LEKSION 59
Masarangan Mo ang Paghingabot
Ang tanan nga Cristiano makaeksperiensia gid sang pagpamatok, ukon paghingabot pa gani. Mahadlok bala kita sa sini?
1. Ngaa hingabuton gid kita?
Ang Biblia nagsiling: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12) Ginhingabot si Jesus bangod indi sia bahin sang kalibutan ni Satanas. Indi man kita bahin sang kalibutan, gani wala kita natingala kon hingabuton man kita sang mga gobierno sang kalibutan kag sang mga relihion.—Juan 15:18, 19.
2. Ano ang dapat naton himuon para mangin handa sa paghingabot?
Dapat naton pabakuron subong ang aton pagsalig kay Jehova. Mangamuyo sa iya kada adlaw kag pirme basaha ang iya Pulong. Magtambong sing regular sa mga miting sang kongregasyon. Tanan ini makahatag sa imo sing kaisog kon hingabuton ka, bisan sang imo pamilya. Si apostol Pablo nga nakaeksperiensia sang madamo nga paghingabot, nagsulat: “Si Jehova ang akon manugbulig; indi ako magkahadlok.”—Hebreo 13:6.
Makahatag man sa aton sing kaisog ang pagbantala. Kon pirme kita nagabantala, nagabakod ang aton pagsalig kay Jehova kag indi na kita mahadlok sa mga tawo. (Hulubaton 29:25) Kon may kaisog ka sa pagbantala subong, makapadayon ka sa pagbantala bisan pa dumilian sang gobierno ang aton hilikuton.—1 Tesalonica 2:2.
3. Ano ang aton mabenepisyo kon ginabatas naton ang paghingabot?
Siempre, wala kita nalipay kon ginahingabot kita, pero kon ginabatas naton ini, nagabakod ang aton pagtuo. Mangin malapit pa gid kita kay Jehova bangod mabatyagan naton ang iya bulig sa tion nga daw mangampo na kita. (Basaha ang Santiago 1:2-4.) Nasakitan si Jehova kon nagaantos kita, pero nalipay sia kon ginabatas naton ini. Ang Biblia nagasiling: “Kon nagabatas kamo sang pag-antos bangod sa paghimo sing maayo, kalahamut-an ini sa Dios.” (1 Pedro 2:20) Kon matutom kita nga nagabatas, hatagan kita ni Jehova sang kabuhi nga wala sing katapusan sa kalibutan nga wala na sing may nagapamatok sa matuod nga pagsimba.—Mateo 24:13.
USISAA PA GID
Usisaon naton kon ngaa posible ka mangin matutom kay Jehova bisan may paghingabot kag kon ano nga mga benepisyo ang mabaton mo.
4. Masarangan mo ang pagpamatok sang imo pamilya
Kabalo gid si Jesus nga mahimo indi gusto sang aton pamilya nga magsimba kita kay Jehova. Basaha ang Mateo 10:34-36, dayon binagbinaga ini nga pamangkot:
-
Ano ang posible matabo kon ang isa ka miembro sang pamilya magdesisyon nga mag-alagad kay Jehova?
Tan-awa ang VIDEO para makita mo ang isa ka halimbawa, dayon binagbinaga ang masunod nga pamangkot.
-
Ano ang himuon mo kon pauntaton ka sang imo pamilya ukon abyan sa pag-alagad kay Jehova?
Basaha ang Salmo 27:10 kag Marcos 10:29, 30. Pagkatapos mabasa ang kada teksto, binagbinaga ini nga pamangkot:
-
Paano ini nga promisa makabulig sa imo kon pamatukan ka sang imo pamilya ukon mga abyan?
5. Padayon nga mag-alagad kay Jehova bisan may paghingabot
Kon pauntaton kita sang iban sa pag-alagad kay Jehova, kinahanglan naton ang kaisog. Tan-awa ang VIDEO, dayon binagbinaga ang masunod nga pamangkot.
-
Paano ang mga halimbawa sa video nakapabakod sa imo?
Basaha ang Binuhatan 5:27-29 kag Hebreo 10:24, 25. Pagkatapos mabasa ang kada teksto, binagbinaga ini nga pamangkot:
-
Ngaa importante gid nga padayon kita nga mag-alagad kay Jehova bisan pa dumilian ang aton pagbantala ukon mga miting?
6. Buligan ka ni Jehova nga makabatas
Ang mga Saksi ni Jehova nga lainlain ang edad kag ginhalinan padayon nga nangin matutom sa pag-alagad kay Jehova bisan pa ginahingabot sila. Tan-awa ang VIDEO para mabal-an mo kon ano ang nakabulig sa ila. Dayon binagbinaga ang masunod nga pamangkot.
-
Sa video, ano ang nakabulig sa sini nga mga Saksi nga makabatas?
Basaha ang Roma 8:35, 37-39 kag Filipos 4:13. Pagkatapos mabasa ang kada teksto, binagbinaga ini nga pamangkot:
-
Paano ini nga mga bersikulo nagapasalig sa imo nga mabatas mo ang bisan ano nga paghingabot?
Basaha ang Mateo 5:10-12, dayon binagbinaga ini nga pamangkot:
-
Ngaa puede ka mangin malipayon bisan ginahingabot ka?
Minilyon ka Saksi ni Jehova ang nakabatas sang pagpamatok. Mabatas mo man ini!
KON MAGSILING ANG IBAN: “Indi ko masarangan ang paghingabot.”
-
Ano nga mga bersikulo ang puede mo basahon para mapabakod sila?
SUMARYO
Ginapabaloran gid ni Jehova ang aton pagtinguha nga alagaron sia bisan may paghingabot. Sa bulig niya, mabatas naton ini!
Rebyu
-
Ngaa hingabuton gid ang mga Cristiano?
-
Ano ang himuon mo subong para mangin handa sa paghingabot sa ulihi?
-
Ano ang makabulig sa imo para padayon ka nga mag-alagad kay Jehova bisan may paghingabot?
DUGANG NGA IMPORMASYON
Tan-awa kon paano ginbuligan ni Jehova ang pamatan-on nga brother nga makabatas sang ginpriso sia bangod sa iya neutralidad.
Hibalua kon ano ang nakabulig sa mag-asawa nga padayon nga maalagad si Jehova sing tinuig bisan may pagpamatok.
Hibalua kon paano mo mabatas ang paghingabot nga may kaisog.
“Handai Na Subong ang Paghingabot” (Ang Lalantawan, Hulyo 2019)
Ano dapat ang aton pagtamod kon ginapamatukan kita sang aton pamilya, kag paano naton ini masarangan?
“Ang Kamatuoran ‘Wala Nagadala sing Paghidait, Kundi sing Espada’” (Ang Lalantawan, Oktubre 2017)
Basi Manamian Ka Man
MGA PIRME GINAPAMANGKOT
Ano ang Pagtuon sa Biblia nga Ginatanyag sang mga Saksi ni Jehova?
Ang interactive nga programa nga ginatanyag sang mga Saksi ni Jehova libre lang, kag puede mo gamiton ang bisan ano nga translation sang Biblia nga gusto mo. Mahimo mo man hagaron ang imo bilog nga pamilya ukon ang bisan sin-o nimo nga abyan nga mag-upod sa imo.
