Cristianong Gugma Kontra sa Isa ka Bulkan

SANG KORESPONSAL SANG MAGMATA! SA CAMEROON

ISA ka higante ang naglupok sa kasingkal sang nagligad nga tuig sa pungsod sang Cameroon sa Katundan nga Aprika. Ang Mount Cameroon isa ka bulkan nga nagataas sing 4,070 metros sa ibabaw sang nibel sang dagat. Ini nga paglupok—ang ikalima nga paglupok sang bulkan sa ika-20 nga siglo​—⁠amo kuno ang labing masingki kag grabe tubtob karon.

Ang nahauna nga paglupok natabo sang Sabado sang hapon, Marso 27, 1999. Ang mga nakasaksi sa banwa sang Buea, nga nahamtang sa kunsaran sang bukid, nagreport nga ang mga pader, mga balay, kag bisan mga kahoy nagtay-ug sing mabaskog. Sang masunod nga gab-i, sang mga alas otso y media, natabo ang labing mabaskog, labing masingki nga pagtay-ug sa rehiyon. Nabatyagan ini tubtob sa 70 kilometros nga kalayuon sa Douala. Ang ulong-dinalan sang Le Messager sang Martes, Marso 30, 1999, nagsiling: “Paglupok sang Mount Cameroon—250,000 ka Tawo ang Nag-atubang Sang Sunog.” Ini nagpadayon: “Ang duta nagkurog sing 50 ka beses sa duha ka adlaw; 4 ka buho na ang nakita; ginatos ka kabalayan ang nawasdak; ang palasyo sang presidente sa Buea naguba.”

Mga 80 ka Saksi ni Jehova ang nagapuyo sa Buea. Madamong puluy-an ang naguba kag indi na makay-o, lakip ang isa nga ginagamit subong Kingdom Hall. Apang, wala sing napatay.

Ang Cristianong Gugma Nagapanghikot

Ang Cristianong gugma maabtik nga nagpanghikot agod makay-o ang kagulub-an nga tuga sining masingki nga higante. Isa ka relief committee ang gintangdo, ang Nagadumala nga Hubon sang mga Saksi ni Jehova naghimo sing kahimusan agod maaman ang kinahanglanon gid nga pundo, kag ginatos sang mga Saksi ang gilayon nga nagsakripisyo sing mahigugmaon sang ila tion, kusog, kag kuwarta.

Ang mga kongregasyon sang mga Saksi ni Jehova nagpadala sing mga pagkaon. Ang isa ka Saksi nagdonar sing 1,000 ka semento nga bloke. Ang isa pa nagbulig nga mabakal sing barato ang aluminyum nga mga atop. Ang isa pa gid naglakat sing 16 kilometros agod makakuha sing kahoy. Ang isa ka pamatan-on nga lalaki nga nakasupot sing dote nga inugbayad niya sa iya mangin mga ugangan nagpaisol sang iya kasal kag gingamit ang kuwarta sa pagkay-o sang iya chain saw. Nagkadto sia sa kagulangan, kag tatlo ka semana sia nga nagpamulod sing mga troso nga bastante para sa isa ka balay! Gintus-on sang mga mabukod kag lamharon nga mga Cristianong lalaki ang troso pakadto sa isa ka lugar nga lima ka kilometros ang kalayuon, diin ginhakot ini sang isa ka trak.

 Ang liwat nga pagpatindog nagsugod sang Abril 24 sang 60 ka boluntaryo ang nagtipon sa lugar nga natabo ang kalamidad. Sang masunod nga mga talipuspusan sang semana, yadto nga kadamuon nagdugang tubtob sa kataason nga 200. Tatlo ka Saksi nga may bug-os tion nga trabaho ang nagakari pagkatapos sang ila regular nga adlaw sang trabaho kag nagtukod tubtob pasado sa tungang-gab-i. Ang isa ka Saksi halin sa Douala nagatrabaho sa iya sekular nga palamugnan sa bug-os nga aga; pagkatapos sini nagamotorsiklo sia sing 70 kilometros kag nagtrabaho tubtob tungang-gab-i antes magpauli. Anom ka balay ang nahuman sa wala pa duha ka bulan. Samtang, ang Buea Congregation nagpadayon sa paghiwat sing mga miting sa isa ka pribado nga balay, bisan pa nga ang tumalambong sa mga miting halos pilo sang kadamuon sang mga katapo sang kongregasyon.

Sini man nga tion, ang relief committee nagpanagtag sing kapin sa 40,000 ka tabletas sa pagtinlo sang mahigko nga tubig kag nagpaospital sa mga napulo ka tawo nga gintapikan sing mga balatian sa respiratoryo bangod sang makahililo nga gas kag abo halin sa bulkan. Ano ang reaksion sang mga nakasaksi sining Cristianong gugma?

Ang Cristianong Gugma Nagapangibabaw

Sa tapos makita ang isa sang mga balay nga gintukod sang mga kauturan, isa ka tawo halin sa Provincial Delegation of Agriculture ang nagsiling: “Ang balay isa mismo ka daku nga panaksi . . . , isa ka tanda sang gugma.” Ang isa ka maestra nagkomento: “Wala pa ako makakita sing subong sini nga butang sa akon kabuhi. . . . Isa gid ini ka tanda sang matuod nga Cristianismo.”

Ang personal nga mga nabuligan nagapasalamat man. Si Timothy, 65 anyos kag masakiton, nagsulat: “Kada makita namon ang amon bag-o nga balay, nagalumawlumaw ang amon mga mata sa kalipay. Padayon namon nga ginapasalamatan si Jehova sa ginhimo niya sa amon.” Ang isa ka balo nga indi Saksi ni Jehova nadulaan sang tanan nga pagkabutang upod sang iya apat ka anak sang nawasdak ang ila balay. Pagkatapos sina, ginkawat sang mga ginsuhulan sa pagbulig sa iya ang iya mga inug-atop. Ang mga boluntaryo nga Saksi nagbulig sa iya. Sia nagsiling: “Indi ko mahibaluan kon paano magpasalamat. Ang akon tagipusuon nalipay gid.” Si Elizabeth, nga asawa sang isa ka Cristianong gulang, nagsiling: “Nalipay ako nga may gugma sa organisasyon ni Jehova. Ginapakita sini nga nagaalagad kita sa buhi nga Dios.”

Ang paglupok sang bulkan mabaskog gid, apang wala sini mahapay ang Cristianong gugma sining paghiliutod. Subong nga si apostol Pablo gin-inspirar sa pagsulat, “ang gugma wala gid nagakapaslawan.”—1 Corinto 13:8.

[Mga laragway sa pahina 16]

Ang daw mga suba nga lava nga nagailig nagpanghapay sing daku

[Laragway sa pahina 17]

Ang mga boluntaryo nagpangabudlay sing lakas sa pagkay-o sa naguba nga mga puluy-an

[Laragway sa pahina 16, 17]

Mount Cameroon