NAHIBALOAN mo bala kon ano ang ginahimu sining mga tao? Makadto sila sa inaway. Ang mga lalaki sa unahan nagaamba. Apang mahimu mamangkot ka: ‘Ngaa wala sing mga espada kag bangkaw ang mga nagaamba?’ Tan-awon naton.

Si Josapat hari sang nabagatnan duha ka tribu nga ginharian sang Israel. Nagkabuhi sia sang tion ni Hari Ahab kag Jesabel. Apang si Josapat isa ka maayong hari. Gani sa madamung tinuig maayo ang pangabuhi sang kataohan sa duha ka tribu nga ginharian.

Apang karon nabatian ni Josapat nga nagapakari ang dakung hangaway gikan sa pungsod sang Moab, Amon kag Bukid sang Sier sa pagsalakay sang iya kataohan. Ang mga Israelinhon nagkadto sa templo diin si Josapat nagapangayo sing bulig kay Jehova.

Namati si Jehova. Ginsugo niya ang isa sang iya mga alagad nga sugiran ang kataohan: ‘Ang inaway indi inyo, kundi iya sang Dios. Indi kamo makig-away. Magbantay lang kamo, kag tan-awa kon paano kamo luason ni Jehova.

Pagkaaga, ginsilingan ni Josapat ang kataohan: ‘Magsalig kay Jehova.’ Nian nagbutang sia sing mga manug-amba sa atubangan sang iya mga soldado, kag samtang nagamartsa sila nag-amba sila sing pagdayaw kay Jehova. Nahibal-an mo bala kon ano ang natabu? Ginpaaway ni Jehova ang kaaway nga mga soldado sa tunga nila, kag sang mag-abot ang mga Israelinhon, patay na sila tanan!

Indi bala maalamon si Josapat sa pagsalig kay Jehova? Mangin maalamon kita, kon magsalig man kita sa Iya.