Kapitulo 3

Importante Gid Kon Ano ang Imo Relihion

1. Ano ang pagpati sang madamu tuhoy sa relihion?

 ‘ANG TANAN NGA RELIHION maayo,’ siling sang madamu. ‘Lainlain lamang ini nga mga dalan padulong sa isa ka duog.’ Kon matuod ini, indi importante gid kon ano man ang imo relihion, kay buot silingon tanan nga relihion ginabaton sang Dios. Apang amo bala?

2. (a) Paano gintratar sang mga Fariseo si Jesus? (b) Sin-o ang ginpangangkon sang mga Fariseo nga ila amay?

² Sang si Jesucristo yari sa duta, may isa ka relihioso nga grupo nga ginatawag mga Fariseo. Nakatukod sila sing isa ka sistema sang pagsimba kag nagdumdom nga ginkahamut-an ini sang Dios. Apang, sa amo man nga tion, luyag nila nga patyon si Jesus! Gani ginsilingan sila ni Jesus: “Ginahimu ninyo ang mga buhat sang inyo amay.” Sila nagsabat: “Kami may isa ka Amay, ang Dios.”​—⁠Juan 8:41.

3. Ano ang ginsiling ni Jesus tuhoy sa amay sang mga Fariseo?

³ Amay gid bala nila ang Dios? Ginbaton bala sang Dios ang ila  relihion? Wala gid! Bisan pa may Kasulatan ang mga Fariseo kag nagdumdom nga ginasunod nila ini, ginpatalang sila sang Yawa. Amo sini ang ginsiling sa ila ni Jesus: “Kamo iya sang inyo amay nga Yawa, kag luyag ninyo himuon ang mga kailigbon sang inyo amay. Sia manugpatay kutob sa ginsuguran, kag wala nagtindog sa kamatuoran, . . . butigon sia kag amay sang kabutigan.”​—⁠Juan 8:44.

4. Paano gintamod ni Jesus ang relihion sang mga Fariseo?

⁴ Kon amo, indi matuod ang relihion sang mga Fariseo. Gin-alagad sini ang Yawa, indi ang Dios. Gani sa baylo nga tamdon ang relihion nga maayo, ginpakamalaut ini ni Jesus. Sia nagsiling sa relihioso nga mga Fariseo: “Ginatakpan ninyo ang ginharian sang langit sa mga tawo; kay wala kamo inyo nagasulod, ukon nagatugot sa mga manugsulod sa pagsulod.” (Mateo 23:​13) Bangod sang ila dimatuod nga pagsimba, gintawag ni Jesus ang mga Fariseo nga mga salimpapaw kag dalitan nga mga man-ug. Bangod sang ila kalainan, nagsiling sia nga padulong sila sa kalaglagan.​—⁠Mateo 23:​25-33.

5. Paano ginpakita ni Jesus nga ang madamu nga relihion indi lainlain lamang nga mga dalan padulong sa isa ka duog?

⁵ Gani wala magtudlo si Jesucristo nga ang tanan nga relihion lainlain lamang nga mga dalan padulong sa isa ka duog sang kaluwasan. Sa iya bantog nga Wali sa Bukid, si Jesus nagsiling: “Sulod kamo sa gawang nga makitid; kay masangkad ang gawang kag malapad ang dalan nga nagapadulong sa kalaglagan, kag madamu ang nagasulod sa sini; samtang makitid ang gawang kag masiput ang dalan nga nagapadulong sa kabuhi, kag pila lamang ang nakatultol sa sini.” (Mateo 7:​13, 14) Bangod wala nila ginasimba ang Dios sa husto  nga paagi, ang kalabanan yara sa dalan nga nagapadulong sa kalaglagan. Pila lamang ang yara sa dalan padulong sa kabuhi.

6. Ano ang maton-an naton gikan sa pag-usisa sa pagsimba sang pungsod sang Israel?

⁶ Ginapakita sang pag-usisa sa pagpakig-angot sang Dios sa pungsod sang Israel kon daw ano ka importante ang pagsimba sa Dios sa paagi nga iya ginakahamut-an. Ginpaandaman sang Dios ang mga Israelinhon nga magpalayo sa dimatuod nga relihion sang mga pungsod sa palibot nila. (Deuteronomio 7:​25) Ginhalad sining mga tawo ang ila anak sa ila mga dios, kag nagahimu sila sing mahigku nga buhat sa sekso, lakip ang homoseksuwalidad. (Levitico 18:​20-30) Ginsugo sang Dios ang mga Israelinhon nga likawan ining mga buhat. Sang maglalis sila kag nagsimba sa iban nga mga dios, ginsilotan niya sila. (Josue 24:​20; Isaias 63:​10) Gani nangin importante kon ano ang ila relihion.

