SEKSION 14
Naghambal ang Dios Paagi sa Iya mga Propeta
Gintangdo ni Jehova ang mga propeta sa pagsugid sing mga mensahe parte sa paghukom, putli nga pagsimba, kag paglaum sa Mesias
SA TION sang mga hari sa Israel kag Juda, may ginpili nga mga tawo agod mangin mga propeta. Mga tawo sila nga may daku nga pagtuo kag kaisog sa pagsugid sang mga paghukom sang Dios. Binagbinaga ang apat ka panguna nga tema nga ginsugid sang mga propeta sang Dios.
1. Kalaglagan sang Jerusalem. Madugay pa antes ginlaglag kag ginbiyaan ang Jerusalem, ginpaandam na ini sang mga propeta sang Dios nga sanday Isaias kag Jeremias. Sa maathag nga mga tinaga, ginsugid nila kon ngaa naakig ang Dios sa sini nga siudad. Ang Jerusalem napamatud-an nga wala na nagarepresentar kay Jehova bangod sang ila butig nga pagsimba, korapsion, kag kapintas.—2 Hari 21:10-15; Isaias 3:1-8, 16-26; Jeremias 2:1–3:13.
2. Pagpasag-uli sang putli nga pagsimba. Pagkatapos sang 70 ka tuig nga pagkabihag, hilwayon ang katawhan sang Dios gikan sa Babilonia. Mabalik sila sa ila dutang natawhan kag patindugon liwat ang templo ni Jehova sa Jerusalem. (Jeremias 46:27; Amos 9:13-15) Mga 200 ka tuig antes malutos ang Babilonia kag ipasag-uli ang putli nga pagsimba, gintagna ni Isaias nga ang ngalan sang magadaug sa ila amo si Ciro. Detalyado pa gani nga ginsaysay ni Isaias ang indi kinaandan nga paagi nga himuon ni Ciro agod madaug ang siudad.—Isaias 44:24–45:3.
3. Ang pag-abot sang Mesias kag ang matabo sa iya. Matawo ang Mesias sa banwa sang Betlehem. (Miqueas 5:2) Mapainubuson sia, magakadto sa Jerusalem kag magasakay sa asno. (Zacarias 9:9) Bisan pa mabuot sia kag mainayuhon madamo ang magasikway sa iya. (Isaias 42:1-3; 53:1, 3) Magaantos sia sing mapintas nga kamatayon. Katapusan na bala ini sang Mesias? Indi, kay ang iya halad amo ang basihan agod mapatawad ang sala sang madamo. (Isaias 53:4, 5, 9-12) Mahimo lamang ini kon mabanhaw ang Mesias.
4. Ang paggahom sang Mesias sa duta. Indi kaangay sang mga tawo nga makasasala, nga indi makasarang maggahom sa ila kaugalingon sing mahidaiton, ang Mesias nga Hari pagatawgon nga Prinsipe sang Paghidait. (Isaias 9:6, 7; Jeremias 10:23) Sa iya paggahom, mangin mahidaiton ang tanan nga tawo lakip na ang tanan nga kasapatan. (Isaias 11:3-7) Wala na sing balatian. (Isaias 33:24) Bisan ang kamatayon dulaon sing dayon. (Isaias 25:8) Sa paggahom sang Mesias, banhawon sa duta ang mga napatay.—Daniel 12:13.
