Gin-agda ni Jesus ang apat ka disipulo—sanday Pedro, Andres, Santiago, kag Juan—nga mangin mangingisda sang mga tawo. Bangod Adlaw nga Inugpahuway, nagkadto sila tanan sa sinagoga sa Capernaum. Nagpanudlo si Jesus sa sinagoga, kag nahayanghag liwat ang mga tawo sa iya paagi sang pagtudlo kay may awtoridad sia indi pareho sang mga escriba.

Sa sining Adlaw nga Inugpahuway, may tawo nga ginsudlan sang demonyo. Sa sinagoga mismo, nagsinggit ang tawo: “Ngaa ginagamo mo kami, Jesus nga Nazaretnon? Nagkari ka bala agod laglagon kami? Nakahibalo gid ako kon sin-o ka, ikaw ang Balaan sang Dios!” Apang ginsaway ni Jesus ang demonyo nga nagakontrol sa tawo: “Maghipos ka, kag maggua sa iya!”—Marcos 1:24, 25.

Gani ginpakombulsion sang malain nga espiritu ang tawo kag nagsinggit ini sing mabaskog. Pero naggua ang demonyo sa tawo “nga wala sia mahalitan.” (Lucas 4:35) Ang mga tawo sa palibot niya sa sinagoga nahalawhaw gid! “Ano ini?” pamangkot nila. “May awtoridad nga ginamanduan niya bisan ang mga demonyo, kag ginatuman nila sia.” (Marcos 1:27) Amo kon ngaa ang balita parte sini nga tumalagsahon nga hitabo naglapnag sa bug-os nga Galilea.

Halin sa sinagoga, nagkadto si Jesus kag ang iya mga disipulo sa balay ni Simon, ukon Pedro. Mataas ang hilanat sang iya ugangan. Nakitluoy sila kay Jesus nga buligan sia. Gani nagpalapit si Jesus, ginkaptan ang iya kamot, kag ginpabangon sia. Nag-ayo dayon sia kag gin-atipan si Jesus kag ang iya mga disipulo, nga mahimo naghanda sang ila pagkaon.

Sang kasisidmon, gindala sang mga tawo sa balay ni Pedro ang mga may balatian. Wala madugay, daw halos tanan nga tawo sa siudad nagkadto na sa ila. Ngaa? Kay gusto nila mag-ayo. Ang matuod, “gindala sang tanan ang ila mga masakiton sa iya. Gintungtong niya sa ila ang iya mga kamot kag nag-ayo sila.” (Lucas 4:40) Ano man ang ila balatian, gin-ayo sila ni Jesus subong sang gintagna. (Isaias 53:4) Ginhilway man gani niya ang mga ginsudlan sang demonyo. Kon maggua ang malain nga mga espiritu, nagasinggit sila: “Ikaw ang Anak sang Dios.” (Lucas 4:41) Pero ginsaway sila ni Jesus kag ginpahipos. Nahibaluan nila nga si Jesus ang Cristo, kag indi niya luyag nga ipakita nila nga kuno abi nagasimba sila sa matuod nga Dios.