INDI MATUOD NGA RELIHION KARON?

7, 8. (a) Ano ang tindog sang relihion sa tion sang mga inaway kalibutanon? (b) Ano sa banta mo ang ginbatyag sang Dios sa nahimu sang relihion sa tion sang inaway?

⁷ Kamusta ang ginatos ka relihion karon? Ayhan magaugyon ka nga madamu ang ginhimu sa ngalan sang relihion nga wala ginkahamut-an sang Dios. Sang nagligad nga mga inaway kalibutanon nga naluwasan sang minilyon nga buhi karon, ang mga relihion sa pihak kag pihak nga bahin nagpalig-on sa ila mga tawo sa pagpatay. “Patya  ang mga Aleman​—⁠patya sila,” siling sang obispo sang London. Kag, sa pihak naman, ang arsobispo sang Co­logne nagsiling sa mga Aleman: “Ginasugo namon kamo sa ngalan sang Dios, nga makig-away tubtob sa katapusan nga tulo sang inyo dugo para sa kadungganan kag himaya sang pungsod.”

⁸ Gani ang mga Katoliko nagpatay sa mga Katoliko nga may pahanugot sang ila relihioso nga mga lider, kag amo man ang mga Protestante. Ang klerigo nga si Har­ry Emer­son Fos­dick nagbaton: “Ginpakabit namon bisan sa sulod sang simbahan ang mga bandera sa inaway . . . Gindayaw namon ang Prinsipe sang Paghidait kag ginhimaya man ang inaway.” Ano sa banta mo ang batyagon sang Dios sa relihion nga nagapangangkon sa paghimu sang iya kabubut-on apang nagahimaya sa inaway?

9. (a) Ano ang ginabatyag sang madamu tuhoy sa mga krimen nga ginhimu sang mga katapo sang nanuhaytuhay nga relihion? (b) Kon ang relihion mangin bahin sang kalibutan, ano ang dapat naton ihinakop?

⁹ Bangod sang mga krimen nga ginhimu sa ngalan sang Dios sang mga katapo sang nanuhaytuhay nga relihion sa bug-os nga maragtas, minilyon karon ang nagtalikod sa Dios kag kay Cristo. Ginabasol nila ang Dios sa makakulugmat nga relihiosong mga inaway, subong sang mga Katoliko kontra mga Muslim nga ginatawag Krusada, mga Muslim kontra mga Hindus, kag mga Katoliko kontra mga Protestante. Ginatudlo nila ang pagpatay sa mga Judiyo sa ngalan ni Cristo, kag ang mapintas Katoliko nga mga inkisisyon. Bisan pa ang relihioso nga mga lider nga may salabton sa sining makakulugmat nga mga krimen nagapangangkon nga Amay nila ang Dios, indi bala mga anak man sila sang Yawa subong sang mga Fariseo nga ginpakamalaut ni Jesus? Sanglit si Satanas dios sining kalibutan, indi bala paabuton naton nga ginakontrol man niya ang mga relihion sang katawhan sa kalibutan?​—⁠2 Corinto 4:​4; Bugna 12:9.

10. Ano ang pila ka butang nga ginahimu sa ngalan sang relihion nga indi kamo ugyon?

¹⁰ Wala duhaduha nga madamu karon ang ginahimu sa ngalan sang relihion nga sa banta mo indi husto. Masami ikaw makabati tuhoy sa mga tawo nga may imoral nga kabuhi, apang talahuron nga mga katapo sang iglesia. Ayhan may kilala ka pa gani nga relihiosong mga lider nga may malain nga kabuhi, apang ginabaton gihapon subong maayong relihiosong mga lider sa ila iglesia. Ang iban nga relihiosong mga lider nagsiling nga ang homoseksuwalidad kag paghulid sang mga indi kasal indi malain. Apang ayhan nahibaloan mo nga ang  Biblia wala nagasiling sina. Ang matuod, ginsilotan anay sang Dios sing kamatayon ang katawhan sang Israel bangod sang ila paghimu sina. Bangod man sina ginlaglag niya ang Sodoma kag Gomorra. (Judas 7) Amo man ang iya himuon sa indi madugay sa tanan dimatuod nga relihion karon. Sa Biblia, inang relihion ginalaragway nga pampam bangod sang iya imoral nga relasyon sa “mga hari sang duta.”​—⁠Bugna 17:​1, 2, 16.

