si John Ruskin, nga ginsambit sa nauna nga artikulo, nagapati gid nga ang “nahauna nga katungdanan sang Estado amo ang pagpat-od nga ang tagsa ka bata nga natawo sa sini dapat pabalayan sing maayo, panaptan, pakaunon, paeskwelahon, tubtob makadangat sia sa mga tinuig nga makasarang na sa pagpamat-od.” Apang, ginbaton ni Ruskin nga “agod mahimo ini ang Gobierno dapat nga may awtoridad sa ibabaw sang mga tawo nga sa karon indi gani naton mahanduraw.”

Isa lamang ka gobierno nga may pagsakdag sang Dios ang may mainayuhon nga awtoridad nga ginhambal ni Ruskin. Kag ginsaad ang subong gid sina nga gobierno​—⁠isa nga ginsambit ni Jesus sa Mateo 6:​9, 10. Sa tion nga makontrol na sing bug-os sining gobierno sang Dios ang mga hilikuton sa duta, gamiton sini ang iya awtoridad sa ibabaw sang tanan nga tawo​—⁠paagi sa pagpabalay, pagpapanapot, pagpakaon, kag pagpaeskwela sa tanan nga sakop sini, pati na sa mga kabataan. (Isaias 65:​17-25) Apang madamo pa ang himuon sining himpit nga gobierno.

Ang Ginharian sang Dios magapasag-uli sang mga tawo sa himpit nga kahimtangan, nagapaposible sa ila nga mapadaku ang mga kabataan sa himpit nga pagkatimbang. (Job 33:​24-26) Ang mga kabataan saguron sa espiritu nga may paghidait kag bug-os kalibutan nga paghiliutod, sa mga tulumuron nga ginpahamtang sa Deklarasyon Sang NU sa mga Kinamatarong Sang Bata. (Salmo 46:​8, 9) Indi na liwat kinahanglan ang Internasyonal nga Tuig Sang Bata ukon ang Kombension sa mga Kinamatarong Sang Bata.

Ang pagpasag-uli sang himpit nga kapagros sa mga ginikanan kag sa baldado nga mga kabataan mangin isa lamang ka mahapos nga hilikuton para kay Cristo Jesus, ang Hari sining langitnon nga gobierno. Ang mga milagro sang pagpang-ayo nga ginhimo niya samtang yari sia sa duta isa ka garantiya. (Lucas 6:​17-19; Juan 5:​3-9; 9:​1-7) Bisan ang pagbanhaw sa napatay nga mga kabataan kag napatay nga mga ginikanan masarangan niya himuon!​—⁠Mateo 9:​18-25.

Makalilipay gid mahibaluan nga ang tion para sa pagpanghikot sang Dios tungod sa mga kabataan sang duta malapit na!

 [Kahon/Mga laragway sa pahina 12]

Bulig Para sa mga Pamatan-on

Ang mga Saksi ni Jehova interesado gid sa pagbulig sa mga pamatan-on agod malikawan ang mga problema kag sa pagpakita sa ila kon paano labing maayo nga malandas ang mga problema nga indi malikawan. Busa, sa sulod sang mga tinuig nagbalhag sila sing pila ka bulig nga gindesinyo agod mapaayawan ang mga kinahanglanon sang mga pamatan-on​—⁠halin sa mga bata nga wala pa nagaeskwela tubtob sa mga tin-edyer. Ining mga publikasyon nagalakip sa mga libro nga Ang Akon Libro Sang mga Sugilanon sa Biblia kag Questions Young People Ask​—⁠Answers That Work subong man sa video nga natig-uluhan Young People Ask​—⁠How Can I Make Real Friends? Matigayon ini gikan sa mga Saksi ni Jehova nga nagapuyo sa inyo lugar ukon paagi sa pagsulat sa mga manugbalhag sining magasin.

Tuhoy sa ila kaugalingon nga mga anak, ginapakita sang mga Saksi ni Jehova sa ila nga naluyagan sila kag ginahigugma paagi sa tayuyon nga pagbinagbinag sa ila sang ila mga problema. Ang mga ginikanan masunson nga nagagamit sang matahom nga impormasyon nga ginhatag sa ginsambit-sa-ibabaw nga mga bulig sa pagtuon subong basihan para sa isa ka progresibo, regular nga programa sang paghanas sa mga pamatan-on. Ayhan luyag ninyo sundon ini man nga paagi sa inyo mga anak.