PAGSIMBA NGA GINAKAHAMUT-AN SANG DIOS

11. Ano ang kinahanglanon agod kahamut-an sang Dios ang aton pagsimba?

¹¹ Sanglit wala ginakahamut-an sang Dios ang tanan nga relihion, dapat kita mamangkot: ‘Ginasimba ko bala ang Dios sa paagi nga iya nahamut-an?’ Paano naton mahibaloan? Indi tawo kundi Dios ang hukom sa kon ano ang matuod nga pagsimba. Gani agod kahamut-an sang Dios ang aton pagsimba, dapat nanggamut ini sa Pulong sang kamatuoran sang Dios, ang Biblia. Dapat pareho ang pagbatyag naton sa manunulat sang Biblia nga nagsiling: “Pakamatuoron ang Dios, bisan ang tagsa ka tawo butigon.”​—⁠Roma 3:​3, 4.

12. Ngaa nagsiling si Jesus nga ang pagsimba sang mga Fariseo wala nahamut-an sang Dios?

¹² Indi subong sini ang mga Fariseo sang unang siglo. Nagtukod sila  sang ila kaugalingon nga pagtuluohan kag tradisyon kag ginsunod ini sa baylo sang Pulong sang Dios. Ano ang resulta? Si Jesus nagsiling sa ila: “Ginapakawalay pulos ninyo ang pulong sang Dios bangod sang inyo pinalatonlaton nga sugid. Mga salimpapaw, matuod gid ang gintagna nahanungod sa inyo ni Isaias, sang nagsiling sia, ‘Ining katawhan sa mga bibig nagatahod sa akon, apang ang tagipusuon nila malayo sa akon. Walay pulos ang pagsimba nila sa akon, bangod ginatudlo nila subong pagtulon-an ang mga sugo sang mga tawo.’ ” (Mateo 15:​1-9; Isaias 29:​13) Gani agod kahamut-an kita sang Dios, dapat nga ang tuohan naton nahisanto sa mga panudlo sang Biblia.

13. Ano ang ginsiling ni Jesus agod kahamut-an kita sang Dios?

¹³ Indi pa tuman ang magsiling nga nagatuo kita kay Cristo kag himuon ang ginahunahuna naton nga husto. Kinahanglan gid nga hibaluon naton ang kabubut-on sang Dios. Ginpakita ini ni Jesus sa iya Wali sa Bukid sang sia nagsiling: “Indi ang tagsatagsa nga nagasiling sa akon, ‘Ginuo, Ginuo,’ makasulod sa ginharian sang langit, kundi ang nagahimu sang kabubut-on sang akon Amay nga yara sa mga langit.”​—⁠Mateo 7:21.

14. Ngaa makabig kita ni Jesus subong “mga manugbuhat sing kalautan” bisan pa sa banta naton nagahimu kita sing “maayong buhat”?

¹⁴ Ayhan ginahimu naton ang ginapatihan ta nga “maayong buhat,” sa ngalan ni Cristo. Apang ini tanan walay pulos kon indi naton  himuon ang kabubut-on sang Dios. Subong kita sang masunod nga ginsambit ni Cristo: “Madamu ang magasiling sa akon sadtong adlaw, ‘Ginuo, Ginuo, wala bala kami magpanagna sa imo ngalan, kag sa imo ngalan magsobol sang mga demonyo, kag sa imo ngalan maghimu sing madamu nga buhat nga gamhanan?’ Kag nian pahayagan ko sila: Wala gid ako makakilala sa inyo! Palayo sa akon, kamo nga mga manugbuhat sing kalautan.” (Mateo 7:​22, 23) Huo, makahimu kita sing mga butang nga sa banta naton maayo​—⁠kag para sa amo pasalamatan kita kag dayawon pa sang iban​—⁠apang kon indi naton himuon ang ginasiling sang Dios matarong kabigon kita ni Cristo subong “mga manugbuhat sing kalautan.”

15. Ngaa maalamon nga sundon naton ang ginhimu anay sang mga tawo sa dumaan nga Berea?

¹⁵ Sanglit madamung relihion karon ang wala nagahimu sang kabubut-on sang Dios, indi naton mahaumhaum lamang nga ang mga panudlo sang relihiosong organisasyon nga aton ginaupdan nahisanto sa Pulong sang Dios. Ang kamatuoran nga ang Biblia ginagamit sang relihion indi pamatuod nga ang tanan nga ginatudlo kag ginabuhat sini yara sa Biblia. Importante nga usisaon ta kon yara ini ukon wala. Ang mga tawo sa siudad sang Berea gindayaw bangod, sa tapos ang Cristianong si apostol Pablo nagbantala sa ila, gin-usisa nila ang Kasulatan agod mapat-od nga ang iya ginasugid sa ila matuod. (Binuhatan 17:​10, 11) Ang relihion nga nahamut-an sang Dios dapat bug-os nga nahisanto sa Biblia; indi sini batunon ang iban nga bahin sang Biblia kag sikwayon ang iban nga bahin.​—⁠2 Timoteo 3:16.

INDI PA TUMAN ANG PAGKASINSERO LAMANG

16. Ano ang ginsiling ni Jesus agod ipakita nga ang pagkasinsero lamang indi pa tuman agod kahamut-an sang Dios ang isa?

¹⁶ Mahimu may mamangkot: ‘Kon ang tawo sinsero sa iya pagtuo, indi ayhan sia kahamut-an sang Dios bisan pa sala ang iya relihion?’ Siling ni Jesus indi kahamut-an ang “mga manugbuhat sing kalautan” bisan pa pagdumdom nila husto ang ila ginahimu. (Mateo 7:​22, 23) Gani indi kahamut-an sang Dios ang pagkasinsero lamang. Si Jesus nagsiling anay sa iya mga sumulunod: “Magaabot ang oras nga ang makapatay sa inyo magahunahuna nga nagaalagad sia sa Dios.” (Juan 16:2) Basi sinsero nga magpati ang mga nagapatay sa mga Cristiano nga sila nakaalagad sa Dios, apang wala gali. Ang Dios wala nahamuot sa ila ginahimu.

17. Bisan pa sinsero si Pablo, ano ang ginhimu niya antes mangin Cristiano?

 ¹⁷ Antes mangin Cristiano, nakabulig si apostol Pablo sa pagpatay kay Esteban. Sang ulihi, nagplano pa sia sa pagpatay sa dugang pa nga mga Cristiano. (Binuhatan 8:​1; 9:​1, 2) Si Pablo nagpaathag: “Ginhingabot ko sing lakas ang iglesia sang Dios kag ginlaglag ini, kag naunhan ko sa pagtuluohan sang mga Judio ang madamu sang katubotubo ko sa akon mga kasimanwa, bangod makugi gid ako sa mga pinalatonlaton nga sugid sang akon mga ginikanan.” (Galacia 1:​13, 14) Huo, sinsero si Pablo, apang wala yadto maghimu sang iya relihion nga husto.

18. (a) Ano ang relihion ni Pablo sang ginhingabot niya ang mga Cristiano? (b) Ngaa dapat sadto baylohan ni Pablo kag sang iban pa sang iya adlaw ang ila relihion?

¹⁸ Katapo sadto si Pablo sang Judiyo nga relihiosong sistema, nga nagsikway kay Jesucristo, kag gani ginsikway man sang Dios. (Binuhatan 2:​36, 40; Hulubaton 14:​12) Kon amo agod kahamut-an sang Dios dapat nga baylohan ni Pablo ang iya relihion. Nagsulat man sia tuhoy sa iban nga may “kakugi sa Dios”​—⁠sinsero apang wala nahamut-an sang Dios bangod ang ila relihion wala napasad sa sibu nga ihibalo tuhoy sa mga katuyoan sang Dios.​—⁠Roma 10:​2, 3.

19. Ano ang nagapakita nga ang kamatuoran indi magpasugot sa nanuhaytuhay nga panudlo sang mga relihion?

¹⁹ Indi pasugtan sang kamatuoran ang tanan nanuhaytuhay nga relihiosong panudlo sa kalibutan. Kundi diin sa duha, ang tawo may kalag nga nagalampuwas kon mapatay ang lawas ukon wala. Malaglag ang duta ukon indi. Tapuson sang Dios ang kalautan ukon indi. Ini kag ang madamu pa nga pagtuluohan diin sa husto ukon sala. Indi mahimu nga duha ang kamatuoran kon ang isa batok sa isa. Isa lang ang matuod, indi duha. Ang sinsero nga pagtuo, kag pagbuhat sina, indi magahimu sini nga husto kon sala gid ina.

20. Tuhoy sa relihion, paano naton masunod sing husto ang “mapa sang dalan”?

²⁰ Ano ang batyagon mo kon ihatag ang pamatuod nga ang ginatuohan mo sala? Halimbawa, karon pa lang ikaw maglakbay padulong sa isa ka duog. May mapa ikaw sang dalan, apang wala mo ini mausisa sing maayo. May nagtudlo sa imo sang dalan. Nagsalig ka sa iya, sinsero nga nagatuo nga husto ang iya gintudlo sa imo. Apang pananglit indi. Ano kon may magtadlong sini? Ano kon, paagi sa pagbukad sang imo mapa, ipakita niya sa imo nga nagtalang ka? Indi mo bala pagbatunon nga nagtalang ka bangod sang imo bugal ukon pagkatig-a? Gani, kon maton-an mo gikan sa pag-usisa sa imo Biblia nga nagalakbay ikaw sa sala nga dalanon sang relihion, bag-oha ini.  Likawi ang malapad nga dalan padulong sa kalaglagan; magsaylo sa makitid nga dalan padulong sa kabuhi!

KINAHANGLAN ANG PAGHIMU SA KABUBUT-ON SANG DIOS

21. (a) Dugang sa pagtuon sing kamatuoran, ano ang kinahanglanon? (b) Ano ang himuon mo kon matukiban mo nga wala nahamut-an sang Dios ang pila nga ginahimu mo?

²¹ Importante nga mahibaloan ang mga kamatuoran sang Biblia. Apang walay pulos ining ihibalo kon wala mo ginasimba ang Dios sa kamatuoran. (Juan 4:​24) Ang pagbuhat sa kamatuoran, paghimu sa kabubut-on sang Dios, amo ang importante. “Ang pagtuo patay kon walay mga binuhatan,” siling sang Biblia. (Santiago 2:​26) Gani, agod pahamut-an ang Dios, indi lamang nga ang imo relihion maghisanto sing bug-os sa Biblia kundi dapat man iaplikar sa adlaw-adlaw nga kabuhi. Busa, kon matukiban mo nga ginahimu mo ang ginasiling sang Dios sala, handa ka bala sa pagbag-o?

22. Anong mga benepisyo ang maagom naton karon kag sa palaabuton, kon buhaton naton ang matuod nga relihion?

²² Daku nga mga pagpakamaayo ang nagahulat sa imo kon himuon mo ang kabubut-on sang Dios. Makabenepisyo ka bisan karon. Ang pagbuhat sa matuod nga relihion magahimu sa imo nga isa ka mas maayo nga tawo​—⁠mas maayo nga lalaki, bana ukon amay, mas maayo nga babayi, asawa ukon iloy, mas maayo nga anak. Magapatubas ini sa imo sing diosnon nga mga kinaiya nga magapatuhay sa imo sa iban bangod ginahimu mo ang husto. Labi pa, maagom mo ang pagpakamaayo nga kabuhi nga dayon sa kalipay kag himpit nga kapagros sa paraiso nga bag-ong duta sang Dios. (2 Pedro 3:​13) Indi maduhaduhaan​—⁠importante gid kon ano ang imo relihion!

[Mga Pamangkot sa Pagtinuon]

[Piktyur sa pahina 25]

Nagaalagad bala sa Dios ang relihiosong mga lider nga nagtinguha sa pagpatay kay Jesus?

[Mga piktyur sa pahina 26, 27]

Ang kalabanan nga tawo yara sa masangkad nga dalan padulong sa kalaglagan, siling ni Jesus. Pila lamang ang yara sa makitid nga dalan padulong sa kabuhi

[Piktyur sa pahina 28, 29]

“Nagatu-ad sila nga nagakilala sila sa Dios, apang sa ila mga buhat ginapanghiwala nila sia.”​—⁠Tito 1:16.

Sa Pulong

Sa Buhat

[Piktyur sa pahina 30]

Bangod tuhay ang relihion niya, gintugutan ni Pablo ang pagbato kay Esteban nga disipulo ni Cristo

[Piktyur sa pahina 33]

Kon nagtalang ikaw, indi mo bala pagbatunon ini bangod sang bugal ukon pagkatig-a?